અફઘાનિસ્તાનમાં લાકડાનો પુલ તૂટ્યો,8 મુસાફરોના મોત

અફઘાનિસ્તાનના ઉરુઝગાન પ્રાંતમાં લાકડાના પુલ પરથી મુસાફરોને લઈ જતું એક વાહન નદીમાં પડી ગયું, જેમાં ઓછામાં ઓછા આઠ મુસાફરોના મોત થયા હતા જે અંગે સોમવારે પ્રાંત અધિકારીઓએ માહિતી આપી હતી..   આગા વલી કુરેશીએ જણાવ્યું હતું કે, આ અકસ્માત સોમવારે સ્થાનિક સમય અનુસાર સવારે 3 વાગ્યે થયો હતો જ્યારે પ્રાંતના ગેઝાબ જિલ્લાની બહારના ભાગમાં ભારે વજનને કારણે લાકડાનો પુલ તૂટી પડ્યો હતો.   ખાનગી ન્યૂઝ એજન્સીના જણાવ્યા અનુસાર, બ્રિજની જર્જરિત હાલત, ઓવરલોડિંગ અને બેદરકારીપૂર્વક ડ્રાઇવિંગ આ જીવલેણ અકસ્માતનું મુખ્ય કારણ છે. પર્વતીય મધ્ય એશિયાઈ દેશમાં માર્ગ અકસ્માતો સામાન્ય છે, જે ઘણીવાર નબળા ડ્રાઇવિંગ, ભીડવાળા રસ્તાઓ પર મુસાફરો માટે સલામતીના પગલાંનો અભાવ, પડકારરૂપ ભૂપ્રદેશ અને જૂના વાહનોને કારણે થાય છે.   આ પહેલા પણ 5 ઓક્ટોબર 2024ના રોજ અફઘાનિસ્તાનના નુરિસ્તાન પ્રાંતમાં એક કાર ખાડામાં પડી હતી. જેમાં મહિલાઓ અને બાળકો સહિત ઓછામાં ઓછા સાત લોકો માર્યા ગયા હતા. આ ઘટના પ્રાંતના દોઆબ જિલ્લામાં બની હતી જ્યારે એક કાર રસ્તા પરથી લપસીને ખાડામાં પડી હતી, જેમાં સાત મુસાફરોના ઘટનાસ્થળે જ મોત થયા હતા અને અન્ય આઠ ઘાયલ થયા હતા.