ફિલિપાઈન્સની ધરતી જોરદાર ભૂકંપના કારણે ધ્રુજી ઊઠી છે. ફિલિપાઈન્સના દક્ષિણ ભાગમાં આવેલા મિન્ડાનાઓ ટાપુના પૂર્વીય તટ પર શુક્રવારે સવારે 7.5ની તીવ્રતાનો ભૂકંપ આવ્યો. અમેરિકન ભૂસ્તર સર્વેક્ષણ (USGS) અનુસાર, આ ભૂકંપ સ્થાનિક સમય અનુસાર સવારે 9 વાગ્યેને 43 મિનિટે આવ્યો હતો, જેનું કેન્દ્ર ઓરિએન્ટલ પ્રાંતના સેન્ટિયાગો શહેરથી લગભગ 20 કિલોમીટર પૂર્વમાં સ્થિત હતું. આ ભારે ભૂકંપના પગલે સમગ્ર વિસ્તારમાં ગભરાટ ફેલાયો હતો અને તંત્ર દ્વારા તાત્કાલિક સુનામીની ચેતવણી &nbsp;પણ જારી કરવામાં આવી છે.
સુનામીની ગંભીર ચેતવણી&nbsp;
ફિલિપાઈન્સની ભૂકંપ વિજ્ઞાન એજન્સીએ આ વિનાશક ભૂકંપ બાદ લોકો માટે ઊંચું એલર્ટ જાહેર કર્યું છે. તેમણે ચેતવણી આપી છે કે, &nbsp;સુનામીની શક્યતા છે, જેમાં 1 મીટરથી વધુ ઊંચા મોજા ઊછળી શકે છે, અને ખાડીઓમાં આ મોજા વધુ ઊંચા હોઈ શકે છે. ભૂકંપ એજન્સીએ આગામી 2 કલાકમાં સુનામી આવવાની ચેતવણી આપી છે, જેના સંકેતરૂપે દરિયાકિનારા પરથી પાણી ઓસરી ગયા હોવાના અહેવાલો પણ છે.
સુરક્ષિત સ્થળોએ ખસવાની સલાહ
આ ખતરાને ધ્યાનમાં રાખીને, મધ્ય અને દક્ષિણ ફિલિપાઇન્સના તટીય શહેરોમાં રહેતા લોકોને તાત્કાલિક ધોરણે ઊંચા સ્થળોએ અથવા અંદરના સુરક્ષિત સ્થળોએ ખસી જવાની સલાહ આપવામાં આવી છે. ફિલિપાઈન્સના 8 જેટલા વિસ્તારોમાં સુનામીનું જોખમ છે, જેમાં ઇસ્ટર્ન સામર, સધર્ન લેયતે, લેયતે, દિનાગત ટાપુ, સુરીગાઓ ડેલ નોર્ટ, સુરીગાઓ ડેલ સુર અને દાવોઓ ઓરિએન્ટલનો સમાવેશ થાય છે.
આફ્ટરશોક્સ અને પ્રાદેશિક અસર
ફિલિપાઇન્સની ભૂકંપ વિજ્ઞાન એજન્સીએ આ મુખ્ય ભૂકંપ બાદ વધુ આફ્ટરશોક્સ આવવાની પણ ચેતવણી આપી છે. જોકે, રાહતની વાત એ છે કે, તાત્કાલિક કોઈ મોટા નુકસાન કે જાનહાનિની જાણ કરવામાં આવી નથી. આ પહેલા 30 સપ્ટેમ્બરના રોજ ફિલિપાઇન્સના સેબુ પ્રાંતમાં 6.9ની તીવ્રતાનો ભૂકંપ આવ્યો હતો, જેમાં 69 લોકોના મોત થયા હતા અને લગભગ 150 લોકો ઘાયલ થયા હતા. ફિલિપાઇન્સમાં આવેલા આ શક્તિશાળી ભૂકંપને પગલે પડોશી દેશ ઈન્ડોનેશિયા એ પણ સાવચેતીના ભાગરૂપે ઉત્તર સુલાવેસી અને પાપુઆ પ્રદેશો માટે સુનામીની ચેતવણી જાહેર કરી છે, જે દર્શાવે છે કે આ ઘટનાની પ્રાદેશિક અસર કેટલી વ્યાપક છે.

મિન્ડાનાઓ ક્ષેત્રમાં 7.5ની તીવ્રતાનો ભૂકંપ, સુનામીની ચેતવણી જારી કરવામાં આવી

October 10, 2025 | 15:22 IST