અમેરિકાના ટેક્સાસ રાજ્યમાં ટેરન્ટ કાઉન્ટી સ્થિત હિક્સ એરફિલ્ડ નજીક રવિવારે બપોરે લગભગ 1:30 વાગ્યે એક નાનું વિમાન ક્રેશ થવાની ઘટના બની. ફોર્ટ વર્થ ફાયર ડિપાર્ટમેન્ટ દ્વારા આ દુર્ઘટનાની પુષ્ટિ કરવામાં આવી છે, જેમાં વિમાનમાં સવાર 2 વ્યક્તિના મોત થયા છે. આ ઘટના ડલાસ-ફોર્ટ ઇન્ટરનેશનલ એરપોર્ટની નજીક, ફોર્ટ વર્થ એલાયન્સ એરપોર્ટ અને ફોર્ટ વર્થ મીચમ એરપોર્ટની વચ્ચે આવેલા ખાનગી હિક્સ એરફિલ્ડ પાસે બની હતી. સ્થાનિક મીડિયા અનુસાર, ક્રેશ થયેલું આ વિમાન સિરસ એસઆર-22 (Cirrus SR-22) હોવાનું માનવામાં આવે છે, જોકે વિમાને ક્યાંથી ઉડાન ભરી હતી અને ક્યાં જઈ રહ્યું હતું તે અંગેની સત્તાવાર માહિતી હજી સુધી જાહેર કરાઈ નથી.
વિમાન અને ટ્રકો વચ્ચેની અથડામણને કારણે આગ
આ દુર્ઘટનાની વિગતો મુજબ, ક્રેશ થયા બાદ આ નાનું વિમાન નોર્થ સેગિનો બુલવર્ડ પર આવેલા એક પાર્કિંગ લોટમાં પાર્ક કરેલા અઢાર-વ્હીલર ટ્રકો અને ટ્રેલરો પર પડ્યું હતું. વિમાન અને ટ્રકો વચ્ચેની આ જોરદાર અથડામણને કારણે તુરંત જ ભીષણ આગ ફાટી નીકળી હતી, અને ધુમાડાના ગોટેગોટા આકાશમાં દૂર સુધી જોવા મળ્યા હતા. અહેવાલો મુજબ, આગની લપેટમાં નજીકનું એક કોમર્શિયલ બિલ્ડિંગ પણ આવી ગયું હતું, જેના કારણે નુકસાનનું પ્રમાણ વધ્યું હતું. ફોર્ટ વર્થ ફાયર વિભાગે જણાવ્યું હતું કે, ઘટનાની જાણ થતાં જ ઇમરજન્સી ક્રૂ તાત્કાલિક સ્થળ પર પહોંચી ગયા હતા અને ઝડપથી કાર્યવાહી કરીને આગને નિયંત્રણમાં લેવામાં આવી હતી.
આ પણ વાંચો: <a href="https://www.benefitnews24.com/gujarati/international/bangladesh-air-force-jet-crashes-into-dhaka-school-building-one-dead-several-injured/16731" target="_blank" rel="noopener">બાંગ્લાદેશ એરફોર્સ વિમાન સ્કૂલ બિલ્ડિંગમાં ક્રેશ</a>
વિમાન ક્રેશના કારણની તપાસ શરૂ
આ દુર્ઘટનામાં વિમાનમાં સવાર 2 વ્યક્તિના મોતની પુષ્ટિ થઈ છે, પરંતુ તેમની ઓળખ હજી સુધી જાહેર કરવામાં આવી નથી. સદભાગ્યે, જમીન પર પાર્કિંગ લોટમાં કે નજીકમાં અન્ય કોઈ વ્યક્તિને ઈજા કે જાનહાનિ થઈ નથી. આ ઘટનાની ગંભીરતાને ધ્યાનમાં લઈને ફેડરલ એવિએશન એડમિનિસ્ટ્રેશન અને નેશનલ ટ્રાન્સપોર્ટેશન સેફ્ટી બોર્ડને જાણ કરવામાં આવી છે. બન્ને મુખ્ય એજન્સીઓ દ્વારા આ વિમાન ક્રેશના ચોક્કસ કારણની તપાસ શરૂ કરવામાં આવશે, જેથી ભવિષ્યમાં આવી દુર્ઘટનાઓ ટાળી શકાય.

વિમાન પાર્ક કરેલી ટ્રકો પર પડ્યું

ટેક્સાસમાં હિંક્સ એરફિલ્ડ નજીક સિરસ SR-22નું એક વિમાન ક્રેશ થઈને પાર્કિંગ લોટમાં પડ્યું

October 13, 2025 | 16:31 IST