ટ્રમ્પ ઉકળી ઉઠ્યા, કહ્યું..ખુલ્લી સરહદોના કારણે અમેરિકા હાંસીનું પાત્ર બન્યું

અમેરિકામાં વીતેલા 24 કલાકમાં થયેલા શ્રેણીબદ્ધ આતંકી હુમલા બાદ અમેરિકાના ચૂંટાયેલા રાષ્ટ્રપતિ ડોનાલ્ડ ટ્રમ્પે આજે એક પછી એક ટ્વીટ કરીને જો બિડેન પર આરોપો લગાવ્યા હતા.    રાષ્ટ્રપતિ ડોનાલ્ડ ટ્રમ્પે આઉટગોઇંગ પ્રેસિડેન્ટ જો બિડેન પર આકરા પ્રહારો કરતા કહ્યું કે જો બિડેન અમેરિકાના ઈતિહાસના સૌથી ખરાબ રાષ્ટ્રપતિ છે. ઓપન બોર્ડર પોલિસી પર ટિપ્પણી કરતા ટ્રમ્પે કહ્યું હતું કે 'ખુલ્લી સરહદો'ના કારણે અમેરિકા આખી દુનિયામાં 'આપત્તિ,હાંસીનું પાત્ર' બની ગયું છે. ટ્રમ્પે કહ્યું કે ડિપાર્ટમેન્ટ ઑફ જસ્ટિસ (DOJ), ફેડરલ બ્યુરો ઑફ ઇન્વેસ્ટિગેશન (FBI), ડેમોક્રેટ સ્ટેટે તેમનું કામ કર્યું નથી. ટ્વિટર પર એક પોસ્ટમાં ટ્રમ્પે તેમને અસમર્થ અને ભ્રષ્ટ ગણાવ્યા હતા.   ટ્રમ્પે આરોપ લગાવ્યો કે આ એજન્સીઓએ અમેરિકન લોકોને દેશની અંદર અને બહાર હિંસાથી બચાવવાને બદલે તેમની ઉપર 'ગેરકાયદેસર' હુમલો કરવામાં તેમનો સમય પસાર કર્યો. ટ્રમ્પે વધુ આરોપ લગાવતા કહ્યું કે "હિંસક દૂષણ" અમેરિકન સરકાર અને ખુદ અમેરિકાના તમામ પાસાઓમાં ફેલાયેલું છે. ટ્રમ્પે કહ્યું કે આપણા દેશ સાથે આવું થવા દેવા માટે ડેમોક્રેટ્સને પોતાની જાત પર શરમ આવવી જોઈએ.   તેમણે એમ પણ કહ્યું કે હજું ખૂબ મોડું થાય તે પહેલાં સીઆઈએએ હવે સામેલ થવું જોઈએ. યુનાઇટેડ સ્ટેટ્સ તૂટી રહ્યું છે - આપણા દેશમાં સુરક્ષા, રાષ્ટ્રીય સુરક્ષા અને લોકશાહીનું હિંસક ધોવાણ થઈ રહ્યું છે. માત્ર તાકાત અને મજબૂત નેતૃત્વ જ આને રોકશે. 20મી જાન્યુઆરીએ મળીશું.