દિવાળીના દિવસે રાષ્ટ્રિય એકતા દિવસનો અદ્ભુત સંયોગ

        વડાપ્રધાન મોદી દિવાળીના પાવન પર્વનાં દિવસે ગુજરાતની મુલાકાતે છે. પીએમ મોદી સરદાર પટેલની જન્મજયંતિ નિમિત્તે કેવડિયાની મુલાકાતે છે. આ દરમિયાન તેમણે સરદાર પટેલની પ્રતિમાને પુષ્પાંજલિ અર્પણ કરી હતી. જે બાદ તેઓએ યુનિટી પરેડમાં હાજરી આપી વડાપ્રધાન મોદીએ સંબોધન કર્યું હતુ.PM મોદીએ કહ્યું કે “આજે સમગ્ર દેશ ખુશ છે કે, આઝાદીના સાત દાયકા પછી એક દેશ અને એક બંધારણનો સંકલ્પ પૂર્ણ થયો છે.”   વડાપ્રધાન મોદીએ દેશના નાગરિકોને દિવાળીની શુભેચ્છા આપી,કહ્યું દિવાળી સમગ્ર દેશને દીવાઓ દ્વારા જોડે છે અને સમગ્ર દેશને પ્રકાશિત કરે છે. હવે દિવાળીનો તહેવાર ભારતને વિશ્વ સાથે જોડી રહ્યો છે. ઘણા દેશોમાં તેને રાષ્ટ્રીય તહેવાર તરીકે ઉજવવામાં આવે છે. હું દેશ અને દુનિયામાં રહેતા તમામ ભારતીયોને દિવાળીની ખૂબ ખૂબ શુભેચ્છા પાઠવું છું. હું ‘રાષ્ટ્રીય એકતા દિવસ’ પર તમામ દેશવાસીઓને અભિનંદન આપું છું. આ વખતે રાષ્ટ્રીય એકતા દિવસ એક અદ્ભુત સંયોગ લઈને આવ્યો છે. આજે એક તરફ આપણે એકતાનો તહેવાર મનાવી રહ્યા છીએ તો બીજી તરફ દિવાળીનો પવિત્ર તહેવાર છે.   પીએમ મોદીએ સરદાર પટેલ અંગે જણાવતા કહ્યુ કે, આજથી સરદાર પટેલની 150મી જન્મજયંતિ શરૂ થઈ રહી છે. દેશ આગામી બે વર્ષ સુધી સરદાર પટેલની 150મી જન્મજયંતિની ઉજવણી કરશે. ભારત પ્રત્યેના તેમના અસાધારણ યોગદાન માટે દેશની તેમને શ્રદ્ધાંજલિ છે.   આ સાથે પીએમ મોદીએ સંબોધનમાં જણાવ્યુ છે કે, “આજે સમગ્ર દેશ ખુશ છે કે આઝાદીના સાત દાયકા પછી એક દેશ અને એક બંધારણનો સંકલ્પ પૂર્ણ થયો છે. સરદાર સાહેબને મારી આ સૌથી મોટી શ્રદ્ધાંજલિ છે. આ સાથે તેમણે જણાવ્યુ છે કે, બાબા સાહેબ આંબેડકરનું બંધારણ 70 વર્ષ સુધી સમગ્ર દેશમાં લાગુ થયું ન હતું. બંધારણની માળા જપનારાઓએ બંધારણનું ઘોર અપમાન કર્યું છે.”   પીએમ મોદીએ વધુમાં જણાવ્યુ છે કે, વિકાસ અને વિશ્વાસની એકતા જ શ્રેષ્ઠ ભારતના નિર્માણને પ્રોત્સાહન આપે છે. દરેક યોજના, નીતિ અને ઈરાદામાં એકતા એ આપણી પ્રાણશક્તિ છે. આ જોઈને સરદાર સાહેબનો આત્મા જ્યાં પણ છે, તે આપણને આશીર્વાદ આપતો જ હશે.