ભારજ નદી ઉપરના ડાયવર્ઝનની કામગીરીમાં ભાજપના નેતાનો ભ્રષ્ટાચારનો આરોપ

છોટાઉદેપુર જિલ્લામાં નેશનલ હાઈવે-56 ઉપર ભારજ નદી ઉપર બનેલો ડાયવર્ઝન પ્રથમ વરસાદમાં ધોવાઈ ગયો છે. રૂપિયા 4 કરોડના ખર્ચે બનેલો ડાયવર્ઝન ધોવાઈ ગયા બાદ છોટાઉદેપુર તાલુકા પંચાયતના કારોબારી ચેરમેને વીડિયો બનાવી સોશિયલ મીડિયામાં વાયરલ કર્યો છે. જેમાં તેમણે સરકાર અને વહીવટીતંત્ર સામે ભ્રષ્ટાચારનો આરોપ કરી કામગીરી સામે સવાલ ઉઠાવ્યા છે. 

છોટાઉદેપુરના શિહોદ પાસે ભારજ નદી પરનો ડાયવર્ઝન ધોવાઈ ગયો છે. રૂપિયા 4 કરોડના ખર્ચે બનાવેલો ડાયવર્ઝન પ્રથમ વરસાદમાં ધોવાઈ ગયો હોવાનો છોટાઉદેપુર તાલુકા પંચાયતના કારોબારી ચેરમેન રાજેશ રાઠવાએ દાવો કર્યો છે. કારોબારી ચેરમેન રાજેશ રાઠવાએ સોશિયલ મીડિયામાં વીડિયો વાયરલ કરી આ મુદ્દો ઉઠાવ્યો છે. છોટાઉદેપુર જિલ્લામાં ભ્રષ્ટાચાર ચરમસીમાએ હોવાનો રાજેશ રાઠવાએ ગંભીર આક્ષેપ કર્યો છે.

રાઠવાએ વીડિયોમાં જણાવ્યું છે કે, છોટાઉદેપુર જિલ્લામાં નકલી કચેરી સહિત અનેક ભ્રષ્ટાચારના કિસ્સાઓ પકડાયા છે. પરંતુ સરકાર દ્વારા કોઈ પગલાં લેવામાં આવ્યા નથી. જિલ્લામાં અધિકારીઓનું રાજ ચાલતું હોવાનો પણ તેમણે આક્ષેપ કર્યો છે. પંચાયતથી લઈને પાર્લામેન્ટ સુધી ભાજપ સરકાર હોવા છતાં આવી સ્થિતિ સર્જાવા અંગે તેમણે ચિંતા વ્યક્ત કરી છે. રાઠવાએ જણાવ્યું કે માત્ર બે મહિના પહેલાં બનાવેલો ડાયવર્ઝન પ્રથમ વરસાદમાં તૂટી જવો તે જિલ્લા માટે શરમજનક બાબત છે. તેઓ આક્રોશ વ્યક્ત કરતાં કહે છે કે, હવે કોને ગાળો દેવી, વહીવટીતંત્રને ગાળો દેવી, નેતાઓને ગાળો દેવી કે પછી આ વરસાદને ગાળો દેવી?

રાજેશ રાઠવાએ વધુમાં જણાવ્યું કે, આપણાં છોટાઉદેપુરના નેતાઓએ ખરેખર આ બાબતે ધ્યાન દોરવા જેવું છે. 4 કરોડનો ડાયવર્ઝન બનાવતા હોય અને એ ડાયવર્ઝન પ્રથમ વરસાદમાં જ ધોવાઈ જાય તો વિચાર કરો એ ડાયવર્ઝન કેવો હશે? આ બાબતે એક્શન લેવું જોઈએ. ભારતીય જનતા પાર્ટીના નેતાઓ અને કાર્યકર્તાઓને ગામડામાં પૂછે છે કે, આ સરકાર શું કરે છે. અધિકારીઓનું રાજ છોટાઉદેપુરમાં ચાલે છે એ સાબિત થઇ ગયું છે હવે. હવે કોઈને કહેવા જેવું છે નહી. પંચાયતથી લઇ પાર્લમેન્ટ સુધી આપણી ભારતીય જનતા પાર્ટીની સરકાર છે તો તમામે એક્શન લેવા જોઈએ અને કહેવું જોઈએ.