બાંગ્લાદેશમાં રાજકીય હિંસા ચાલુ, અવામી લીગના નેતાઓના ઘરો પર હુમલા

બાંગ્લાદેશમાં પૂર્વ વડાપ્રધાન શેખ હસીનાની પાર્ટી અવામી લીગને ફરી એકવાર નિશાન બનાવવામાં આવી છે. બાંગ્લાદેશ નેશનાલિસ્ટ પાર્ટી (BNP) વિદ્યાર્થી પાંખના બેનર હેઠળ કથિત રીતે ટોળા દ્વારા ભૂતપૂર્વ મેયર અનવરઝમાન ચૌધરી અને ભૂતપૂર્વ સાંસદ શફીઉલ આલમ ચૌધરી નડેલના ઘરો પર હુમલો કરવામાં આવ્યો હતો અને તોડફોડ કરવામાં આવી હતી.

સ્થાનિક મીડિયા આઉટલેટ 'UNB' ના અહેવાલ મુજબ સિલ્હેટ એરપોર્ટ પોલીસ સ્ટેશનના ઓફિસર-ઈન્ચાર્જ (OC) સૈયદ અનીસુર રહેમાને જણાવ્યું હતું કે વિદ્યાર્થીઓ અને સામાન્ય લોકોના એક બેકાબૂ જૂથે નડેલના નિવાસસ્થાન પર હુમલો કર્યો હતો, જેનાથી નુકસાન થયું હતું.

સ્થાનિક પ્રત્યક્ષદર્શીઓએ જણાવ્યું કે બુધવારે 70-80 બાઇક પર સવાર વિદ્યાર્થીઓના જૂથના સભ્યો એક સરઘસમાં સિલહટ શહેરના હાઉસિંગ એસ્ટેટ વિસ્તારમાં નડેલના ઘરે પહોંચ્યા હતા. તેઓએ ઘરમાં ઘૂસી સીસીટીવી કેમેરા અને લેપટોપને નુકસાન પહોંચાડ્યું હતું. અન્ય એક ઘટનામાં સિલહટના પથનતુલા વિસ્તારમાં અનવરઝમાન ચૌધરીના ઘર પર હુમલો કરવામાં આવ્યો હતો. હુમલાખોરોએ ફર્નિચર અને અન્ય ઘરવખરીનો સામાન તોડી નાખ્યો હતો.

જલાલાબાદ પોલીસ સ્ટેશનના ઈન્ચાર્જ હારુનુર રશીદે જણાવ્યું હતું કે, "રિપોર્ટ મળ્યા બાદ પોલીસે કાર્યવાહી કરી હતી. અમને જાણવા મળ્યું હતું કે હુમલો ગુસ્સે થયેલા વિદ્યાર્થીઓ અને સામાન્ય લોકો દ્વારા કરવામાં આવ્યો હતો." સ્થાનિક મીડિયા આઉટલેટ 'BDDIGEST'એ અહેવાલ આપ્યો છે કે ટોળાએ ઘરમાંથી કિંમતી સામાન પણ ચોરી લીધો હતો. ઘટના સમયે અનવરઝ્ઝમાનના કોઈ સંબંધીઓ ઘરમાં નહોતા; બે કેરટેકર્સ ઘરની સંભાળ રાખતા હતા અને હુમલાખોરોએ કથિત રીતે તેમની સાથે દુર્વ્યવહાર કર્યો હતો.

બાંગ્લાદેશમાં ગયા વર્ષે શેખ હસીના સરકારના પતન પછી રાજકીય હિંસા ચાલુ છે. તે જ સમયે, મોહમ્મદ યુનુસના નેતૃત્વ હેઠળની વચગાળાની સરકાર હિંસક ઘટનાઓને રોકવામાં નિષ્ફળ રહી છે.

શેખ હસીનાને સત્તા પરથી હટાવ્યા પછી, અવામી લીગના ઘણા નેતાઓ પર નિર્દયતાથી હુમલો કરવામાં આવ્યો અને તેમની હત્યા કરવામાં આવી. બાંગ્લાદેશના અગ્રણી દૈનિક 'ધ ઢાકા ટ્રિબ્યુન'ના અહેવાલ મુજબ, ઓગસ્ટ 2024માં દેશભરમાંથી ઓછામાં ઓછા 20 અવામી લીગના નેતાઓ અને તેમના પરિવારના સભ્યોના મૃતદેહ મળી આવ્યા હતા.

તાજેતરના સમયમાં અવામી લીગના ઘણા નેતાઓ અને સમર્થકોએ ગંભીર હુમલાઓ અને ટોળાની હિંસાનો સામનો કરવો પડ્યો છે.