અમેરિકાના ઓહાયો રાજ્યમાં એક ભારતીય મૂળના વ્યક્તિની બેદરકારીને કારણે મોટી દુર્ઘટના સર્જાઈ છે. 33 વર્ષીય તરસેમ સિંહ પર હાઈ-સ્પીડ પોલીસ પીછો કરવા અને તેના પરિણામે સર્જાયેલા અકસ્માતમાં 17 વર્ષીય ગર્ભવતી યુવતી અને તેના કોખમાં રહેલ બાળકનું મોત નિપજાવવાનો આરોપ લાગ્યો છે.
આ ઘટના બાદ અમેરિકામાં ભારતીય નાગરિકોની છબી અને કાયદાના ભંગ અંગે ચર્ચાઓ શરૂ થઈ છે.
અધિકારીઓના જણાવ્યા અનુસાર, પોલીસ ડેપ્યુટીએ તરસેમ સિંહને લેન્ડ રોવર રેન્જ રોવર કાર 100 માઈલ પ્રતિ કલાકની ઝડપે દોડાવતા જોઈ હતી. જ્યારે પોલીસે તેને રોકવાનો પ્રયાસ કર્યો ત્યારે તે ઉભો રહેવાને બદલે 120 માઈલ (અંદાજે 193 કિમી)થી વધુની ઝડપે કાર દોડાવી ભાગ્યો હતો. આ હાઈ-સ્પીડ ચેઝિંગ દરમિયાન તરસેમની કાર સામેથી આવતી જીપ સાથે અથડાઈ હતી.
આ ભયાનક અકસ્માત એટલો જોરદાર હતો કે તરસેમની કારમાં બેઠેલી 17 વર્ષની એશ્લી હોમ્સ કારમાંથી બહાર ફેંકાઈ ગઈ હતી અને તેનું ઘટનાસ્થળે જ મોત નીપજ્યું હતું. એશ્લી ગર્ભવતી હતી અને અકસ્માતમાં તેનું અજન્મેલું બાળક પણ બચી શક્યું નહોતું. બીજી તરફ જીપના ડ્રાઈવરને પણ ઈજાઓ પહોંચી હતી. તરસેમ સિંહ પોતે પણ ઈજાગ્રસ્ત થયો હતો અને તેને સારવાર બાદ કસ્ટડીમાં લેવામાં આવ્યો હતો.
ગંભીર કલમો હેઠળ ગુનો દાખલ
તરસેમ સિંહ પર 23 માર્ચના રોજ અનેક ગંભીર આરોપો હેઠળ કેસ દાખલ કરવામાં આવ્યો છે. જેમાં ઇનવોલન્ટરી મેનસ્લોટર (બિન-ઈરાદાપૂર્વકની હત્યા), રેકલેસ હોમિસાઇડ (બેદરકારીથી હત્યા), અને પોલીસના આદેશનું ઉલ્લંઘન જેવી કલમો સામેલ છે.
અમેરિકી ઇમિગ્રેશન એજન્સી (ICE)એ તેને 'ક્રિમિનલ ઈલીગલ એલિયન' તરીકે સંબોધ્યો છે, જે સૂચવે છે કે તે ગેરકાયદેસર રીતે ત્યાં હોઈ શકે છે.
કોર્ટે તરસેમ સિંહ માટે 1 મિલિયન ડોલરનો બોન્ડ નક્કી કર્યો છે. તેની પર ઇમિગ્રેશન ડિટેનર પણ મૂકવામાં આવ્યું છે, જેનો અર્થ છે કે જો તે દોષિત ઠરશે તો તેને ભારત ડિપોર્ટ (દેશનિકાલ) કરવામાં આવશે. તરસેમે હાલમાં પોતે નિર્દોષ હોવાનું જણાવ્યું છે. આ કેસની આગામી સુનાવણી 3 એપ્રિલે થવાની છે.

અમેરિકામાં ભારતીય યુવકના અકસ્માતથી ગર્ભવતીનું મોત

હાઇ સ્પીડમાં કાર દોડાવી પોલીસથી ભાગતા ભારતીય યુવકે સર્જ્યો અકસ્માત, ગર્ભવતી સગીરાનું મોત

March 31, 2026 | 14:21 IST