બિહાર ચૂંટણીઃ પહેલી વખત મુસ્લિમ MLA ઓછા ચૂંટાયા!

બિહાર વિધાનસભા સામાન્ય ચૂંટણી-2025માં મુસ્લિમ પ્રતિનિધિત્વ ઐતિહાસિક રીતે ઘટ્યું છે. આ વખતે, ફક્ત 11 મુસ્લિમ ધારાસભ્યો ચૂંટાયા છે. જે 2020 માં 19 હતા. AIMIM એ સીમાંચલમાં અગાઉની બધી બેઠકો ફરીથી મેળવી અને અન્ય ઘણા પ્રદેશોમાં મહાગઠબંધનના મતોને વિભાજીત કર્યા છે.

બિહાર વિધાનસભા ચૂંટણીમાં નીતિશ કુમારના તોફાનમાં મહાગઠબંધનનો રાજકીય કિલ્લો તૂટી પડ્યો છે. NDA ના રાજકીય મોજાથી મુસ્લિમ રાજકારણ પણ ડૂબી ગયું છે. આ વખતે  બિહાર ચૂંટણીમાં ફક્ત 11 મુસ્લિમ ધારાસભ્યો જીત્યા છે. જે 2020 માં 19 હતા. અગાઉની વિધાનસભા ચૂંટણી કરતા 8 મુસ્લિમ ધારાસભ્યો ઓછા ચૂંટાયા છે.

1951 પછી બિહારના રાજકીય ઇતિહાસમાં યોજાયેલી તમામ ચૂંટણીઓ પૈકી 1985ની ચૂંટણીમાં સૌથી વધુ મુસ્લિમ ધારાસભ્યો ચૂંટાયા હતા. જેમાં 34 જીત્યા હતા. જ્યારે આ વખતની ચૂંટણીમાં સૌથી ઓછા મુસ્લિમ ધારાસભ્યો 11 ચૂંટાયા છે.

2025ની વિધાનસભા ચૂંટણીમાં સૌથી વધુ મુસ્લિમ ધારાસભ્યો AIMIMના 5, RJDના 3, કોંગ્રેસના 2 અને JDUના 1 ચૂંટાયા છે. CPI(ML) કે ચિરાગ પાસવાનની પાર્ટીમાંથી એકપણ મુસ્લિમ ધારાસભ્ય વિધાનસભા ચૂંટણી જીતી શક્યા નથી.

કયા મુસ્લિમ ધારાસભ્યો જીત્યા?

કિશનગંજથી મોહમ્મદ કમરુલ હોડા અને અરરિયાથી અબ્દુર રહેમાન કોંગ્રેસની ટિકિટ પર જીત્યા છે. રઘુનાથપુરથી ઓસામા શાહાબ, બિસ્ફીથી આરિફ અહેમદ અને ઢાકાથી ફૈઝલ રહેમાન RJDની ટિકિટ પર જીત્યા છે.

જોકીહાટથી મોહમ્મદ ખુર્શીદ આલમ, બહાબુર્ગંજથી મોહમ્મદ તૌસીફ આલમ, કોચાધમનથી મોહમ્મદ સરવર આલમ, અમોરથી અખ્તરુલ ઇમાન અને બૈસીથી ગુલામ સરવર AIMIMની ટિકિટ પર ચૂંટાયા છે. બીજી તરફ, મોહમ્મદ જમાખાને જેડીયુની ટિકિટ પર ચૈનપુર બેઠક જીતી છે. તેમણે અગાઉ 2020 માં બસપાની ટિકિટ પર આ બેઠક જીતી હતી અને બાદમાં જેડીયુમાં જોડાયા હતા.

મુસ્લિમોમાં ઓવૈસીનું પ્રભુત્વ વધ્યું

ઓલ ઈન્ડિયા મજલિસ-એ-ઇત્તેહાદુલ મુસ્લિમીન (AIMIM) ના વડા અસદુદ્દીન ઓવૈસીએ માત્ર સીમાંચલમાં જ નહીં. પરંતુ અન્ય ઘણા મુસ્લિમ પ્રભુત્વ ધરાવતા મતવિસ્તારોમાં પણ વિપક્ષી મહાગઠબંધનને મજબૂતીનો અહેસાસ આપ્યો છે. 2020 ની ચૂંટણીમાં, AIMIMના પાંચ ધારાસભ્યો જીત્યા હતા. જેમાંથી ચાર આરજેડીમાં જોડાયા હતા.

AIMIM ના ચાર ધારાસભ્યોના બળવા છતાં ઓવૈસીની પાર્ટીએ ગઈ વખતે જીતેલી બધી બેઠકો જાળવી રાખી છે. જેમાં બૈસી, આમરો, જોકીહાટ, બહાદુરગંજ અને કોચધામનનો સમાવેશ થાય છે. વધુમાં, પાર્ટીના ઉમેદવારો બલરામપુર, દરભંગા ગ્રામીણ, ગૌરાભૌરમ, પ્રાણપુર, કસ્બા, ઠાકુરગંજ અને શેરઘાટીમાં બીજા કે ત્રીજા સ્થાને રહ્યા છે. જેના કારણે મતોમાં ઘટાડો થયો અને વિપક્ષી મહાગઠબંધનના ઉમેદવારોને જીતતા અટકાવ્યા છે.

કયા પક્ષે કેટલા મુસ્લિમ ઉમેદવારોને ટિકિટ આપી હતી?

બિહાર વિધાનસભા ચૂંટણીમાં NDA અને મહાગઠબંધન બંનેએ મુસ્લિમ ઉમેદવારો પર પોતાનો દાવો કર્યો હતો. તેજસ્વી યાદવના નેતૃત્વ હેઠળના મહાગઠબંધને 30 મુસ્લિમ ઉમેદવારો ઉભા રાખ્યા હતા. જ્યારે નીતિશ કુમારના નેતૃત્વ હેઠળના NDAએ 5 ઉમેદવારો ઉભા રાખ્યા હતા. RJD ના 18 મુસ્લિમ ઉમેદવારો પૈકી ફક્ત 3 ઉમેદવારો જીત્યા છે. કોંગ્રેસના 10 માંથી ફક્ત બે ઉમેદવારો જીત્યા છે.

CPI-ML એ બે મુસ્લિમ ઉમેદવારો ઉભા રાખ્યા હતા. જે બંને હારી ગયા છે. NDAમાં JDU એ ચાર મુસ્લિમ ઉમેદવારો ઉભા રાખ્યા હતા અને LJP એ એક મુસ્લિમ ઉમેદવાર ઉભા રાખ્યા હતા. LJP ઉમેદવાર જીતી શક્યા નહીં, જ્યારે JDU ના ચાર ઉમેદવારોમાંથી ફક્ત એક જ ઉમેદવાર જીત્યો છે. અસદુદ્દીન ઓવૈસીની પાર્ટી AIMIM એ 23 મુસ્લિમ ઉમેદવારોને મેદાનમાં ઉતાર્યા હતા. જેમાંથી પાંચ જીત્યા છે. પરિણામે કુલ 11 મુસ્લિમ ધારાસભ્યો બન્યા છે.

2025 માં સૌથી ઓછા મુસ્લિમ ધારાસભ્યો

બિહારમાં મુસ્લિમ વસતી લગભગ 18 ટકા છે. જેના માટે ઓછામાં ઓછા 44 ધારાસભ્યોની જરૂર છે. 1951 થી મુસ્લિમ ધારાસભ્યો ક્યારેય આટલી સંખ્યામાં જીત્યા નથી. આ વખતે 243 વિધાનસભા બેઠકોમાંથી ફક્ત 11 મુસ્લિમ ધારાસભ્યો ચૂંટાયા છે. 1985 ની ચૂંટણીમાં બિહારમાં ચૂંટાયેલા મુસ્લિમ ધારાસભ્યોની સૌથી વધુ સંખ્યા 34 હતી. જ્યારે સંયુક્ત બિહારમાં 324 બેઠકો હતી.

વર્ષ 2020 ની ચૂંટણીમાં કુલ 19 મુસ્લિમ ધારાસભ્યો ચૂંટાયા હતા. જેમાં RJD ના 8, કોંગ્રેસ ના 4, AIMIM ના 5, CPI (ML) ના 1 અને BSP ના 1નો સમાવેશ થાય છે. આ વખતે સંખ્યા ઘટીને 11 થઈ ગઈ છે. જે બિહારના રાજકીય ઇતિહાસમાં સૌથી ઓછી છે.

1951 થી 2025 સુધી કેટલા મુસ્લિમ ધારાસભ્યો હતા?

બિહારની પહેલી વિધાનસભા ચૂંટણી 1951-52માં યોજાઈ હતી. જેમાં 24 મુસ્લિમ ધારાસભ્યો ચૂંટાયા હતા. ત્યારબાદ 1957ની ચૂંટણીમાં 25 મુસ્લિમ ધારાસભ્યો અને 1962 ની ચૂંટણીમાં 21 મુસ્લિમ ધારાસભ્યો જીત્યા હતા. 1967ની ચૂંટણીમાં 18 મુસ્લિમો જીત્યા હતા. જ્યારે 1969ની ચૂંટણીમાં 19 મુસ્લિમો જીત્યા હતા.

1972 અને 1977ની ચૂંટણીમાં 25 મુસ્લિમ ધારાસભ્યો જીત્યા હતા. 1980 ની ચૂંટણીમાં મુસ્લિમ ધારાસભ્યોની સંખ્યામાં વધારો થયો હતો. જેમાં 28 મુસ્લિમોએ વિધાનસભામાં બેઠકો જીતી હતી. જ્યારે ૧૯૮૫ની ચૂંટણીમાં 34 મુસ્લિમોએ બેઠકો જીતી હતી.

જોકે, 1990ની ચૂંટણીમાં મુસ્લિમ ધારાસભ્યોની સંખ્યામાં ઘટાડો થયો હતો. જેમાં માત્ર 20 બેઠકો જીતી હતી. આ પછી, 1995ની ચૂંટણીમાં 19 મુસ્લિમોએ બેઠકો જીતી. 2000માં, મુસ્લિમ ધારાસભ્યોની સંખ્યા ફરી વધી, જેમાં 29 મુસ્લિમોએ વિધાનસભામાં બેઠકો જીતી હતી.

2005માં બિહારમાં સત્તા પરિવર્તન પછી મુસ્લિમ ધારાસભ્યોની સંખ્યામાં ઘટાડો થયો. ફક્ત 16 બેઠકો જીતી. ત્યારબાદ 2010ની ચૂંટણીમાં 19 મુસ્લિમ ધારાસભ્યો જીત્યા અને 2015માં નીતિશ અને લાલુ ભેગા થયા ત્યારે મુસ્લિમ ધારાસભ્યોની સંખ્યા 24 પર પહોંચી ગઈ. 2020માં ફક્ત 19 મુસ્લિમ ધારાસભ્યો ચૂંટાયા. જ્યાર આ વખતે મુસ્લિમ ધારાસભ્યોની સંખ્યા ઘટીને 11 થઈ ગઈ છે.