મહેસાણાની દૂધસાગર ડેરીમાં ચેરમેને વાઈસ ચેરમેનને લાફો માર્યાનો આક્ષેપ

મહેસાણાની દૂધસાગર ડેરીની નિયામક મંડળની બેઠકમાં ચેરમેને વાઈસ ચેરમેનને લાફો મારી દીધો હોવાનો આક્ષેપ થયો છે. વાઈસ ચેરમેને વાર્ષિક હિસાબોમાં ડેરી ઉપર થયેલાં કરજનો આંકડો ખોટો હોવાનું જણાવતાં ચેરમેને લાફો ઝીંકી દીધો હોવાનો આક્ષેપ કર્યો છે. જ્યારે ચેરમેને તમામ આક્ષેપો પાયાવિહોણા હોવાનું કહીને ફગાવી દીધા છે. જો કે, વાઈસ ચેરમેન બી ડીવીઝન પોલીસ સ્ટેશનમાં અરજી આપતાં સમગ્ર મામલો પોલીસ સ્ટેશનમાં પહોંચ્યો છે. આ ઘટનાની વાત સમગ્ર રાજ્યમાં પ્રસરતાં સહકારી રાજકારણમાં ઉભરો આવ્યો છે. 

મહેસાણાની દૂધસાગર ડેરીની નિયામક મંડળની બેઠક શુક્રવારે મળી હતી. જેમાં વાર્ષિક હિસાબો બાબતે હોબાળો થતાં ચેરમેન અશોક ચૌધરીએ ઉશ્કેરાઈ જઈ વાઇસ ચેરમેન યોગેશ પટેલને લાફો ઝીંકી દીધો હોવાનો આક્ષેપ કરાયો છે. નિયામક મંડળની બેઠક અધવચ્ચે છોડીને યોગેશ પટેલ અને તેમની સાથેના ડિરેક્ટરો મહેસાણા શહેર બી ડિવિઝન પોલીસ સ્ટેશનમાં પહોંચ્યા હતા.

યોગેશ પટેલે ચેરમેન અશોક ચૌધરી સામે ફરિયાદ કરવા માટે અરજી આપી છે. યોગેશ પટેલ સાથે ડિરેકટરો કનુ ચૌધરી અને એલ.કે.પટેલ પણ પોલીસ સ્ટેશનમાં પહોંચતાં દૂધસાગર ડેરીમાં ભાજપના ડિરેક્ટરોના બે જૂથ પડી ગયા છે.

દૂધસાગર ડેરીની મિટિંગમાં ભ્રષ્ટાચાર મુદ્દે સવાલો કરનાર વાઇસ ચેરમેન યોગેશભાઈ પટેલ પર ચેરમેન અશોકભાઈ ચૌધરી અને દિલીપભાઈ ચૌધરી એ હુમલો કરીને મારામારી કરી  સોનાની ચેન અને ચશ્મા તોડી નાંખ્યા. સમગ્ર મામલો હાલ બી.ડિવિઝન પોલીસ સ્ટેશને પહોંચ્યો.

આ મામલે વાઈસ ચેરમેન યોગેશ પટેલે બેનિફિટ ન્યૂઝ સાથે વાત કરતાં જણાવ્યું હતું કે, દૂધસાગર ડેરીની નિયામક મંડળની મિટિંગમાં વાર્ષિક હિસાબો અને મે-2025ની સાગર પત્રિકામાં આપેલી માહિતી મુદ્દે વિસંગતતા હોવાથી ચેરમેન અને એમડીનો જવાબ માગ્યો હતો.

વધુમાં જણાવ્યું કે, પશુપાલકોને ગેરમાર્ગે દોરવાનો પ્રયત્ન કર્યો હોવાથી ચેરમેન અશોકભાઈ ચૌધરીએ જવાબ આપવાના બદલે ઉશ્કેરાઈ ગયા હતા. ઉશ્કેરાઈ જઈને તેમણે મને લાફો ઝીંકી દીધો હતો. જ્યારે દિલીપભાઈ ચૌધરીએ પણ મારા ઉપર હુમલો કર્યો હતો. જેના કારણે મીટીંગમાં હોબાળો થઈ ગયો હતો. ગળામાં પહેરેલી સોનાની ચેઇન અને ચશ્મા પણ તોડી નાખ્યા હતા. દૂધસાગર ડેરીમાં પશુપાલકોને અન્યાય થઈ રહ્યો છે. ચેરમેન પોતાની વાહવાહી કરાવવા ખોટા નિવેદનો આપી તથા પત્રિકાઓ છપાવીને પશુપાલકોને ગેરમાર્ગે દોરી રહ્યા છે.

જ્યારે ડેરીના ચેરમેન અશોક ચૌધરીએ બેનિફિટ ન્યૂઝને જણાવ્યુ કે, યોગેશ પટેલ નિયામક મંડળની બેઠક પહેલાં આવ્યા ત્યારે અન્ય ડિરેક્ટરોને કહેતા હતા કે, આજે મિટીંગમાં બબાલ કરવી છે. તમે લોકો સહી કરતાં નહી. નહિતર જેલમાં જશો. મિટીંગ પહેલાંથી તેઓ હોબાળો કરવાનું નક્કી કરીને આવ્યા હતા. બોર્ડની મિટીંગ દરમિયાન યોગેશ પટેલે સવા કલાક સુધી પ્રશ્નો કર્યા હતા અને મે તેમના તમામ જવાબ આપ્યા હતા. તેમ છતાં તેઓ અપશબ્દો બોલી બેઠક છોડીને જતાં રહ્યા હતા. મિટીંગમાં માત્ર બોલાચાલી થઈ હતી. પરંતુ મે લાફો માર્યો નથી.

વધુમાં તેમણે જણાવ્યું કે, દૂધસાગર ડેરીમાં સત્તા પરિવર્તન થયા બાદ સાડા ચાર વર્ષ દરમિયાન પશુપાલકોને સૌથી વધુ ભાવવધારો આપીને પારદર્શક વહીવટ આપવાનો પ્રયાસ કર્યો છે. દૂધસાગર ડેરીની ચૂંટણીનું વર્ષ હોવાથી મને બદનામ કરવાનો છુપો એજન્ડા લઈને આવ્યા હતા. ત્રણ જિલ્લાની 1200 દૂધ મંડળીના પશુપાલકોને પૂછશો તો અમારા વહીવટની ખબર પડી જશે.

દૂધસાગર ડેરીમાં ભાજપ સમર્થિત અશોક ચૌધરીની પેનલ સાડા ચાર વર્ષથી વહીવટ કરી રહી છે. જેમાં પહેલાં અઢી વર્ષ સમુસૂતરૂ ચાલ્યા બાદ જૂથવાદ શરૂ થતાં ચેરમેન-વાઈસ ચેરમેનની ચૂંટણી વિલંબિત બની હતી. ત્યારપછી ડેરીમાં કબજો કરવા માટે અશોક ચૌધરી અને કનુ ચૌધરીની પેનલ સામ સામે આવી ગઈ છે. આ બબાલમાં યોગેશ પટેલ પોતે પાટીદાર દીકરો હોવાનું કહેતાં મહેસાણા જિલ્લામાં ફરીથી જાતિવાદનું રાજકારણ ગરમાય તેવી શક્યતા છે.