Russia નો Ukraine પર અત્યાર સુધીનો સૌથી મોટો હવાઈ હુમલો, એફ-16 પાયલટનું મોત

ત્રણ વર્ષથી ચાલી રહેલા રશિયા-યુક્રેન યુદ્ધમાં રશિયાએ તાજેતરમાં અત્યાર સુધીનો સૌથી વિનાશક હવાઈ હુમલો કર્યો છે. આ હુમલામાં યુક્રેનના એફ-16 ફાઈટર જેટના એક પાયલટનું મોત થયું છે, જે રશિયન હુમલાને નિષ્ફળ બનાવવાની કામગીરીમાં રોકાયેલો હતો. યુક્રેનના રાષ્ટ્રપ્રમુખ વોલોડીમીર ઝેલેન્સકીએ જણાવ્યું કે, રશિયાએ આખી રાત ચાલેલા આ હુમલામાં 477 ડ્રોન અને 60 મિસાઈલોનો ઉપયોગ કર્યો હતો.   ઝેલેન્સકીએ ઉમેર્યું કે, આ હુમલામાં મોટાભાગના ડ્રોન ઈરાનમાં બનેલા ‘શાહેદ’ ડ્રોન હતા. રશિયન સેનાએ યુક્રેનની માનવ વસાહતોને પણ નિશાન બનાવી, જેમાં સ્મિલા શહેરની એક રહેણાંક ઇમારત પર હુમલો થયો, જેમાં એક બાળક ઘાયલ થયું. તેમણે રશિયાની ઝાટકણી કાઢતાં કહ્યું, “મોસ્કો પાસે જ્યાં સુધી આવા મોટા હુમલા કરવાની ક્ષમતા છે, ત્યાં સુધી તે રોકાવાનું નથી. આ સપ્તાહે રશિયાએ 114થી વધુ મિસાઈલ, 1270થી વધુ ડ્રોન અને 1100થી વધુ ગાઈડેડ બોમ્બનો ઉપયોગ કર્યો છે.” તેમણે વધુમાં જણાવ્યું કે, રશિયાના રાષ્ટ્રપ્રમુખ વ્લાદિમીર પુતિન વૈશ્વિક શાંતિની અપીલોને અવગણીને યુદ્ધ ચાલુ રાખવા માટે કટિબદ્ધ છે. ઝેલેન્સકીએ આ યુદ્ધને તાત્કાલિક બંધ કરવાની માંગ કરી.     યુક્રેનની વાયુસેનાના સંચાર પ્રમુખ યૂરી ઈહનાતે જણાવ્યું કે, “રશિયાએ આખી રાત ચાલેલા આ હુમલામાં ડ્રોન અને વિવિધ પ્રકારની મિસાઈલોનો ઉપયોગ કર્યો, જેમાં યુક્રેનના પશ્ચિમી વિસ્તારો સહિત આખો પ્રદેશ નિશાન બન્યો.” યુક્રેનના સંરક્ષણ મંત્રાલયે જણાવ્યું કે, હુમલામાં વપરાયેલા 211 ઈરાની ડ્રોન અને અન્ય યુએવી (અનમેન્ડ એરિયલ વ્હીકલ) હતા. યુક્રેનની સેનાએ ઈલેક્ટ્રોનિક વોરફેરનો ઉપયોગ કરીને 225 હથિયારો નષ્ટ કર્યા હતા.   આ હુમલો રશિયા-યુક્રેન યુદ્ધની તીવ્રતા અને વિનાશક ક્ષમતાને દર્શાવે છે. આંતરરાષ્ટ્રીય સમુદાયમાં શાંતિની અપીલો વચ્ચે આ ઘટનાએ યુદ્ધના ઝડપથી અંતની જરૂરિયાતને વધુ રેખાંકિત કરી છે.