અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં એક ઇન્ટરવ્યુ દરમિયાન મોટો દાવો કર્યો છે કે પાકિસ્તાન ગુપ્ત રીતે ભૂગર્ભ પરમાણુ પરીક્ષણો કરી રહ્યું છે. તેમણે કહ્યું કે અમેરિકા ત્રણ દાયકાથી વધુ સમયથી પરમાણુ પરીક્ષણોથી દૂર છે, પરંતુ પાકિસ્તાન સહિત ઘણા દેશો ગુપ્ત રીતે પરીક્ષણો ચાલુ રાખે છે.
ટ્રમ્પે જણાવ્યું કે ઉત્તર કોરિયા, રશિયા અને ચીન જેવા દેશો પણ ગુપ્ત પરીક્ષણો કરી રહ્યા છે. તેમણે જણાવ્યું કે અમેરિકા એક ખુલ્લો સમાજ છે જ્યાં ચર્ચા થાય છે, જ્યારે અન્ય દેશો ગુપ્ત રીતે કામગીરી કરે છે.
ટ્રમ્પે સ્પષ્ટ કહ્યું કે અમેરિકા હવે પરમાણુ પરીક્ષણો ફરી શરૂ કરશે જેથી અન્ય દેશો સાથે સમાન સ્થિતિ જાળવી શકાય. તેમણે દાવો કર્યો કે અમેરિકા પાસે અન્ય કોઈપણ દેશ કરતાં વધુ પરમાણુ શસ્ત્રો છે અને રશિયા તથા ચીન સાથે નિઃશસ્ત્રીકરણ અંગે ચર્ચા કરી છે.
તેમણે કહ્યું કે અમેરિકા એકમાત્ર દેશ બની રહેવું યોગ્ય નથી જે પરીક્ષણ કરતું નથી. રશિયા અને ચીન સતત પોતાના પરમાણુ હથિયારોની ક્ષમતા વધારી રહ્યા છે.
ટ્રમ્પે એ પણ દાવો કર્યો કે તેમણે ભારત અને પાકિસ્તાન વચ્ચે સંભવિત પરમાણુ યુદ્ધ અટકાવ્યું હતું. તેમણે કહ્યું કે બંને દેશોને તણાવ ઘટાડવા માટે અમેરિકાના વેપાર અને ટેરિફ દબાણનો ઉપયોગ કર્યો હતો.
હાલમાં ભારતે ટ્રમ્પના દાવાઓને નકારી કાઢ્યા છે અને કહ્યું છે કે ભારત-પાકિસ્તાન યુદ્ધવિરામ દ્વિપક્ષીય વાટાઘાટો દ્વારા પ્રાપ્ત થયો હતો, કોઈ તૃતીય પક્ષની મદદ વિના
યુનાઇટેડ સ્ટેટ્સે છેલ્લે સપ્ટેમ્બર 1992માં પરમાણુ પરીક્ષણ કર્યું હતું અને ત્યારથી કમ્પ્યુટર સિમ્યુલેશન દ્વારા પોતાની ન્યૂક્લિયર નીતિ જાળવી રાખી છે. પરંતુ ટ્રમ્પના નવા નિવેદનથી વૈશ્વિક પરમાણુ રાજકારણમાં હલચલ મચી ગઈ છે.

ટ્રમ્પ પાકિસ્તાન પરમાણુ પરીક્ષણ દાવો

અમેરિકી રાષ્ટ્રપતિ ટ્રમ્પે કહ્યું કે પાકિસ્તાન ગુપ્ત રીતે પરમાણુ પરીક્ષણ કરી રહ્યું છે

November 3, 2025 | 21:53 IST