ભરૂચમાં BJPના MLAએ કરી પાટીલના મેન્ડેટની ઐસીતૈસી!

ભરૂચની દૂધધારા ડેરીની ચૂંટણીમાં વાગરાના ભાજપના ધારાસભ્ય અરૂણસિંહ રણાએ પ્રદેશ ભાજપ પ્રમુખ સી.આર.પાટીલના મેન્ડેટના લીરેલીરા ઉડાવ્યા છે. ફોર્મ પરત ખેંચવાના છેલ્લા દિવસે ભાજપના મેન્ડેટની ઐસીતૈસી કરી 12 બેઠકો ઉપર ઉમેદવાર યથાવત રાખ્યા છે. જ્યારે તેમના એક ઉમેદવાર પ્રકાશ દેસાઈ અગાઉથી બિનહરીફ થઈ ગયા છે. તેથી 15 માંથી 14 બેઠકો માટે 19 સપ્ટેમ્બરે ભાજપના ઘનશ્યામ પટેલ વિરુદ્ધ ભાજપના અરૂણસિંહ રણાની પેનલો વચ્ચે ચૂંટણી જંગ જામશે.

દૂધધારા ડેરીની ચૂંટણીમાં ભાજપમાં આંતરિક ઘમાસાણ ચરમસીમાએ છે. પ્રદેશ ભાજપે મેન્ડેટ જાહેર કર્યા હોવા છતાં સ્થાનિક નેતાઓએ મેન્ડેટની ઐસીતૈસી કરી નાખી છે. પ્રદેશ ભાજપ પ્રમુખ સી.આર. પાટીલે આપેલાં મેન્ડેટ વિરુદ્ધ ભાજપના ધારાસભ્ય અરૂણસિંહ રણાએ વિકાસ સહકાર પેનલ ઉતારતાં મામલો ગુજરાતમાં ટોક ઓફ ધી સ્ટેટ બન્યો છે.

ધારાસભ્ય અરૂણસિંહ રણાએ સી.આર.પાટીલના મેન્ડેટ વિરુદ્ધ એક નહીં પણ 12 ઉમેદવારો ઉતાર્યા છે. ઉમલ્લા બેઠકના ઉમેદવાર પ્રકાશ દેસાઈને પૂર્વ ચેરમેન ઘનશ્યામ પટેલે બિનહરીફ થવા દીધો છે. ઘનશ્યામ પટેલે ભાજપના મેન્ડેટનો આદર કરી તેમના પુત્ર સાગર પટેલ સહિતના ઉમેદવારોના ફોર્મ પરત ખેંચાવી લીધા છે. ભાજપે જાહેર કરેલાં મેન્ડેટમાં 12 ઉમેદવાર ઘનશ્યામ પટેલની પેનલના અને ત્રણ ઉમેદવાર અરૂણસિંહ રણાની પેનલના હોવાનું સૂત્રોએ જણાવ્યું છે.

14 બેઠકો માટે 29 ઉમેદવારો મેદાનમાં

દૂધધારા ડેરીના નિયામક મંડળની 11 બેઠક માટે 22, મહિલા અનામત માટે 4 અને આદિજાતિ અનામત માટે 3 ઉમેદવારો મેદાનમાં રહ્યા છે. 29 ઉમેદવારોનું ભાવિ નક્કી કરવા 296 મતદારો 19 સપ્ટેમ્બરે મતદાન કરશે. ઉમલ્લા બેઠક પરથી અપક્ષ ઉમેદવાર દિપક પાદરિયાએ ઉમેદવારી પરત ખેંચી લેતાં અરૂણસિંહ રણાની પેનલના પ્રકાશ દેસાઇ બિનહરીફ વિજેતા બન્યાં છે.

દૂધધારા ડેરીના પૂર્વ ચેરમેન ઘનશ્યામ પટેલે જણાવ્યું કે, પ્રદેશ ભાજપે 15 ઉમેદવારોના મેન્ડેટ આપ્યા છે. અમારી પેનલમાંથી મેન્ડેટ વિરુદ્ધ ઉમેદવારી કરનારા તમામ ઉમેદવારોએ ફોર્મ પરત ખેંચીને મેન્ડેટનો આદર કર્યો છે. જ્યારે મેન્ડેટનો અનાદર કરનાર સામે કાર્યવાહી થવી જરૂરી છે.

વાગરાના ધારાસભ્ય અરૂણસિંહ રણાએ જણાવ્યું કે, અમારી પેનલના એક ઉમેદવાર બિનહરીફ થયાં છે. અમારી વિકાસ સહકાર પેનલ પશુપાલકોના હિતમાં કામ કરવા તૈયાર છે. અમારી પેનલ ભાજપની જ પેનલ છે. અમે પહેલાં ચૂંટણી લડીશું બાદમાં મેન્ડેટના મામલે હાઇકમાન્ડ પાસે જઇશું.

પાટીલ વિરૂદ્ધ અમિત શાહનો જંગ

દૂધધારા ડેરીમાં પૂર્વ ચેરમેન ઘનશ્યામ પટેલના 17 વર્ષના શાસન સામે વાગરાના ભાજપના ધારાસભ્ય અરૂણસિંહ રણાએ પડકાર ફેકયો છે. તેમણે ડેરીની ચૂંટણીમાં 15 ઉમેદવારો ઉભા રાખ્યા હતાં. તે પૈકી એક ઉમેદવાર બિનહરીફ થઈ ગયા છે. પ્રદેશ ભાજપ અધ્યક્ષ સી.આર.પાટીલે 15 ઉમેદવારોનો મેન્ડેટ જારી કર્યો છે. અરૂણસિંહ રણાની પેનલના ઉમેદવારોએ ભાજપના મેન્ડેટ વિરુદ્ધ ઉમેદવારી કરી છે. એકપણ ઉમેદવારે ફોર્મ પરત નહીં ખેંચીને સી.આર.પાટીલને પણ પડકાર ફેંકયો છે. અરૂણસિંહ રણાને કેન્દ્રીય ગૃહ મંત્રી અમિત શાહનું અને ઘનશ્યામ પટેલને પ્રદેશ પ્રમુખ સી.આર,પાટીલનું પીઠબળ હોવાની ચર્ચા છે. તેવા સમયે દૂધધારા ડેરીની ચૂંટણીનો જંગ રસપ્રદ બન્યો છે. આગામી મહિનાઓમાં સ્થાનિક સ્વરાજની ચૂંટણીઓ યોજાવાની હોવાથી ભાજપમાં થયેલો બળવો સૂચક માનવામાં આવી રહ્યો છે.

ઘનશ્યામ પટેલની પેનલને BTP નું સમર્થન

ભારતીય ટ્રાઈબલ પાર્ટી (BTP)ના પ્રમુખ છોટુ વસાવાના પુત્ર અને ડેડિયાપાડાના પૂર્વ ધારાસભ્ય મહેશ વસાવાએ ઘનશ્યામ પટેલને સમર્થન આપ્યું છે. ભાજપના સાંસદ મનસુખ વસાવાએ જિલ્લા ભાજપ પ્રમુખ પ્રકાશ દેસાઈની ઉમેદવારીનો વિરોધ કર્યો હતો. પરંતુ પ્રકાશ દેસાઈ બિનહરીફ થઈ ગયા છે. ત્યારે સમગ્ર ઘટનાઓને લઈ દૂધધારા ડેરીની ચૂંટણીમાં ભાજપની આંતરિક ખેંચતાણ બહાર આવી છે.