ગોપાલ ઇટાલીયા પર હુમલો બાદ રાજકારણ ગરમાયું

ગુજરાતના રાજકારણમાં એક મોટી ઘટના સામે આવી છે, જેમાં આમ આદમી પાર્ટીના ધારાસભ્ય ગોપાલ ઇટાલીયા પર હુમલો કરવામાં આવ્યો છે. આ હુમલો જામનગરના ટાઉનહોલમાં તેમના ચાલુ ભાષણ દરમિયાન થયો હતો. AAP દ્વારા આ ઘટનાને વખોડી કાઢવામાં આવી છે અને તેને ખેડૂતો, યુવાનો તથા મહિલાઓના મુદ્દે અવાજ ઉઠાવનાર ગોપાલ ઇટાલીયાનો અવાજ દબાવવાનો પ્રયાસ ગણાવ્યો છે. AAP એ આ હુમલા માટે સીધો ભાજપને જવાબદાર ઠેરવ્યો છે.

આમ આદમી પાર્ટીના પ્રદેશ સંગઠન મહામંત્રી મનોજ સોરઠીયાએ આ 'હિચકારા' અને 'હલકી કક્ષાના' કૃત્યની કડક શબ્દોમાં નિંદા કરી હતી. તેમણે ચોંકાવનારો આરોપ લગાવ્યો હતો કે, રાજ્યના ગૃહ મંત્રી હર્ષ સંઘવીએ પોલીસને સાથે રાખીને આ હુમલો કરાવ્યો છે. સોરઠીયાના જણાવ્યા અનુસાર, કેટલાક અસામાજિક તત્વો પોલીસવાળાઓની સાથે સભા સુધી આવ્યા અને તેમની વચ્ચે રહીને પથ્થરમારો કર્યો. તેમણે સ્પષ્ટ સંદેશ આપ્યો કે, ગોપાલ ઇટાલીયા કે આમ આદમી પાર્ટી આવા હુમલાઓથી ડરવાના કે રોકાવાના નથી અને ગુજરાતને 'અત્યાચારમુક્ત' કરવાની લડાઈ ચાલુ રહેશે. AAP પ્રદેશ પ્રમુખ ઈસુદાન ગઢવીએ પણ આ ઘટના પર પોતાની પ્રતિક્રિયા આપી હતી.

જોકે, આ સમગ્ર ઘટનામાં નવો વળાંક ત્યારે આવ્યો જ્યારે AAP રાષ્ટ્રીય સંયોજક અરવિંદ કેજરીવાલે ભાજપની સાથે સાથે કોંગ્રેસ પર પણ આકરા પ્રહાર કર્યા હતા. કેજરીવાલે દાવો કર્યો કે, ગોપાલ ઇટાલીયા પર હુમલો કરનાર વ્યક્તિ કોંગ્રેસનો કાર્યકર્તા છે. તેમણે સવાલ ઉઠાવ્યો કે, જ્યારે AAP ભાજપની નિષ્ફળતા પર સવાલ ઉઠાવે છે, તો કોંગ્રેસને કેમ દુઃખ થાય છે? કેજરીવાલે આ હુમલાને ભાજપ અને કોંગ્રેસની ગુજરાતમાં AAP વિરુદ્ધની એકજૂટતા તરીકે જોયો અને ચેતવણી આપી કે AAPના નેતાઓ ડરતા નથી કે ઝૂકતા નથી. તેમણે કહ્યું કે ગુજરાતની જનતા AAP તરફ વળી રહી છે, જેના કારણે ભાજપ અને કોંગ્રેસમાં ગભરાહટ છે.

આ પણ વાંચો: AAP જનસભામાં ગોપાલ ઇટાલિયા પર જૂતું ફેંકાયું

આ દરમિયાન, જૂતા કાંડ સાથે જોડાયેલી એક માહિતી પણ સામે આવી છે. હુમલો કરનાર વ્યક્તિનું નામ છત્રપાલસિંહ જાડેજા હોવાનું સામે આવ્યું છે, જેણે સ્વીકાર્યું છે કે, તેણે બદલો લેવા માટે ગોપાલ ઈટાલીયા પર હુમલો કર્યો હતો. ઉલ્લેખનીય છે કે, 2017 માં ગોપાલ ઇટાલીયાએ તત્કાલીન ગૃહ રાજ્ય મંત્રી પ્રદીપસિંહ જાડેજા પર જૂતું ફેંક્યું હતું. આ કબૂલાત બાદ જામનગરના જૂતા કાંડમાં કોંગ્રેસ અને AAP આમને-સામને આવી ગયા છે, કારણ કે હુમલો કરનાર વ્યક્તિએ બદલાની ભાવનાથી કૃત્ય કર્યાની કબૂલાત કરી છે, જ્યારે કેજરીવાલે તેને કોંગ્રેસના કાર્યકર્તા તરીકે ઓળખાવ્યો છે. સમગ્ર ઘટનાએ ગુજરાતના રાજકીય માહોલને ગરમાવી દીધો છે.

AAP ધારાસભ્ય ગોપાલ ઇટાલીયા પર કરવામાં આવેલ હુમલા પર ધારાસભ્ય ચૈતર વસાવાની પ્રતિક્રિયા

AAP ધારાસભ્ય ગોપાલ ઇટાલીયા પર થયેલા હુમલા મુદ્દે આમ આદમી પાર્ટીના પ્રદેશ પ્રમુખ ઈસુદાન ગઢવીએ આપી પોતાની પ્રતિક્રિયા

હુમલા બાદ ગોપાલ ઈટાલિયાની પ્રતિક્રિયા

નોંધનીય છે કે, AAP ધારાસભ્ય ગોપાલ ઇટાલીયા પર થયેલા હુમલાને લઈને ગુજરાતનું રાજકારણ ગરમાયું છે, જેમાં AAP નેતાઓ દ્વારા ભાજપ અને કોંગ્રેસ બંને પર આકરા પ્રહારો કરવામાં આવ્યા છે. અને ભાજપ-કોંગ્રેસ અને AAP બધા આમને-સામને આવી ગયા છે.