પ્રિયંકા ગાંધી પર ભાજપનો તીવ્ર પ્રહાર

ભારતીય જનતા પાર્ટીએ કોંગ્રેસની મહાસચિવ અને વાયનાડની સાંસદ પ્રિયંકા ગાંધી વાડ્રા પર તીવ્ર વાકપ્રહાર કર્યો છે અને તેમને "ભારતીય રાજનીતિની મહિલા ગજની" ગણાવી દીધા છે. આ ટિપ્પણી પ્રિયંકા ગાંધી દ્વારા વડાપ્રધાન નરેન્દ્ર મોદીની ઈઝરાયલ મુલાકાત પહેલાં ગાઝા નરસંહારનો મુદ્દો ઉઠાવવા બાદ કરવામાં આવી છે. ભાજપે આને "સિલેક્ટિવ આઉટરેજ" (પસંદગીયુક્ત આક્રોશ) ગણાવીને પ્રિયંકા પર પ્રહાર કર્યો છે.

ભાજપના રાષ્ટ્રીય પ્રવક્તા ગૌરવ ભાટિયાએ સોશિયલ મીડિયા પ્લેટફોર્મ એક્સ પર પ્રિયંકા ગાંધીનો એક ફોટો શેર કર્યો છે, જેમાં તેઓ પેલેસ્ટાઈન લખેલી બેગ લઈને સંસદમાં પહોંચ્યા હતા. ગૌરવ ભાટિયાએ લખ્યું છે કે "ભારતીય રાજનીતિની મહિલા ગજની પાછા આવ્યા છે." તેમણે આગળ લખ્યું કે "પેલેસ્ટાઈન બેગ લઈને સંસદમાં આવવું સરળ છે, પરંતુ 7 ઓક્ટોબરના 1200થી વધુ લોકોના હત્યાકાંડ, મહિલાઓના અપહરણ અને બળાત્કારને વખોડવાની નૈતિક હિંમત હોવી પ્રિયંકા ગાંધી માટે સ્પષ્ટપણે ઘણી અઘરી છે. તમે નકલી ગાંધી અટક ધરાવી શકો છો, પરંતુ તમારામાં સ્પષ્ટપણે દ્રઢતા અને હિંમતની ઉણપ છે. #SelectiveOutrage

આ ટિપ્પણી 2008માં રિલીઝ થયેલી બોલિવુડ ફિલ્મ 'ગજની'ના નાયકના શોર્ટ ટર્મ મેમરી લોસના કેરેક્ટર પર આધારિત છે, જેને ભાજપે પ્રિયંકા ગાંધીના રાજકીય વલણને લઈને વ્યંગ કરવા માટે વાપર્યો છે. ભાજપનું કહેવું છે કે પ્રિયંકા ગાંધી ગાઝા પર ટિપ્પણી કરે છે પરંતુ 7 ઓક્ટોબર 2023ના હમાસ હુમલા દરમિયાન ઈઝરાયલમાં થયેલા હત્યાકાંડ, મહિલાઓ પર અત્યાચાર અને અપહરણની ઘટનાઓને વખોડવાની હિંમત નથી દાખવતા.

આ પહેલાં પ્રિયંકા ગાંધીએ સંસદમાં અને સોશિયલ મીડિયા પર પીએમ મોદીની ઈઝરાયલ મુલાકાતને લઈને ટિપ્પણી કરી હતી. તેમણે કહ્યું હતું કે તેઓ આશા રાખે છે કે વડાપ્રધાન ઈઝરાયલની સંસદને સંબોધિત કરતી વખતે ગાઝા નરસંહારનો મુદ્દો ઉઠાવશે. પ્રિયંકાએ ભારપૂર્વક જણાવ્યું હતું કે ભારતે સત્ય, શાંતિ અને ન્યાયની વૈશ્વિક દીવદાંડી બનવું જોઈએ.

આ દરમિયાન વડાપ્રધાન નરેન્દ્ર મોદી બુધવારે સવારે ઈઝરાયલની બે દિવસની મુલાકાતે પહોંચ્યા છે. આ મુલાકાતનો મુખ્ય ઉદ્દેશ્ય ભારત અને ઈઝરાયલ વચ્ચે સંરક્ષણ, સુરક્ષા, ટેક્નોલોજી અને વેપારના સહયોગને વધુ મજબૂત કરવાનો છે. આ તેમની વડાપ્રધાન તરીકેની બીજી ઈઝરાયલ યાત્રા છે.

આ પહેલાં કોંગ્રેસના નેતા જયરામ રમેશે પણ પીએમ મોદીની આ યાત્રાને લઈને ટીકા કરી હતી. તેમણે કહ્યું હતું કે વૈશ્વિક સ્તરે નેતન્યાહૂની ટીકા ચાલી રહી છે ત્યારે તેમને ગળે મળવું નૈતિક કાયરતા દર્શાવે છે.

આ મુદ્દે રાજકીય ગરમાવો વધી રહ્યો છે. ભાજપે પ્રિયંકા ગાંધીને "સિલેક્ટિવ આઉટરેજ"નો આરોપ લગાવ્યો છે, જ્યારે કોંગ્રેસે ઈઝરાયલની નીતિઓ અને ગાઝા મુદ્દે ભારતની સ્થિતિ પર સવાલ ઉઠાવ્યા છે. આ વિવાદ હવે સંસદ અને સોશિયલ મીડિયા પર ચર્ચાનો મુખ્ય વિષય બની ગયો છે.