વલસાડ કલેક્ટરે નેશનલ હાઈવે ઓથોરિટીને 10 દિવસમાં ખાડા રિપેર કરવાની આપેલી સૂચનાનું સૂરસૂરીયું થઈ ગયુ છે. કલેક્ટરની સૂચના આપ્યાને 20 દિવસ કરતાં વધુ સમય થવા છતાં ખાડા રિપેર કરાયા નથી. ભાજપ સાંસદે પણ નેશનલ હાઈવે ઓથોરિટીને જાણ કરી હતી. તેમ છતાં ખાડા રિપેર નહીં થતાં ભાજપ શાસિત જિલ્લા પંચાયતના પ્રમુખ અને કપરાડા તાલુકા પંચાયત પ્રમુખે હાઈવે ઉપર ખાડાઓમાં બેસીને વિરોધ પ્રદર્શન કર્યુ હતું. જેના કારણે કલેક્ટરે આપેલી ખાડાઓ પૂરવાની સૂચનાની પોલ ઉઘાડી પડી હતી. ભાજપના સાંસદ અને ભાજપની સરકાર સામે ભાજપના નેતાઓએ બાયો ચઢાવતાં વલસાડ પંથકમાં મામલો ભારે ચર્ચાસ્પદ બન્યો હતો.

વલસાડ જિલ્લામાંથી પસાર થતાં નેશનલ હાઈવે પર અસંખ્ય ખાડાઓ પડી જતાં નાગરિકો સોશિયલ મીડિયામાં ખાડાઓની જગ્યાએ રસ્તો ક્યાં છે તે શોધવાનું જણાવી સાંસદ, ધારાસભ્યો અને નેતાઓની ઠેકડી ઉડાવી રહ્યા છે. તેવા સમયે ભાજપ શાસિત વલસાડ જિલ્લા પંચાયતના પ્રમુખ મનહર પટેલને કપરાડા જતાં સમયે રસ્તામાં ખાડાઓના કારણે પસાર થવામાં તકલીફ પડી હતી.

July 30, 2025 | 17:01 IST