સ્થાનિક સ્વરાજની સંસ્થાઓની ચૂંટણી મામલે ભાજપે જાહેર કરી ઉમેદવારોની યાદી

સ્થાનિક સ્વરાજની સંસ્થાઓની ચૂંટણી અંતર્ગત આગામી 16 ફેબ્રુઆરીએ મતદાન થશે. 27 જાન્યુઆરીથી ઉમેદવારી ફોર્મ ભરાવાની પ્રક્રિયા શરૂ થઈ હતી. શનિવારે ઉમેદવારી ફોર્મ ભરવાનો છેલ્લો દિવસ છે ત્યારે ભાજપે નગરપાલિકા, જિલ્લા પંચાયત, તાલુકા પંચાયત, મનપાના ઉમેદવારોની યાદી જાહેર કરી હતી. 17 નગરપાલિકા, તાલુકા પંચાયતની 34 બેઠકો, જિલ્લા પંચાયતની 6 બેઠકો, મહાનગરપાલિકાની 2 બેઠકો અને નગરપાલિકાની 3 બેઠકોની પેટા ચૂંટણીના ઉમેદવારો જાહેર કરાયા હતા. 

ગાંધીનગરમાં મુખ્યમંત્રીના નિવાસ સ્થાને 29 અને 30 જાન્યુઆરીના રોજ ભાજપ પાર્લામેન્ટરી બોર્ડની બેઠક યોજાઈ હતી. મુખ્યમંત્રી ભૂપેન્દ્ર પટેલ, પ્રદેશ ભાજપ પ્રમુખ સી.આર.પાટીલ સહિત પાર્લામેન્ટરી બોર્ડના સભ્યોએ નિરીક્ષકો દ્વારા રજૂ કરાયેલા દાવેદારોના નામો પર ચર્ચા કરી ફાઈનલ યાદી જાહેર કરી હતી. 

વલસાડ, પારડી, ધરમપુર, બોટાદ, ગઢડા, ગારીયાધાર, શિહોર, માણસા, થાનગઢ, ખેરાલુ, વડનગર, છોટાઉદેપુર, રાણાવાવ, કુતિયાણા, સોનગઢ, બીલીમોરા, કોડીનાર નગરપાલિકાની સામાન્ય ચૂંટણીના ઉમેદવારોની યાદી જાહેર કરાઈ હતી. જ્યારે રાજ્યના અલગ અલગ જિલ્લા પંચાયતની 6 બેઠકો તેમજ તાલુકા પંચાયતની 34 બેઠકોની પેટા ચૂંટણીના ઉમેદવારો જાહેર કરાયા હતા. 

ઉલ્લેખનીય છે કે, રાજ્ય ચૂંટણી આયોગ દ્વારા 21 જાન્યુઆરીએ સ્થાનિક સ્વરાજની સંસ્થાઓની ચૂંટણી જાહેર કરી 27 જાન્યુઆરીના રોજ જાહેરનામુ પ્રસિદ્ધ કરાયુ હતુ. 27 જાન્યુઆરીથી ફોર્મ ભરવાની પ્રક્રિયા શરૂ થઈ છે. 1 ફેબ્રુઆરીથી ઉમેદવારોના ફોર્મ ભરાશે. 3 ફેબ્રુઆરીએ ઉમેદવારી પત્રોની ચકાસણી કરાશે. 4 ફેબ્રુઆરી સુધી ઉમેદવારી પત્રો પરત ખેંચી શકાશે. તે જ દિવસે સાંજે હરીફ ઉમેદવારોની યાદી જાહેર થશે. ત્યારબાદ 16 ફેબ્રુઆરીએ મતદાન અને 18 ફેબ્રુઆરીએ મત ગણતરી યોજાશે. 

જૂનાગઢ મહાનગરપાલિકા, 66 નગરપાલિકા ઉપરાંત કઠલાલ, કપડવંજ અને ગાંધીનગર તાલુકા પંચાયતની સમાન્ય ચૂંટણી અને બોટાદ, વાંકાનેર નગરપાલિકાની મધ્યસત્ર ચૂંટણી અંતર્ગત મતદાન થશે. આ ઉપરાંત ખાલી પડેલી મનપાની 3, નગરપાલિકાની 21, જિલ્લા પંચાયતની 9 અને તાલુકા પંચાયતોની 91 બેઠકોની પેટાચૂંટણી યોજાનાર છે.