સ્થાનિક સ્વરાજની ચૂંટણીમાં 25 ટકા સંવેદનશીલ અને અતિસંવેદનશીલ મથકો

આવતીકાલે સ્થાનિક સ્વરાજની ચૂંટણી અંતર્ગત સવારે 7 થી સાંજના 6 વાગ્યા સુધી મતદાન થશે. આ મતદાન માટે રાજ્યમાં કુલ 4033 મતદાન મથકોમાંથી 836 સંવેદનશીલ અને 154 અતિસંવેદનશીલ મતદાન મથકો જાહેર કરવામાં આવ્યા છે. એટલે કે કુલ મતદાન મથકોમાંથી 25 ટકા મતદાન મથકો સંવેદનશીલ જાહેર કરાયા છે.

જૂનાગઢ મહાનગરપાલિકા, 66 નગરપાલિકા, 3 તાલુકા પંચાયતની સામાન્ય ચૂંટણી તેમજ બોટાદ અને વાંકાનેર નગરપાલિકાની મધ્યસત્ર ચૂંટણી માટે મતદાન થશે. જ્યારે મનપાની 3, જિલ્લા પંચાયતની 8 અને તાલુકા પંચાયતની 76 બેઠકો માટે રવિવારે મતદાન થશે. જેમાં 5085 ઉમેદવારો મેદાનમાં છે.

જૂનાગઢ મહાનગરપાલિકાના 15 વોર્ડની 60 બેઠકોની સામાન્ય ચૂંટણી અંતર્ગત વોર્ડ નંબર-3 અને 14ની 8 બેઠકો બિનહરીફ થતાં 52 બેઠકો માટે 157 ઉમેદવારો મેદાનમાં છે. અમદાવાદ મહાનગરપાલિકાના વોર્ડ નં.7, ભાવનગર મહાનગરપાલિકાના વોર્ડ નં.3, અને સુરત મહાનગરપાલિકાના વોર્ડ નં.18 ની પેટા ચૂંટણી અંતર્ગત 3 બેઠકો માટે 17 ઉમેદવારો મેદાનમાં છે.

66 નગરપાલિકાઓની સામાન્ય ચૂંટણીના 461 વોર્ડમાંથી 24 વોર્ડ બિનહરીફ થયા છે. કુલ 1844 બેઠકો પૈકી 167 બેઠકો બિનહરીફ થઈ છે. જ્યારે 1677 બેઠકો પર કુલ 4374 ઉમેદવારો મેદાનમાં છે. બોટાદ અને વાંકાનેર નગરપાલિકાની મધ્યસત્ર ચૂંટણીના 18 વોર્ડ પૈકી 4 વોર્ડ બિનહરીફ થયા છે. કુલ 72 બેઠકો પૈકી 23 બેઠકો બિનહરીફ થતાં 49 બેઠકો પર 101 ઉમેદવારો મેદાનમાં છે.

નગરપાલિકાની પેટાચૂંટણીમાં 21 બેઠકો પૈકી મોરબી જિલ્લાની માળિયા મિયાણા નગરપાલિકાના વોર્ડ નં.2 તથા 5 ની બેઠક બિનહરીફ થઈ છે. તેથી 19 બેઠકો પર 45 ઉમેદવારો મતદાન થશે. જિલ્લા પંચાયતની પેટાચૂંટણી અંતર્ગત 9 બેઠકો પૈકી પંચમહાલ જિલ્લાની શિવરાજપુર બેઠત બિનહરીફ થતાં 8 બેઠકો પર 22 ઉમેદવારો માટે મતદાન થશે.  

ગાંધીનગર, કઠલાલ તથા કપડવંજ તાલુકા પંચાયતની સામાન્ય ચૂંટણી અંતર્ગત 78 બેઠકોમાં માટે 178 ઉમેદવારો મેદાનમાં છે. જ્યારે તાલુકા પંચાયતની પેટાચૂંટણી અંતર્ગત 91 બેઠકો પૈકી 12 બેઠકો બિનહરીફ થઈ છે. હારીજ તાલુકા પંચાયતની સાંકરા, બગસરા તાલુકા પંચાયતની વાઘણીયા જૂના પર ઉમેદવારી પત્રો ભરાયેલ ન હોય તેમજ બાબરા તાલુકા પંચાયતની કરીયાણા બેઠક પર 1 ઉમેદવારી પત્ર રજૂ થતાં ચૂંટણી રદ થઈ હતી. આ સિવાય બાકીની 76 બેઠકો પર 190 ઉમેદવારો મેદાનમાં છે.