ચૂંટણી ગોટાળાની વાત કરો છો તો લડો છો કેમ? દીપકેનો વિપક્ષને સવાલ

Abhijit Dipke Questions Opposition's Participation in Elections: ચૂંટણી પંચની કામગીરી અને મતદાર યાદીની સ્પેશિયલ ઇન્ટેન્સિવ રિવિઝન એટલે કે SIRને લઈને ચાલી રહેલા વિવાદ વચ્ચે કોકરોચ જનતા પાર્ટી (CJP)ના સ્થાપક અભિજીત દીપકેએ હવે વિપક્ષી પક્ષોને નિશાન બનાવ્યા છે. 25 સપ્ટેમ્બર 2026ના રોજ X પર પોસ્ટ કરીને દીપકેએ સવાલ કર્યો કે જો વિપક્ષ ચૂંટણી પ્રક્રિયામાં ગેરરીતિ અને મતચોરીના આક્ષેપો કરે છે, તો તે જ ચૂંટણીમાં સતત ભાગ કેમ લે છે? દીપકેએ દાવો કર્યો કે ગેરરીતિપૂર્ણ હોવાનો આરોપ લગાવાતી ચૂંટણીમાં ભાગ લેવાનું ચાલુ રાખવાથી વિપક્ષ પોતે જ તે ચૂંટણી પ્રક્રિયાને માન્યતા આપે છે. તેમણે કહ્યું કે જો કોઈ પક્ષને લાગે છે કે ચૂંટણી મુક્ત અને નિષ્પક્ષ નથી, તો તેણે ચૂંટણીમાં ભાગ લેવાને બદલે ચૂંટણી પ્રક્રિયા અંગે પોતાનું સ્પષ્ટ વલણ જાહેર કરવું જોઈએ.

 

For opposition:

Yes, elections are being rigged. But when you continue to participate in rigged elections, you legitimise these elections and help maintain the illusion that they are free and fair.

Maybe you keep contesting because you fear that if you don’t, you will stop…

— Abhijeet Dipke (@abhijeet_dipke) September 25, 2026

 

‘ચૂંટણી ફિક્સ મેચ જેવી બની ગઈ છે’
અભિજીત દીપકેએ ચૂંટણીની સરખામણી ફિક્સ ક્રિકેટ મેચ સાથે કરી. તેમના દાવા મુજબ, ફિક્સ મેચમાં દરેક કેચ છોડવામાં આવતો નથી. કેટલીક વખત મેચને રસાકસીભરી રાખવા માટે કેચ પકડવામાં આવે છે અને મેચને અંતિમ ઓવર સુધી લઈ જવામાં આવે છે. દીપકેએ આ ઉદાહરણ ચૂંટણી સાથે જોડીને દાવો કર્યો કે કેટલીક જગ્યાએ રાજકીય પક્ષોને મળતી જીતથી લોકોને ચૂંટણી પ્રક્રિયા વાસ્તવિક અને સ્પર્ધાત્મક હોવાનો ભાસ થઈ શકે છે. 

‘વિપક્ષ રાજકીય અસ્તિત્વ બચાવવા ચૂંટણી લડે છે?’
દીપકેએ વિપક્ષના રાજકીય અસ્તિત્વ અંગે પણ સવાલ ઉઠાવ્યો. તેમણે કહ્યું કે જો પક્ષો મતચોરી, ચૂંટાયેલા પ્રતિનિધિઓના પક્ષપલટા અને પક્ષોના વિભાજન જેવા મુદ્દાઓ અંગે ગંભીર આક્ષેપો કરી રહ્યા હોય, તો માત્ર ચૂંટણી લડીને રાજકીય અસ્તિત્વ જાળવવાનો પ્રયાસ શા માટે કરવામાં આવે છે? તેમણે કહ્યું કે ચૂંટણીમાં ગેરરીતિનો મુદ્દો કોઈ એક રાજ્ય કે કોઈ એક રાજકીય પક્ષ પૂરતો મર્યાદિત ન હોવો જોઈએ. જો ચૂંટણી પ્રક્રિયા અંગે સવાલ છે, તો તમામ રાજ્યો અને તમામ પક્ષો માટે સમાન ધોરણે આ મુદ્દો ઉઠાવવો જોઈએ.

CEC જ્ઞાનેશ કુમારના રાજીનામાની 48 કલાકની માંગ
આ વિવાદ વચ્ચે કોકરોચ જનતા પાર્ટીએ મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી છે. CJPએ 48 કલાકમાં રાજીનામું નહીં આપવામાં આવે તો દેશવ્યાપી વિરોધ પ્રદર્શન શરૂ કરવાની ચેતવણી આપી છે. પાર્ટીએ ‘જંતર-મંતર 2.0’ જેવા આંદોલનની પણ વાત કરી છે. CJPએ SIRની સ્વતંત્ર તપાસ, SIR પ્રક્રિયા સ્થગિત કરવા અને અગાઉની મતદાર યાદી પુનઃસ્થાપિત કરવા સહિતની માંગણીઓ રજૂ કરી છે.

SIRને લઈને ચૂંટણી પંચમાં શું થયું?
SIR અંગેનો વિવાદ વધુ ગરમાયો ત્યારે The Indian Expressના અહેવાલમાં જણાવાયું કે ચૂંટણી કમિશનર સુખબીર સિંહ સંધૂ અને વિવેક જોશીએ 10 મહિનાના સમયગાળામાં ચૂંટણી પંચના કેટલાક નિર્ણયો અંગે ઓછામાં ઓછા 14 વખત વાંધા નોંધાવ્યા હતા. આ વાંધાઓમાં મતદાર નોંધણી, નામ કાપવાની પ્રક્રિયા, Form 6માં ફેરફાર અને ચૂંટણી ડેટાબેઝ સંબંધિત મુદ્દાઓનો સમાવેશ થતો હોવાનું અહેવાલમાં જણાવાયું છે.

ચૂંટણી પંચે શું કહ્યું?
બીજી તરફ ચૂંટણી પંચે આ અહેવાલ બાદ સ્પષ્ટતા કરી હતી કે SIR સહિત ચૂંટણી પંચના તમામ નિર્ણયો સંપૂર્ણ કમિશનની સર્વસંમતિથી લેવામાં આવ્યા છે. પંચે જણાવ્યું કે ચર્ચા દરમિયાન કમિશનરો દ્વારા પ્રશ્નો, સૂચનો અથવા વાંધા રજૂ કરવા એ નિર્ણય પ્રક્રિયાનો સામાન્ય ભાગ છે અને તેને અંતિમ નિર્ણય સાથે જોડવો યોગ્ય નથી.

UP ચૂંટણી અંગે પણ દીપકેનું નિવેદન
આગામી ઉત્તર પ્રદેશ વિધાનસભા ચૂંટણી અંગે દીપકેએ કહ્યું કે રાજકીય પક્ષો તેમની અપીલ સ્વીકારવી કે નહીં તે અંગે પોતાનો નિર્ણય લઈ શકે છે. તેમણે ચૂંટણી પ્રક્રિયાની વિશ્વસનીયતા અંગે સવાલ ઉઠાવતા વિપક્ષને પોતાનું વલણ સ્પષ્ટ કરવાની અપીલ કરી. હાલમાં ચૂંટણી પંચની SIR પ્રક્રિયા, મતદાર યાદી, CEC જ્ઞાનેશ કુમારની કામગીરી અને ચૂંટણીમાં ગેરરીતિના આક્ષેપોને લઈને રાજકીય ચર્ચા ચાલી રહી છે. એક તરફ CJP ચૂંટણી પંચ સામે આક્ષેપો અને વિરોધની વાત કરી રહ્યું છે, જ્યારે બીજી તરફ ચૂંટણી પંચ SIR સહિતના નિર્ણયો સર્વસંમતિથી લેવાયા હોવાની સ્પષ્ટતા કરી રહ્યું છે. આ બંને દાવાઓ વચ્ચે ચૂંટણી પ્રક્રિયાની પારદર્શિતા અને મતદાર યાદીનો મુદ્દો ચર્ચાના કેન્દ્રમાં છે.