પાકિસ્તાનના આર્થિક પાટનગર ગણાતા કરાચી શહેરમાં ગુરુવારે વહેલી સવારે એક કરુણ દુર્ઘટના ઘટી છે. શહેરના ઓલ્ડ સોલ્જર બજાર વિસ્તારમાં આવેલા એક રહેણાંક મકાનમાં શંકાસ્પદ ગેસ લીકેજના કારણે પ્રચંડ વિસ્ફોટ થયો હતો. આ દુર્ઘટનામાં અત્યાર સુધીમાં 16 લોકોના કરુણ મોત થયા છે, જ્યારે 14 થી વધુ લોકો ગંભીર રીતે ઇજાગ્રસ્ત થયા હોવાના અહેવાલ મળી રહ્યા છે.
સેહરીના સમયે સર્જાઈ દુર્ઘટના :&nbsp;
પોલીસ અને સ્થાનિક તંત્રના જણાવ્યા અનુસાર, આ વિસ્ફોટ સવારે લગભગ 4:30 વાગ્યે થયો હતો. રમઝાનનો પ્રથમ દિવસ હોવાથી લોકો સેહરીની તૈયારીઓ માટે જાગ્યા હતા, તે સમયે જ અચાનક વિસ્ફોટ થતા મકાનનો એક ભાગ ધરાશાયી થઈ ગયો હતો. વિસ્ફોટ એટલો શક્તિશાળી હતો કે આસપાસની ઇમારતો પણ ધ્રૂજી ઉઠી હતી. પ્રારંભિક તપાસમાં વિસ્ફોટ પાછળ ગેસ લીકેજ મુખ્ય કારણ હોવાનું માનવામાં આવી રહ્યું છે.
મૃતકોમાં માસૂમ બાળકોની સંખ્યા વધુ :&nbsp;
દુર્ઘટનામાં જીવ ગુમાવનારાઓમાં સૌથી વધુ બાળકોનો સમાવેશ થાય છે. અહેવાલો મુજબ, મૃતકોમાં 2 થી 17 વર્ષની વયના નવ બાળકો છે. ઘાયલોમાં પણ સાત બાળકો હોવાનું જાણવા મળ્યું છે, જેમને નજીકની હોસ્પિટલમાં સારવાર માટે ખસેડવામાં આવ્યા છે. ફાયર બ્રિગેડની ટીમ હજુ પણ કાટમાળ નીચે દબાયેલા અન્ય લોકોની શોધખોળ કરી રહી છે.
કરાચીમાં ગેસ સિલિન્ડરનો ભય :&nbsp;
કરાચીમાં ગેસની સતત અછત રહેતી હોવાથી ઓછી આવક ધરાવતા વિસ્તારોમાં લોકો લિક્વિફાઇડ પેટ્રોલિયમ ગેસ (LPG) સિલિન્ડરનો મોટાપાયે ઉપયોગ કરે છે. યોગ્ય જાળવણીના અભાવે આવી દુર્ઘટનાઓ વારંવાર બનતી રહે છે. ઉલ્લેખનીય છે કે, ગયા મહિને જ કરાચીના સદ્દર વિસ્તારમાં આવેલા એક શોપિંગ પ્લાઝામાં લાગેલી આગમાં 79 લોકોએ જીવ ગુમાવ્યા હતા. એક મહિનાની અંદર આ બીજી મોટી જાનહાનિ ધરાવતી દુર્ઘટના છે.

કરાચી ગેસ વિસ્ફોટ દુર્ઘટના

રમઝાનના પ્રથમ દિવસે સેહરી સમયે ગેસ લીકેજથી મકાન ધરાશાયી થતા અનેક બાળકોએ જીવ ગુમાવ્યા

February 19, 2026 | 16:13 IST