ભાજપના નેતાના એક ટ્વીટથી ગુજરાત પોલીસ સામે સવાલો

અમરેલી ભાજપના નેતા ડો.ભરત કાનાબારના એક ટ્વીટે ભાજપમાં ખળભળાટ મચાવ્યો છે. હાલ ગુજરાતમાં પોલીસ અને વહિવટીતંત્ર દ્વારા રાજ્યભરના અમાજીક તત્વોના ગેરકાયદેસરના બાંધકામો ઉપર બુલડોઝર ફેરવાઇ રહ્યા છે ત્યારે ડો.ભરત કાનાબારે બુલડોઝર જસ્ટિસને જસ્ટિસ ગણાવ્યો નથી અને અસામાજીક તત્વોના પરિવારોને બેઘર કરવાની વૃત્તી પર પ્રહાર કર્યા છે.

ડો.કાનાબારે ટ્વીટમાં લખ્યું છે કે  બુલડોઝર જસ્ટિસ ઇઝ નો જસ્ટિસ ! અસામાજિક તત્વોના ઘરો પર બુલડોઝર ચલાવી તેના પરિવારોને બેઘર કરવાની વૃત્તિને પરોક્ષ સમર્થન આપનારા આપણે સૌ આપણા ઘરની બારીનો એક કાચ તૂટે તો પણ હલબલી જઈએ છીએ !! ચોમાસામાં છત પરથી ક્યાંક થોડું અમથું પાણી ચુવે તો જેમની ઊંઘ હરામ થઇ જાય છે તેવા આપણે સૌ કોઈ ગરીબના ઘર પર છત જ ના રહે તે જોયા પછી પણ નિરાંતે ઊંઘી શકીએ છીએ. પરપીડનનો આ પિશાચી આનંદ લેતા પહેલા આપણે સૌ આપણી જાતને કેટલાક સવાલો પૂછીએ. પરિવારની કોઈ વ્યક્તિ ગુનેગાર હોય તે માટે તેના સમગ્ર પરિવારને બેઘર કરી દેવાની સજા કઈ રીતે વ્યાજબી ગણાય ? મકાન કદાચ ગેરકાયદેસર રીતે સરકારી જમીનમાં ઉભું હોય તો પણ તેને હટાવતા પહેલા નિયમાનુસાર પુરી પ્રોસિજર કરવી ના જોઈએ ?

 

 

 

 ડો. કાનાબાર અમરેલી જિલ્લા ભાજપના પૂર્વ પ્રમુખ છે અને પ્રદેશ નેતા પણ છે. તેમણે કરેલા આ ટ્વીટથી ભાજપમાં ખળભળાટ મચી ગયો છે. ઉલ્લેખનિય છે કે ઉત્તર પ્રદેશ અને ગુજરાત સહિત તમામ ભાજપ શાસિત રાજ્યોમાં અસામાજીક તત્વોના મકાનો પર બુલડોઝર ફેરવી દેવામાં આવી રહ્યા છે. તાજેતરમાં જ ગુજરાત પોલીસે કરેલી કાર્યવાહીમાં ગુજરાત ભરના ઘણા અસામાજીક તત્વોના ગેરકાયદેસરના મકાનો અને ઓફિસો તોડી પડાઇ હતી. ડો.કાનાબારનું આ ટ્વીટ સૂચક છે.