અમેરિકામાં રાષ્ટ્રપતિ ડોનાલ્ડ ટ્રમ્પની નીતિઓ સામે પ્રચંડ જનઆક્રોશ જોવા મળી રહ્યો છે. શનિવારે સમગ્ર અમેરિકામાં 'નો કિંગ્સ રેલી' અંતર્ગત અંદાજે 80 લાખ લોકો રસ્તા પર ઉતરી આવ્યા હતા.
અમેરિકાના તમામ 50 રાજ્યોમાં 3,300થી વધુ સ્થળોએ આ વિરોધ પ્રદર્શનો યોજાયા હતા, જે ટ્રમ્પ સરકાર સામે અત્યાર સુધીનું સૌથી મોટું આંદોલન માનવામાં આવી રહ્યું છે.
યુદ્ધ અને મોંઘવારી મુખ્ય મુદ્દા
પ્રદર્શનકારીઓ ટ્રમ્પ સરકારની ઇરાન સાથે વધતા તણાવની નીતિ, કડક ઇમિગ્રેશન કાયદા અને સતત વધતી જતી મોંઘવારીથી નારાજ છે. ન્યૂયોર્કના ટાઈમ્સ સ્ક્વેરથી લઈને શિકાગો અને વોશિંગ્ટન ડીસીના લિંકન મેમોરિયલ સુધી લાખો લોકોએ 'ટ્રમ્પ હટાવો'ના નારા લગાવ્યા હતા.
આ આંદોલનમાં બર્ની સેન્ડર્સ અને ઇલ્હાન ઉમર જેવા દિગ્ગજ નેતાઓ તેમજ મેગી રોઝર્સ જેવા સેલિબ્રિટીઓ પણ જોડાયા હતા.
વૈશ્વિક સ્તરે પણ પડઘા
ટ્રમ્પ વિરોધી આ લહેર માત્ર અમેરિકા પૂરતી મર્યાદિત નથી રહી. ફ્રાન્સની રાજધાની પેરિસ અને ઇટાલીના રોમમાં પણ પ્રદર્શનો યોજાયા હતા. રોમમાં લોકોએ ડોનાલ્ડ ટ્રમ્પની સાથે ઇઝરાયેલના પીએમ નેતન્યાહુ અને ઇટાલીના પીએમ જ્યોર્જિયા મેલોની વિરુદ્ધ પણ પોસ્ટરો પ્રદર્શિત કર્યા હતા. પેરિસમાં એક મહિલા 'સ્ટેચ્યુ ઓફ લિબર્ટી' બનીને આ વિરોધમાં જોડાઈ હતી.
હિંસક ઘર્ષણ
મોટાભાગના સ્થળોએ પ્રદર્શનો શાંતિપૂર્ણ રહ્યા હતા, પરંતુ પોર્ટલેન્ડ અને લોસ એન્જલસમાં સ્થિતિ તણાવપૂર્ણ બની હતી. પોર્ટલેન્ડમાં પ્રદર્શનકારીઓએ ઇમિગ્રેશન એજન્સી (ICE)ની ઓફિસ બહાર અમેરિકન ધ્વજ સળગાવ્યો હતો, જ્યારે લોસ એન્જલસમાં પોલીસ અને પ્રદર્શનકારીઓ વચ્ચે ઘર્ષણ થતા અનેક લોકોની ધરપકડ કરવામાં આવી છે.
પ્રદર્શનકારીઓએ ટ્રમ્પનું નામ સેક્સ ક્રાઈમ સાથે જોડાયેલા જેફ્રી એપ્સટિન સાથે સાંકળતા પોસ્ટરો પણ લહેરાવ્યા હતા.

ટ્રમ્પ હટાવોના નારા

અમેરિકામાં ટ્રમ્પ વિરુધ્ધ પ્રદર્શન, તણાવ અને મોંઘવારી મુદ્દે ટ્રમ્પની વિદાયની માંગ.

March 29, 2026 | 16:32 IST