બંગાળ ચૂંટણીઃ બે વર્ષમાં ભાજપના 56 લાખ મત વધ્યાં

પશ્ચિમ બંગાળ વિધાનસભા ચૂંટણીમાં ભાજપે 207 બેઠકો જીતીને સ્પષ્ટ બહુમતી મેળવી છે. તૃણમૂલ કોંગ્રેસ 80 બેઠકો પર સમેટાઈ ગઈ છે. ભાજપને બે વર્ષમાં 56 લાખ વધુ મત મળ્યા છે. જેના કારણે ભાજપનો મત હિસ્સો વર્ષ 2024ની લોકસભા ચૂંટણીમાં 38.7 ટકા હતો તે વધીને 45.8 ટકા થયો છે. જ્યારે લોકસભા ચૂંટણીની તુલનામાં ટીએમસીના મત 17 લાખ ઘટી ગયા છે.

પશ્ચિમ બંગાળ વિધાનસભા ચૂંટણીના પરિણામોએ રાજ્યના રાજકીય પરિસ્થિતિને બદલી નાખી છે. ચૂંટણીના પરિણામો બાદ સૌથી વધુ ચર્ચાસ્પદ વિષય ભાજપ અને ટીએમસીના મતનો હિસ્સો અને મતના તફાવતનો છે. મળેલી માહિતી અનુસાર, ભાજપને 2024ની લોકસભા ચૂંટણી કરતાં આશરે 56 લાખ મત વધુ મળ્યા છે. જ્યારે તૃણમૂલ કોંગ્રેસમાં આશરે 17 લાખ મતનો ઘટાડો થયો છે.

મત શેરના આંકડામાં પણ નોંધપાત્ર ફેરફાર થયો છે. વર્ષ 2024 લોકસભા ચૂંટણીમાં ભાજપનો મત હિસ્સો 38.7 ટકા હતો. જે તાજેતરની વિધાનસભા ચૂંટણીમાં વધીને 45.8 ટકા થયો છે. જ્યારે તૃણમૂલ કોંગ્રેસનો મત હિસ્સો 40.8 ટકામાંથી ઘટીને 36.1 ટકા થઈ ગયો છે.

રાજકીય વિશ્લેષકો માને છે કે, સત્તા વિરોધી ભાવના, ધ્રુવીકરણ અને ભાજપની મજબૂત બૂથ-લેવલ રણનીતિનો પક્ષને નોંધપાત્ર ફાયદો થયો છે.

ચૂંટણીના પરિણામોના ડેટા અનુસાર, તૃણમૂલ કોંગ્રેસે આ વખતે તેના ઘણા ગઢ ગુમાવ્યા છે. 2019, 2021 અને 2024ની ચૂંટણીમાં ટીએમસી જે 124 બેઠકો પર સતત મજબૂત રહી હતી. તેમાંથી આ વખતની ચૂંટણીમાં 78 બેઠકો ગુમાવી છે.

જ્યારે ભાજપે ઘણી નવી બેઠકો છે. પાર્ટીએ એવા વિસ્તારોમાં પગપેસારો કર્યો છે જ્યાં તેને અગાઉની ચૂંટણીઓમાં ક્યારેય મજબૂત માનવામાં આવતું ન હતું. અહેવાલો અનુસાર, ભાજપે એવી 65 બેઠકો જીતી છે. જ્યાં તેની અગાઉ નબળી પકડ હતી. કુલ 294 બેઠકોમાંથી ભાજપે 207 બેઠકો જીતીને સ્પષ્ટ બહુમતી મેળવી છે. જ્યારે 15 વર્ષથી સત્તામાં રહેલી તૃણમૂલ કોંગ્રેસ 80 બેઠકો પર સમેટાઈ ગઈ છે.

મુસ્લિમ મતદારો ધરાવતી બેઠકો પર ચર્ચા

ચૂંટણીના પરિણામ પછી મુસ્લિમ મતોની અસર અંગે ઘણી ચર્ચાઓ શરૂ થઈ છે. અહેવાલો અનુસાર, ભૂતકાળમાં મુસ્લિમ ઉમેદવારોએ નોંધપાત્ર સંખ્યામાં બેઠકો જીતી હતી. જ્યાં મુસ્લિમ ધારાસભ્યો અગાઉ જીતતાં આવ્યા છે. એવું નોંધાયું છે કે, 2011, 2016 અને 2021 માં 39 બેઠકો ઉપર મુસ્લિમ ધારાસભ્યો ચૂંટાતા આવ્યા છે. જ્યાં આ વખતે મુસ્લિમ ઉમેદવારોએ 34 બેઠકો જીતી છે. 40 મુસ્લિમ ધારાસભ્યો ચૂંટાયા હતા. જે 2021 માં લગભગ સમાન છે. TMCમાં લગભગ 42.5 ટકા મુસ્લિમ ધારાસભ્યો જીત્યા છે.

ભાજપની જીતનું સૌથી મોટું કારણ

રાજકીય નિષ્ણાતો કહે છે કે, ભાજપે બૂથ સ્તરે તેનું સંગઠન મજબૂત બનાવ્યું અને ગ્રામીણ વિસ્તારોમાં સતત કામ કર્યું. લોકસભા ચૂંટણીની સરખામણીમાં આ વખતે પાર્ટીને નોંધપાત્ર રીતે વધુ મત મળ્યા.

બીજી તરફ ટીએમસીનો ઘણી બેઠકો પર મત હિસ્સામાં ઘટાડો જોવા મળ્યો છે. અહેવાલ મુજબ, મતદાન થયેલા 293 મતવિસ્તારોમાંથી 268 બેઠકો પર ટીએમસીના મત હિસ્સામાં ઘટાડો થયો છે.

ભાજપે 270 બેઠકો પર પોતાનો મત હિસ્સામાં વધારો કર્યો છે અને 95 બેઠકો પર પાર્ટીના મત હિસ્સામાં 10 ટકાથી વધુનો વધારો થયો છે. તેના કારણે ભાજપ પહેલીવાર બંગાળના રાજકારણમાં એક મુખ્ય શક્તિ તરીકે ઉભરી આવ્યો છે.