અમેરિકામાં પેસેન્જર વિમાન અને હેલિકોપ્ટર દુર્ઘટનામાં બે ભારતીયના મોત

અમેરિકાના વોશિંગ્ટનના રોનાલ્ડ રીગન નેશનલ એરપોર્ટ પર આર્મી હેલિકોપ્ટર અને જેટલાઇનર વચ્ચે થયેલી અથડામણમાં માર્યા ગયેલા 67 લોકોના મોત થયા હતા. આ દુર્ઘટનામાં બે ભારતીય મૂળના લોકોનો પણ સમાવેશ થાય છે.

GE એરોસ્પેસ એન્જિનિયર વિકેશ પટેલ અને વોશિંગ્ટન ડીસી સ્થિત કન્સલ્ટન્ટ અસરા હુસૈન રઝાનું મોત થયાનું જાણવા મળ્યુ છે. અમેરિકન એરલાઇન્સની ફ્લાઇટ 5342 બુધવારે રાત્રે એરપોર્ટ નજીક આવતાં જ આર્મીના હેલિકોપ્ટર સાથે અથડાઈ હતી. જેમાં બંને ભારતીયો સવાર હતા. ગ્રેટર સિનસિનાટીના વિકેશ પટેલે તાજેતરમાં જ કંપનીમાં નોકરી બદલી હતી અને તેઓ MRO ટ્રાન્સફોર્મેશનલ લીડર હતા. જેમણે સમગ્ર દેશમાં પ્રવાસ કર્યો છે.

મહત્વપૂર્ણ છે કે, અમેરિકાની રાજધાની વોશિંગ્ટન ડીસીમાં બુધવારે રાત્રે 9 વાગ્યે એક પેસેન્જર વિમાન અને હેલિકોપ્ટર વચ્ચે ટક્કર થઈ હતી. ત્યારબાદ બંને પોટોમેક નદીમાં પડી ગયા હતા. વિમાનમાં 64 લોકો સવાર હતા. જેમાં 4 ક્રૂ મેમ્બરનો સમાવેશ થાય છે. હેલિકોપ્ટરમાં 3 લોકો હતા.

દુર્ઘટના બાદ, અમેરિકન એરલાઇન્સનું વિમાન પોટોમેક નદીમાં ત્રણ ટુકડામાં મળી આવ્યું હતું. હાલમાં, એરપોર્ટ પર બધી ફ્લાઇટ્સ અને લેન્ડિંગ બંધ કરી દેવામાં આવ્યા છે. વોશિંગ્ટન ફાયર ડિપાર્ટમેન્ટના જણાવ્યા અનુસાર, આ ઘટના રોનાલ્ડ રીગન એરપોર્ટ નજીક બની હતી. આ અકસ્માત યુએસ એરલાઇન્સના CRJ700 બોમ્બાર્ડિયર જેટ અને આર્મી બ્લેક હોક (H-60) હેલિકોપ્ટર વચ્ચે થયો હતો. અમેરિકન એરલાઇન્સનું જેટ કેન્સાસથી વોશિંગ્ટન આવી રહ્યું હતું.