વડાપ્રધાન નરેન્દ્ર મોદીએ શનિવારે જાપાનના વડાપ્રધાન શિગેરુ ઈશિબા સાથે મિયાગી પ્રાંતના સેન્ડાઈ શહેરની મુલાકાત લીધી હતી. આ મુલાકાત દરમિયાન, બન્ને નેતાઓએ સેમિકન્ડક્ટર ક્ષેત્રની અગ્રણી કંપની ટોક્યો ઇલેક્ટ્રોન મિયાગી લિમિટેડ (TEL મિયાગી) ની મુલાકાત લીધી હતી.
ફેક્ટરીમાં તેમને TELની વૈશ્વિક સેમિકન્ડક્ટર સપ્લાય ચેઈનમાં ભૂમિકા, અદ્યતન મેન્યુફેક્ચરિંગ ક્ષમતાઓ અને ભારત સાથેના વર્તમાન તેમજ ભવિષ્યના સહયોગ વિશે માહિતી આપવામાં આવી હતી. આ મુલાકાતથી બંને દેશો વચ્ચે સેમિકન્ડક્ટરના ઉત્પાદન, પરીક્ષણ અને સપ્લાય ચેઈનમાં સહયોગની તકોની વ્યવહારિક સમજણ મળી હતી.
આ મુલાકાત ભારતના ઉભરતા સેમિકન્ડક્ટર મેન્યુફેક્ચરિંગ ઈકોસિસ્ટમ અને જાપાનની અદ્યતન ટેકનોલોજી વચ્ચેના તાલમેલને દર્શાવે છે. બંને નેતાઓએ આ ક્ષેત્રમાં સહયોગ વધુ ગાઢ બનાવવાની, જાપાન-ભારત સેમિકન્ડક્ટર સપ્લાય ચેઈન ભાગીદારી માટેની સંમતિને આગળ વધારવાની, અને ભારત-જાપાન ઔદ્યોગિક સ્પર્ધા તથા આર્થિક સુરક્ષા વાર્તાને મજબૂત કરવાની પ્રતિબદ્ધતા વ્યક્ત કરી. આ દરમિયાન, મજબૂત, લવચીક અને વિશ્વસનીય સેમિકન્ડક્ટર સપ્લાય ચેઈન વિકસાવવાના સંયુક્ત લક્ષ્ય પર પણ ભાર મૂકવામાં આવ્યો.
વડાપ્રધાન મોદીએ આ મુલાકાત માટે વડાપ્રધાન ઈશિબાનો આભાર માન્યો અને સેમિકન્ડક્ટર જેવા વ્યૂહાત્મક ક્ષેત્રમાં જાપાન સાથે મળીને કામ કરવાની ભારતની ઈચ્છાનો પુનરોચ્ચાર કર્યો. PM ઇશિબાએ સેન્ડાઈમાં PM મોદીના સન્માનમાં એક ભોજનનું આયોજન કર્યું હતું, જેમાં મિયાગીના ગવર્નર અને અન્ય મહાનુભાવો ઉપસ્થિત રહ્યા હતા.
આ મુલાકાતથી બંને દેશો વચ્ચે ટેકનોલોજીકલ ભાગીદારીને નવી દિશા મળવાની અપેક્ષા છે. ભારતમાં સેમિકન્ડક્ટર મેન્યુફેક્ચરિંગને પ્રોત્સાહન આપવા માટે જાપાનનો સહયોગ અત્યંત મહત્વપૂર્ણ માનવામાં આવે છે. સ્થાનિક લોકોએ આ ઉચ્ચ સ્તરીય મુલાકાતને સેન્ડાઈ માટે ગૌરવની વાત ગણાવી છે. આગામી દિવસોમાં આ ભાગીદારીથી બન્ને દેશોની અર્થવ્યવસ્થાને ફાયદો થવાની સંભાવના છે.

PM મોદી અને જાપાનના PM એ સેન્ડાઈમાં એક અગ્રણી સેમિકન્ડક્ટર કંપનીની મુલાકાત લીધી

August 30, 2025 | 20:27 IST