બાંગ્લાદેશમાં તણાવ, શેખ હસીના કેસમાં ચુકાદો

બાંગ્લાદેશમાં તણાવનો માહોલ ઘેરાયો જોવા મળી રહ્યો છે કારણ કે પૂર્વ વડાપ્રધાન શેખ હસીના વિરુદ્ધના મહત્વપૂર્ણ કેસમાં અદાલત ચુકાદો આપવાની તૈયારીમાં છે. છેલ્લા બે દિવસથી દેશમાં આગચંપી, હિંસા અને ક્રૂડ બોમ્બ હુમલાઓની ઘટનાઓ વધતા રાજધાની ઢાકા સહિત અનેક શહેરોમાં ચિંતાનો માહોલ છે. આ હિંસા 2024ના વિદ્યાર્થી વિરોધ પ્રદર્શનોની યાદ અપાવે છે, જેમાં 500થી વધુ લોકોના મોત થયા હતા.

ગુરુવારે ઢાકાને કિલ્લામાં ફેરવી દેવામાં આવ્યું છે, કારણ કે શેખ હસીનાની પાર્ટી અવામી લીગે ‘ઢાકા લોકડાઉન’નું આહ્વાન કર્યું છે. ઢાકાના પ્રવેશ બિંદુઓ પર કડક ચેકિંગ ચાલી રહ્યું છે અને સુરક્ષા દળોની ભારે તૈનાતી કરવામાં આવી છે.

અદાલતમાં મહત્વપૂર્ણ ચુકાદો :

ઇન્ટરનેશનલ ક્રાઇમ ટ્રિબ્યુનલ (ICT)માં શેખ હસીના અને તેમના સહયોગીઓ વિરુદ્ધ હત્યા અને ષડયંત્ર સહિતના અનેક આરોપોમાં ચુકાદો આવવાનો છે. હસીના ગયા વર્ષે ઓગસ્ટમાં ભારત આવ્યા બાદથી જ આ કેસ આંતરરાષ્ટ્રીય સ્તરે ચર્ચામાં છે.

ઢાકામાં જનજીવન ઠપ :

રાજકીય તણાવને કારણે ઢાકાનું સામાન્ય જીવન લગભગ ઠપ થયું છે. આગચંપી અને વિસ્ફોટની ઘટનાઓ ઢાકાની બહાર ગાઝીપુર અને બ્રાહ્મણબારિયા જેવા શહેરોમાં પણ ફેલાઈ ગઈ છે. બ્રાહ્મણબારિયામાં ગ્રામીણ બેન્કની શાખાને આગ લગાડવામાં આવી, જેના કારણે દસ્તાવેજો અને ફર્નિચર બળી ખાખ થઈ ગયા.

1983માં નોબેલ વિજેતા મોહમ્મદ યુનુસ દ્વારા સ્થાપિત ગ્રામીણ બેન્ક ગરીબોને માઇક્રો-ક્રેડિટ માટે ઓળખાય છે. હાલની હિંસા માટે સરકાર અવામી લીગના સમર્થકોને જવાબદાર ઠેરવી રહી છે.