દેશભરમાં ચર્ચામાં રહેલા પાકિસ્તાની પ્રેમી યુગલની &ldquo;અજબ પ્રેમની ગજબ કહાની&rdquo;નો આજે કાનૂની અંજામ આવ્યો. કચ્છના દુર્ગમ ખડીર બેટમાં ૪ ઓક્ટોબરની રાત્રે ગેરકાયદે ઘૂસી આવેલા પાકિસ્તાની યુવક-યુવતીને આજે ભચાઉ જ્યુડિશિયલ મેજિસ્ટ્રેટ કોર્ટમાં રજૂ કરાયા બાદ ગાંધીધામની ગળપાદર જેલ હવાલે કરવાનો આદેશ કર્યો છે.
યુવકનું નામ તોતો ઉર્ફે તારા રણમણ ચુડી (ઉં.વ. ૨૦) અને યુવતીનું નામ મીના ઉર્ફે પૂજા કરસન ચુડી (ઉં.વ. ૧૮-૨૦) છે. બંને પાકિસ્તાનના સિંધ પ્રાંતના થરપારકર જિલ્લાના ઈસ્લામકોટ તાલુકાના લસરી ગામના રહેવાસી અને ભીલ સમાજના છે. એક જ નુક (ગોત્ર)ના હોવા છતાં પરિવારે લગ્નનો વિરોધ કરતાં બંનેએ ઘરેથી ભાગીને ભારત આવવાનો નિર્ણય લીધો હતો.
કાંટાળી તાર નીચેથી ઘૂસણખોરી, ત્રણ દિવસ રણમાં ભટક્યા ૪ ઓક્ટોબરની રાત્રે બંને પગે ચાલીને પાકિસ્તાની સરહદેથી નીકળ્યા, રાતના અંધારામાં કાંટાળી તાર નીચેથી ભારતમાં ઘૂસી આવ્યા. અફાટ કચ્છના રણમાં ત્રણ દિવસ ભટક્યા, વરસાદી પાણીના ખાબોચિયાંમાંથી પાણી પીને જીવન જાળવ્યું. ચોથા દિવસે ભૂખ-તરસથી અશક્ત થઈને ખડીર બેટના રતનપર ગામની સીમમાં લાકડાં કાપતા મજૂળ રહેઠાણોના ખાટલા પર સૂઈ ગયા હતા. સ્થાનિક ગ્રામજનોએ તેમને જોઈને ખડીર પોલીસને જાણ કરી અને બંનેને પકડી પાડવામાં આવ્યા હતા.
પહેલાં કિશોર હોવાનો દાવો, મેડિકલ રિપોર્ટે ખોલી પોલ પકડાયા બાદ બંનેએ પોલીસ સમક્ષ પોતે કિશોરવયના હોવાનો દાવો કર્યો હતો. જોકે, ઘટનાના ત્રીજા દિવસે ભુજની જી.કે. જનરલ હોસ્પિટલમાં પોલીસ જપ્તા હેઠળ મેડિકલ ટેસ્ટ કરાવવામાં આવ્યા. રિપોર્ટમાં યુવક ૨૦ વર્ષ અને યુવતી ૧૮-૨૦ વર્ષની હોવાનું સાબિત થયું. આ પછી બંને સામે પાસપોર્ટ એક્ટ-૧૯૨૦ તથા ફોરેનર્સ એક્ટ-૧૯૪૬ની કલમો હેઠળ ગુનો નોંધાઈ ગયો.
આજે કોર્ટમાં રજૂઆત &ndash; જેલ હવાલે આજે બંનેને ખડીર પોલીસે ભચાઉ કોર્ટમાં રજૂ કર્યા. નામદાર જ્યુડિશિયલ મેજિસ્ટ્રેટે સુનાવણી બાદ બંને પ્રેમી પંખીડાને ગાંધીધામની ગળપાદર જેલ હવાલે કરવાનો આદેશ કર્યો. પોલીસે તરફથી જણાવવામાં આવ્યું કે હજુ સુધી પાકિસ્તાન તરફથી કોઈ ડિપ્લોમેટિક કે કોન્સ્યુલર એક્સેસની માંગણી નથી આવી અને બંનેના પરિવારજનોએ પણ કોઈ સંપર્ક કર્યો નથી.
તપાસ અધિકારીનું નિવેદન ખડીર પોલીસ સ્ટેશનના પીઆઈ એમ.એન. દવેએ જણાવ્યું, &ldquo;કોર્ટ પ્રક્રિયા પૂર્ણ થઈ છે. બંનેને પાસપોર્ટ એક્ટના ભંગ બદલ ગુનો નોંધાયો છે. કોર્ટના આદેશ મુજબ આજે જ તેમને ગાંધીધામ જેલ મોકલી દેવાયા છે. પાકિસ્તાન તરફથી હજુ સુધી કોઈ સત્તાવાર સંપર્ક થયો નથી.&rdquo;
આવા કેસમાં શું થાય છે? નિષ્ણાતોના જણાવ્યા મુજબ, જો કોઈ વ્યક્તિ ભૂલથી સરહદ ઓળંગે તો ડિપ્લોમેટિક ચેનલ દ્વારા પરત મોકલવામાં આવે છે, પરંતુ જાણીજોઈને ઘૂસણખોરી કરનારા વિરુદ્ધ ભારતીય કાયદા મુજબ કાર્યવાહી થાય છે &ndash; જેમાં કોર્ટમાં ચાર્જશીટ દાખલ થયા બાદ સજા થઈ શકે છે અને પછી ડિપોર્ટેશનની પ્રક્રિયા થાય છે.
આ કેસે ફરી એકવાર કચ્છની સરહદી સુરક્ષા અને પ્રેમ માટે જીવ જોખમમાં મૂકનારા યુવાનોની વાત ચર્ચામાં લાવી દીધી છે.

પાકિસ્તાનથી ભાગેલા પ્રેમીપંખીડાને ગ્રામજનોએ ઝડપી લીધા હતા.

કચ્છના ખડીર બેટમાં દોઢ મહિના પહેલાં ગેરકાયદે ઘૂસી આવ્યા હતા, પાસપોર્ટ એક્ટના ભંગ બદલ ગુનો

November 21, 2025 | 01:49 IST