તાલિબાનનો પાકિસ્તાન પર મોટો હુમલો, સેનાની ઘણી ચોકી કબજે કરી

પાકિસ્તાની સેના અને તાલિબાન વચ્ચેની સરહદ ડ્યુરન્ડ લાઇન પર યુદ્ધ જેવી સ્થિતિ પ્રવર્તી રહી છે. TTP આતંકવાદીઓ દ્વારા 16 પાકિસ્તાની સૈનિકોની હત્યા કર્યા પછી, પાકિસ્તાની વાયુસેનાએ અફઘાનિસ્તાનના પક્તિકા અને ખોસ્ત પ્રાંતમાં હવાઈ હુમલા કર્યા. પાકિસ્તાની હુમલામાં લગભગ 50 લોકોએ જીવ ગુમાવ્યા હતા. પાકિસ્તાને દાવો કર્યો હતો કે તેણે TTP આતંકવાદીઓ પર હુમલો કર્યો હતો.

આ હુમલાથી ગુસ્સે ભરાયેલા તાલિબાને ડ્યુરન્ડ રેખા પર પાકિસ્તાની સેનાની ચોકીઓ પર હુમલો કરીને 19 પાકિસ્તાની સૈનિકોને માર્યા હોવાનો દાવો કર્યો છે. આ સિવાય તેણે 2 પાકિસ્તાની પોસ્ટ કબજે કરવાનો પણ દાવો કર્યો છે.

તમને જણાવી દઈએ કે અફઘાનિસ્તાન અંગ્રેજો દ્વારા દોરવામાં આવેલી ડ્યુરન્ડ લાઇનને સ્વીકારતું નથી. આ અંગે, પાકિસ્તાન અને અફઘાનિસ્તાન વચ્ચે શરૂઆતથી જ તણાવ ચાલી રહ્યો છે. હવે ફરી એકવાર ડ્યુરન્ડ લાઈનનો મુદ્દો ગરમાયો છે.

બીજી તરફ તાલિબાન અને પાકિસ્તાન વચ્ચે શનિવાર રાત સુધી લડાઈ ચાલુ રહી હતી. હાલ શાંતિપૂર્ણ માહોલ છે. ચાલી રહેલા સંઘર્ષને જોતા હજારો અફઘાન નાગરિકોને સરહદી વિસ્તારોમાંથી સ્થળાંતર કરવું પડ્યું છે. પાકિસ્તાની સેનાએ સ્વીકાર્યું છે કે ઘણા વિસ્તારોમાં લડાઈ થઈ છે, પરંતુ માત્ર એક સૈનિકનું મોત સ્વીકાર્યું છે.

અફઘાનિસ્તાનના સંરક્ષણ મંત્રાલયે એક નિવેદનમાં બંને દેશો વચ્ચે દોરેલી ડ્યુરન્ડ રેખાને કાલ્પનિક રેખા ગણાવી છે. અફઘાન સંરક્ષણ મંત્રાલયે કહ્યું, '28 ડિસેમ્બરે આ હુમલો પાકિસ્તાનના તે વિસ્તારોમાં કરવામાં આવ્યો હતો જ્યાંથી અફઘાન જમીન પર હુમલા કરવામાં આવ્યા હતા.

ઉલ્લેખનીય છે કે પાકિસ્તાન અને અફઘાનિસ્તાન વચ્ચે ડ્યુરન્ડ લાઇનને લઈને દાયકાઓથી વિવાદ ચાલી રહ્યો છે. અફઘાનિસ્તાનની કોઈપણ સરકારે ક્યારેય અંગ્રેજો દ્વારા દોરેલી આ સરહદ રેખાને સ્વીકારી નથી. તેઓ હંમેશા તેને કાલ્પનિક રેખા કહે છે. જ્યારે તાલિબાન સંરક્ષણ મંત્રાલયના પ્રવક્તાને વારંવાર પૂછવામાં આવ્યું કે શું તેમનું નિવેદન પાકિસ્તાન માટે છે, તો તેમણે કહ્યું, 'અમે માનતા નથી કે આ પાકિસ્તાનનો વિસ્તાર છે. આ માત્ર એક કાલ્પનિક રેખા છે.