અજાણ્યા બંદૂકધારી..2 વર્ષમાં 16 આતંકીઓ ઠાર, પાકિસ્તાનમાં ફફડાટ

 

લશ્કર-એ-તૈયબાના મુખ્ય આતંકવાદી રાજુલ્લાહ નિઝામાની ઉર્ફે અબુ સૈફુલ્લાહ, પાકિસ્તાનના સિંધમાં માર્યો ગયો છે. ૨૦૦૬માં નાગપુરમાં રાષ્ટ્રીય સ્વયંસેવક સંઘના મુખ્યાલય પર થયેલા હુમલામાં સંડોવાયેલા સૈફુલ્લાહની અજાણ્યા હુમલાખોરોએ ગોળી મારીને હત્યા કરી દીધી હતી. સૂત્રોએ જણાવ્યું હતું કે તે નેપાળમાં લશ્કર મોડ્યુલ પર કામ કરી રહ્યો હતો - જે ફાઇનાન્સિંગ, ભરતી અને લોજિસ્ટિક્સનું સંચાલન કરતો હતો. સૈફુલ્લાહ આતંકવાદીઓને ભારતમાં ઘૂસણખોરી કરવામાં અને ભંડોળ એકત્ર કરવામાં મદદ કરી રહ્યો હતો.

ખાસ વાત એ છે કે છેલ્લા બે વર્ષમાં પાકિસ્તાનમાં આ રીતે 16 આતંકવાદીઓને ઠાર મારવામાં આવ્યા છે. આ બધા આતંકવાદીઓની હત્યા કરવાની રીત લગભગ સમાન છે. બધા આતંકવાદીઓને માર્યા પછી, એ વાત સામે આવી કે તેમને અજાણ્યા હુમલાખોરોએ ગોળી મારી હતી. 

(1) અબુ સૈફુલ્લાહ

લશ્કર-એ-તૈયબાનો એક મુખ્ય આતંકવાદી જે નેપાળમાં લશ્કર મોડ્યુલ પર કામ કરતો હતો. સૈફુલ્લાહ લશ્કરના ઓપરેશનલ કમાન્ડર આઝમ ચીમા ઉર્ફે બાબાજીનો સહયોગી હતો. RSS મુખ્યાલય પરના હુમલા ઉપરાંત, તે 2002 માં રામપુરમાં CRPF કેમ્પ પરના આતંકવાદી હુમલા અને 2005 માં IISc બેંગ્લોર પરના હુમલાના કાવતરામાં પણ સામેલ હતો. સૈફુલ્લાહને બદીન જિલ્લા (સિંધ, પાકિસ્તાન) માં જ્યારે તે પોતાના ઘરની બહાર નીકળ્યો ત્યારે ગોળી મારીને હત્યા કરવામાં આવી હોવાનું કહેવાય છે.

2- નદીમ ઉર્ફે અબુ કતલ

અબુ કતલ 26/11 મુંબઈ હુમલાના માસ્ટરમાઇન્ડ હાફિઝ સઈદનો સંબંધી અને લશ્કર-એ-તૈયબાનો આતંકવાદી હતો. અબુ કતલ છેલ્લા બે દાયકાથી જમ્મુ અને કાશ્મીરમાં મોટા આતંકવાદી હુમલાઓ અને ઘૂસણખોરીને અંજામ આપવામાં મહત્વપૂર્ણ ભૂમિકા ભજવી રહ્યો છે. પૂંછ જિલ્લામાં સૈન્ય કાફલાથી લઈને રાજૌરી ગામોમાં હિન્દુઓ પરના હુમલાઓ સુધી, બધું જ અબુ કતલના ઈશારે કરવામાં આવ્યું હતું. અબુ કતલ આતંકવાદીઓને જમ્મુ અને કાશ્મીર મોકલતા પહેલા તાલીમ આપતો હતો જેથી તેઓ તેમના નાપાક આયોજનોમાં સફળ થઈ શકે.  માર્ચ 2025 માં પાકિસ્તાનના ઝેલમના દિનામાં અજાણ્યા બંદૂકધારીઓ દ્વારા અબુ કતલને ગોળી મારી દેવામાં આવી હતી, જેમાં તેનું મૃત્યુ થયું હતું. આ હુમલામાં તેમના ડ્રાઇવરનું પણ મોત થયું હતું.

૩- મૌલાના કાશિફ અલી

મૌલાના કાશિફ અલી આતંકવાદી જૂથ લશ્કર-એ-તૈયબા (LeT) ના રાજકીય પાંખનો વડો હતો. અલી લશ્કરમાં એક અગ્રણી વ્યક્તિ હતો, જેણે તેની રાજકીય પાંખ, પાકિસ્તાન મરકઝી મુસ્લિમ લીગનું નેતૃત્વ કર્યું હતું. અલી, જે ભારતના મોસ્ટ વોન્ટેડ આતંકવાદી હાફિઝ સઈદનો સાળો પણ હતો, તે પાકિસ્તાનમાં લશ્કરની રાજકીય પ્રવૃત્તિઓમાં મુખ્ય ખેલાડી હતો. ફેબ્રુઆરી 2025 માં ખૈબર પખ્તુનખ્વા પ્રાંતમાં અજાણ્યા બંદૂકધારીઓએ મૌલાનાના નિવાસસ્થાન પર હુમલો કર્યો ત્યારે તેની હત્યા કરવામાં આવી હતી.

4- મુફ્તી શાહ મીર

મુફ્તી શાહ મીર એક કુખ્યાત માનવ અને શસ્ત્ર તસ્કર હતો જે ધાર્મિક વિદ્વાન હોવાના આડમાં કામ કરતો હતો અને ઇસ્લામિક કટ્ટરપંથી રાજકીય પક્ષ જમિયત ઉલેમા-એ-ઇસ્લામનો સભ્ય હતો. મુફ્તી શાહ મીર જ હતો જેણે ઈરાનથી ભારતીય ઉદ્યોગપતિ અને ભૂતપૂર્વ ભારતીય નૌકાદળ અધિકારી કુલભૂષણ યાદવનું અપહરણ કરવામાં પાકિસ્તાનને મદદ કરી હતી. માર્ચ 2025 માં, બલુચિસ્તાનના તુર્બતમાં બાઇક પર સવાર હુમલાખોરોએ મીર પર હુમલો કરીને તેની હત્યા કરી દીધી હતી. તે સમયે મુફ્તી શાહ મીર તરાવીહ (રાત્રિ) ની નમાઝ પછી સ્થાનિક મસ્જિદમાંથી બહાર આવી રહ્યો હતો.

5- રહીમુલ્લાહ તારિક

મૌલાના રહીમુલ્લાહ તારિક જૈશ-એ-મોહમ્મદના વડા મૌલાના મસૂદ અઝહરનો નજીકનો સાથી હતો. તેને મસૂદ અઝહરનો જમણો હાથ માનવામાં આવતો હતો. જૈશ-એ-મોહમ્મદ પાકિસ્તાન સ્થિત એક આતંકવાદી સંગઠન છે જેણે 2001માં સંસદ પર હુમલો અને 2019માં પુલવામા હુમલો કર્યો હતો. નવેમ્બર 2023 માં, આ મોસ્ટ વોન્ટેડ આતંકવાદી કરાચીમાં એક ધાર્મિક મેળાવડામાં જઈ રહ્યો હતો ત્યારે અજાણ્યા હુમલાખોરોએ તેની ગોળી મારીને હત્યા કરી દીધી.

6- અકરમ ગાઝી

2018 થી 2020 સુધી લશ્કર ભરતી સેલનું નેતૃત્વ કરનાર અકરમ ગાઝી પાકિસ્તાનમાં ભારત વિરોધી ભાષણો આપવા માટે જાણીતો હતો. તે લશ્કરમાં એક મોટું નામ હતું અને લાંબા સમયથી ઉગ્રવાદી પ્રવૃત્તિઓમાં સામેલ હતો. અકરમ ગાઝીની બાજૌર જિલ્લામાં (ખૈબર પખ્તુનખ્વા પ્રાંતમાં) અજાણ્યા હુમલાખોરોએ ગોળી મારીને હત્યા કરી દીધી.

7- ખ્વાજા શાહિદ

 ખ્વાજા શાહિદ લશ્કર-એ-તૈયબાનો કમાન્ડર હતો અને ફેબ્રુઆરી 2018 માં જમ્મુમાં સુંજવાન આર્મી કેમ્પ પર થયેલા આતંકવાદી હુમલા પાછળના માસ્ટરમાઇન્ડ્સમાંનો એક હતો. નવેમ્બર 2023 માં, શાહિદનું પહેલા અપહરણ કરવામાં આવ્યું હતું અને પછી તેનો શિરચ્છેદ કરાયેલ મૃતદેહ પાકિસ્તાન અધિકૃત કાશ્મીરમાં નિયંત્રણ રેખા (LOC) નજીક મળી આવ્યો હતો.

8- મૌલાના ઝિયા-ઉર-રહેમાન

લશ્કર-એ-તૈયબા (LeT)નો બીજો એક કાર્યકર્તા, જે કરાચીના ગુલિસ્તાન-એ-જૌહરમાં મૌલવી તરીકે પણ સેવા આપતો હતો, તે યુવાનોને શસ્ત્રો ઉપાડવા અને ભારત વિરુદ્ધ જેહાદ કરવા માટે કટ્ટરપંથી બનાવવામાં સામેલ હતો. સપ્ટેમ્બર 2023 માં, કરાચામાં જ મોટરસાઇકલ પર આવેલા બે અજાણ્યા હુમલાખોરોએ તેમની ગોળી મારીને હત્યા કરી દીધી હતી.

9 -કારી એજાઝ આબિદ

એપ્રિલ 2025 માં ખૈબર જિલ્લાની સરહદે આવેલા પુશ્ત ખારા વિસ્તારમાં અહલે-એ-સુન્નત વાલ જમાતના નેતા અને આંતરરાષ્ટ્રીય ખત્મ-એ-નબુવ્વત ચળવળના વડા કારી ઇજાઝ આબિદ પર હુમલો કરવામાં આવ્યો હતો. ઘટનાસ્થળેથી ૩૦ બોરના હથિયારોના અનેક ખાલી ખોખા મળી આવ્યા હતા. હોસ્પિટલમાં સારવાર દરમિયાન તેમનું મોત નીપજ્યું હતું. તે મસૂદ અઝહરનો નજીક હતો.

10- દાઉદ મલિક

દાઉદ મલિકને મસૂદ અઝહરનો નજીકનો સાથી માનવામાં આવતો હતો અને તે લશ્કર-એ-જબ્બારનો સ્થાપક હતો. પાકિસ્તાન પોલીસના જણાવ્યા અનુસાર, ઓક્ટોબર 2023 માં ઉત્તર વઝીરિસ્તાન આદિવાસી જિલ્લાના મિરાલી વિસ્તારમાં અજાણ્યા માસ્ક પહેરેલા માણસો દ્વારા તેમના પર હુમલો કરીને હત્યા કરવામાં આવી હતી.

11- અદનાન અહેમદ

અદનાન અહેમદને હંઝાલા અદનાન તરીકે પણ ઓળખવામાં આવે છે. તે 2016 માં પંપોરમાં CRPF કાફલા પર થયેલા હુમલાનો માસ્ટરમાઇન્ડ હતો. 3 ડિસેમ્બર 2023 ના રોજ કરાચીમાં અજાણ્યા બંદૂકધારીઓ દ્વારા તેના પર હુમલો કરવામાં આવ્યો હતો. તેને ગુપ્ત રીતે પાકિસ્તાની સેના દ્વારા સંચાલિત હોસ્પિટલમાં દાખલ કરવામાં આવ્યો હતો, જ્યાં 5 ડિસેમ્બર 2023 ના રોજ તેનું મૃત્યુ થયું. તે ઉધમપુરમાં હુમલાનું કાવતરું ઘડવા અને POK માં લશ્કરના આતંકવાદી કેમ્પમાં નવા ભરતી થયેલા છોકરાઓને તાલીમ આપવામાં પણ સામેલ હતો.

12- બશીર અહમદ પીર

બશીર અહેમદ પીર હિઝબુલ મુજાહિદ્દીનનો ટોચનો કમાન્ડર હતો. તેમનું બીજું નામ ઇમ્તિયાઝ આલમ હતું અને 20 ફેબ્રુઆરી 2023 ના રોજ, પાકિસ્તાનના રાવલપિંડીમાં અજાણ્યા હુમલાખોરો દ્વારા તેમની ગોળી મારીને હત્યા કરવામાં આવી હતી. જમ્મુ અને કાશ્મીરના કુપવાડા જિલ્લાના રહેવાસી પીર, 15 વર્ષથી વધુ સમયથી પાકિસ્તાનમાં રહેતા હોવાનું કહેવાય છે. તે પાકિસ્તાનમાં હિઝબુલનો "લોન્ચિંગ ચીફ" હતો અને તેણે ઘુસણખોરોની ભરતી કરવામાં અને કાશ્મીર ખીણમાં શસ્ત્રો અને દારૂગોળો મોકલવામાં મુખ્ય ભૂમિકા ભજવી હતી.

13- ઝહૂર ઇબ્રાહિમ

તેમનું પૂરું નામ મિસ્ત્રી ઝહૂર ઇબ્રાહિમ હતું. તે જૈશ-એ-મોહમ્મદનો આતંકવાદી હતો. તે ૧૯૯૯માં ઇન્ડિયન એરલાઇન્સની ફ્લાઇટ IC-૮૧૪ના હાઇજેકમાં અને મુસાફર રુપિન કાત્યાલની છરીના ઘા મારીને હત્યા કરવામાં સામેલ હતો. માર્ચ 2022 માં, બે સશસ્ત્ર મોટરસાયકલ સવારો, જેઓ મિસ્ત્રીના ફર્નિચરના ગોદામમાં પ્રવેશવાની રાહ જોઈ રહ્ય હત, તેમણે તેમને નજીકથી ગોળી મારી દીધી.

14- મેજર ડેનિયલ

મેજર દાનિયલ પાકિસ્તાન આર્મી સાથે સંકળાયેલા ISPR ના અધિકારી હતો. ઓગસ્ટ 2016 માં જમ્મુ અને કાશ્મીરના બારામુલ્લામાં ભારતીય સૈન્ય કાફલા પર થયેલા હુમલાનો માસ્ટરમાઇન્ડ હોવાનો આરોપ તેના પર હતો. માર્ચ 2025 માં જ, પેશાવરમાં અજાણ્યા હુમલાખોરો દ્વારા તેની ગોળી મારીને હત્યા કરવામાં આવી હતી.

15- રિયાઝ અહેમદ

રિયાઝ અહેમદ લશ્કરનો ટોચનો આતંકવાદી હતો. ૧ જાન્યુઆરી, ૨૦૨૩ના રોજ રાજૌરીમાં થયેલા ધાંગ્રી આતંકવાદી હુમલા પાછળ તે મુખ્ય માસ્ટરમાઇન્ડ્સમાંનો એક હતો. રિયાઝ અહમદ પીઓકેના રાવલકોટમાં નમાજ અદા કરવા આવ્યો હતો ત્યારે તેના માથામાં ગોળી વાગી હતી.

16- પરમજીત સિંહ પંજવાર

પરમજીત સિંહ પંજવાર ખાલિસ્તાન કમાન્ડો ફોર્સના વડો હતો અને મલિક સરદાર સિંહ તરીકે પણ જાણીતો હતો. ૬ મે ૨૦૨૩ના રોજ પાકિસ્તાનના લાહોરમાં તેના ઘર નજીક મોર્નિંગ વોક દરમિયાન અજાણ્યા બંદૂકધારીઓ દ્વારા તેની ગોળી મારીને હત્યા કરવામાં આવી હતી. ભારતે જુલાઈ 2020 માં તેને UAPA હેઠળ આતંકવાદી તરીકે જાહેર કર્યો હતો, અને તે મોસ્ટ-વોન્ટેડ યાદીમાં હતો.