PM મોદીને ઘાનાનું સર્વોચ્ચ સન્માન, બંને દેશો વચ્ચે 4 કરાર થયા

વડાપ્રધાન નરેન્દ્ર મોદી બુધવારે બે દિવસની મુલાકાતે ઘાના પહોંચ્યા, જે પશ્ચિમ આફ્રિકન દેશની તેમની પ્રથમ દ્વિપક્ષીય મુલાકાત હતી. કોટોકા આંતરરાષ્ટ્રીય હવાઇમથક પર તેમનું ભવ્ય સ્વાગત કરવામાં આવ્યું અને 21 તોપોની સલામી પણ આપવામાં આવી. આ દરમિયાન પીએમ મોદીને ઘાનાનો બીજો રાષ્ટ્રીય સર્વોચ્ચ નાગરિક સન્માન આપવામાં આવ્યો. ઘાનાના રાષ્ટ્રપતિ જોન મહામા દ્વારા પીએમ મોદીને 'ઓફિસર ઓફ ધ ઓર્ડર ઓફ ધ સ્ટાર ઓફ ઘાના' થી સન્માનિત કરવામાં આવ્યા.

પીએમ મોદીએ ઘાનાની ધરતી પર મળેલા ઉષ્માભર્યા સ્વાગત બદલ ખુશી વ્યક્ત કરી અને કહ્યું કે રાષ્ટ્રપતિ પોતે એરપોર્ટ પર આવ્યા તે તેમના માટે ખૂબ જ સન્માનની વાત છે. સંયુક્ત નિવેદન જાહેર કરતી વખતે, પીએમ મોદીએ કહ્યું કે ભારત-ઘાના મિત્રતાના કેન્દ્રમાં સહિયારા મૂલ્યો, સંઘર્ષ અને સમાવિષ્ટ ભવિષ્ય માટેના સહિયારા સપના છે જેણે અન્ય દેશોને પણ પ્રેરણા આપી છે.

તેમણે ઘાનાને એક જીવંત લોકશાહી અને પશ્ચિમ આફ્રિકામાં "આશાની કિરણ" તરીકે પ્રશંસા કરી. આ મુલાકાત દરમિયાન બંને દેશો વચ્ચે ઘણા મહત્વપૂર્ણ નિર્ણયો લેવામાં આવ્યા. આ જાહેરાત કરતા પીએમ મોદીએ કહ્યું, 'આજે અમે ઘાના માટે ITEC અને ICCR શિષ્યવૃત્તિ બમણી કરવાનો નિર્ણય લીધો છે. યુવાનોના વ્યાવસાયિક શિક્ષણ માટે કૌશલ્ય વિકાસ કેન્દ્ર સ્થાપિત કરવા માટે કામ કરવામાં આવશે. કૃષિ ક્ષેત્રમાં, અમે રાષ્ટ્રપતિ મહામાના "ફીડ ઘાના" કાર્યક્રમમાં સહયોગ કરવામાં ખુશ થઈશું.'

આતંકવાદ મુદ્દે ચર્ચા: 

આતંકવાદ સામેની લડાઈમાં ઘાનાના સહયોગની પ્રશંસા કરતા પીએમ મોદીએ કહ્યું કે બંને દેશોએ આતંકવાદના સખત વિરોધી ગણાવ્યા. બંને દેશોની આતંકવાદની લડાઈમાં સહયોગને વધુ મજબૂત બનાવવાનો નિર્ણય લીધો છે. બંને દેશોએ સંયુક્ત રાષ્ટ્ર સુધારાઓ પર પણ સમાન દ્રષ્ટિકોણ શેર કર્યો હતો.

4 મહત્વપૂર્ણ કરારો કર્યા:

સાંસ્કૃતિક વિનિમય કાર્યક્રમ પર સમજૂતી કરાર: કલા, સંગીત, નૃત્ય, સાહિત્ય અને વારસાના ક્ષેત્રમાં પરસ્પર સમજૂતીને પ્રોત્સાહન આપવા માટે.

બ્યુરો ઓફ ઇન્ડિયન સ્ટાન્ડર્ડ્સ (BIS) અને ઘાના સ્ટાન્ડર્ડ્સ ઓથોરિટી (GSA) વચ્ચે સમજૂતી કરાર: માનકીકરણ અને પ્રમાણપત્રમાં સહયોગ માટે.

ITAM (ઘાના) અને ITRA (ભારત) વચ્ચે સમજૂતી કરાર: પરંપરાગત દવા શિક્ષણ, તાલીમ અને સંશોધનમાં સહયોગ માટે.

સંયુક્ત કમિશન બેઠક પર સમજૂતી કરાર: ઉચ્ચ-સ્તરીય સંવાદને સંસ્થાકીય બનાવવા અને દ્વિપક્ષીય સહયોગની સમીક્ષા કરવા માટે.