વિસાવદરની પેટા ચૂંટણી જંગ માટે AAPએ ગોપાલ ઇટાલિયાને મેદાનમાં ઉતાર્યા

સુરેશ વણોલ, અમદાવાદ

વિસાવદર બેઠક પરથી AAPના ધારાસભ્ય તરીકે રાજીનામુ આપ્યા બાદ ભૂપત ભાયાણી ભાજપમાં જોડાઈ જતાં સવા વર્ષથી બેઠક ખાલી પડી છે. તાજેતરમાં ભાજપના હર્ષદ રિબડીયાએ હાઈકોર્ટમાં કરેલી પીટીશન પરત ખેંચતાં પેટા ચૂંટણી યોજાવાની શક્યતા છે. ચૂંટણી પંચે હજુ સુધી તારીખ જાહેર કરી નથી તેવામાં આમ આદમી પાર્ટીએ વિસાવદર બેઠક પર ગોપાલ ઈટાલિયાને ઉમેદવાર જાહેર કરતાં રાજકીય ગરમાવો આવ્યો છે. લેઉવા પાટીદાર સમાજના 50 ટકા મતદારો હોવાથી વિસાવદર બેઠક પર ભાજપ, કોંગ્રેસ અને AAP વચ્ચે કાંટે કી ટક્કર જેવો ચૂંટણી જંગ ખેલાય તેવી સંભાવના છે.

આમ આદમી પાર્ટીના પ્રદેશ સંગઠન મહામંત્રી મનોજ સોરઠીયાએ રવિવારે વિસાવદર બેઠકની પેટા ચૂંટણી માટે AAPના ઉમેદવાર તરીકે નેશનલ જોઈન્ટ સેક્રેટરી ગોપાલ ઈટાલિયા પર પસંદગી ઉતારી હોવાની જાહેરાત કરી છે. વ્યવસાયે વકીલ ગોપાલ ઈટાલિયા ઘણાં વર્ષોથી સક્રિય રાજકારણમાં છે. સોરઠીયાએ જણાવ્યું કે, ગોપાલ ઈટાલિયાનું ગુજરાત વિધાનસભામાં આવવાથી શાસક પક્ષના કેટલાક નેતાઓના પેટમાં ફાળ પડશે. ગોપાલ ઈટાલિયા ભારે બહુમતીથી વિજેતા બનશે તેવી આશા છે.

સવા વર્ષથી વિસાવદર બેઠક ખાલી...

2022ની વિધાનસભાની ચૂંટણીમાં ભાજપના ઉમેદવાર હર્ષદ રિબડિયા અને AAPના ભૂપત ભાયાણી વચ્ચેના ચૂંટણી જંગમાં ભૂપત ભાયાણી વિજેતા બની ધારાસભ્ય બન્યા હતા. ડિસેમ્બર-2023માં તેમણે AAPના ધારાસભ્ય તરીકે રાજીનામુ આપી દીધું હતું. તેથી વિસાવદર બેઠક ખાલી પડી હતી. ધારાસભ્ય પદેથી રાજીનામું આપ્યા બાદ ભૂપત ભાયાણી ભાજપમાં જોડાઈ ગયા છે. 2022ની ચૂંટણીમાં વિસાવદર બેઠક પરથી હારેલા ઉમેદવારોએ ભાયાણીની જીતને ગુજરાત હાઈકોર્ટમાં પડકારી હતી. હરેશ ડોબરિયા, મોહિત માલવિયા અને હર્ષદ રીબડિયાએ હાઈકોર્ટમાં અરજી કરી હતી. જેમાંથી મોહિત માલવિયા અને હર્ષદ રીબડિયાએ અરજી પરત ખેંચી છે. હરેશ ડોબરિયાએ હજી સુધી અરજી પરત ખેંચી નથી. 

ગોપાલ ઈટાલિયાનો પરિચય...

ગોપાલ ઈટાલિયાએ સૌથી પહેલાં પોલીસ-કોન્સ્ટેબલ તરીકે નોકરી શરૂ કરી હતી. અમદાવાદના માધુપુરા પોલીસ સ્ટેશનમાં પોસ્ટિંગ મળ્યું હતુ. ત્યારબાદ રેવન્યુની એક્ઝામ પાસ કરી અમદાવાદ કલેક્ટર ઓફિસમાં ક્લાર્ક બન્યા હતા. ત્યાંથી ઈટાલિયાની બદલી ધંધૂકા સબ રજિસ્ટ્રાર કચેરીમાં રેવન્યુ ક્લાર્ક તરીકે થઈ હતી. 2017ની વિધાનસભાની ચૂંટણીમા ગોપાલ ઈટાલિયાએ ગાંધીનગર સચિવાલયમાં તત્કાલિન ગૃહમંત્રી પ્રદીપસિંહ જાડેજા પર ચપ્પલ ફેક્યું હતુ. ચપ્પલ વાગ્યુ નહોતું પણ ઈટાલિયા સામે કાર્યવાહી કરવામાં આવી હતી. ત્યારબાદ ગોપાલ ઈટાલિયાએ પૂર્વ નાયબ મુખ્યમંત્રી નીતિન પટેલને ફોન કરીને દારૂની હેરાફેરી મામલે તંત્રની કામગીરી મુદ્દે સવાલ ઉઠાવ્યા હતા. ઓડિયો ક્લિપ ગુજરાતમાં વાયરલ થતાં ગોપાલ ઈટાલિયાનું નામ ફરી ચર્ચામાં આવ્યુ હતુ. ત્યારબાદ ગોપાલ ઈટાલિયાએ આમ આદમી પાર્ટી જોઈન કરી હતી. વર્ષ 2022ની વિધાનસભા ચૂંટણી પહેલાં ગોપાલ ઈટાલિયાને આમ આદમી પાર્ટીના અધ્યક્ષ બનાવાયા હતા. વર્ષ 2022ની વિધાનસભા ચૂંટણીમાં AAPને 12.92 ટકા મત સાથે પાંચ બેઠકો મળી હતી. જો કે, વિધાનસભા ચૂંટણી બાદ ગોપાલ ઈટાલિયાને નેશનલ જોઈન્ટ સેક્રેટરી બનાવી ઈસુદાન ગઢવીને પ્રદેશ પ્રમુખ બનાવી દેવામાં આવ્યા હતા. વર્ષ 2022ની વિધાનસભા ચૂંટણીમાં સુરતની કતારગામ બેઠક પર ગોપાલ ઇટાલિયાની હાર થઈ હતી. ભાજપના વિનુ મોરડિયા સામે ગોપાલ ઈટાલિયાની 64,629 મતે હાર થઈ હતી. આ ચૂંટણીમાં વિનુ  મોરડિયાને 1,20,342 મત મળ્યાં હતા. જ્યારે ઇટાલિયાને 55,713 મત મળ્યાં હતા. 

લેઉવા પાટીદાર સમાજના મતદારો નિર્ણાયક...

જૂનાગઢ જિલ્લાની વિસાવદર વિધાનસભા બેઠક પર હંમેશા લેઉવા પાટીદાર ધારાસભ્ય ચૂંટાય છે. કુલ 2.70 લાખથી વધુ મતદારો છે. જેમાંથી 50 ટકા લેઉવા પટેલ મતદારોનો સમાવેશ થાય છે. વિસાવદર, ભેંસાણ અને જૂનાગઢ તાલુકાનાં 170થી વધુ ગામોનો વિસાવદર બેઠકમાં સમાવેશ થાય છે. આ બેઠક પર છેલ્લાં એક દાયકા દરમિયાન પૂર્વ મુખ્યમંત્રી કેશુભાઈ પટેલ, હર્ષદ રીબડિયા અને ભૂપત ભાયાણી મળીને 3 ધારાસભ્યોએ ચાલુ ટર્મ દરમિયાન રાજીનામા આપ્યા છે.