પાકિસ્તાને 3 કલાકમાં સીઝ ફાયરનો ભંગ કર્યો: જમ્મુ-કશ્મીર અને રાજસ્થાનમાં ડ્રોન હુમલા

ભારત અને પાકિસ્તાન વચ્ચે શનિવારે સાંજે 5 વાગ્યાથી યુદ્ધવિરામ લાગુ થયો. તેમ છતાં પાકિસ્તાન દ્વારા જમ્મુ-કાશ્મીરના અખનૂર, પૂંછ, નૌશેરા, શ્રીનગર, આરએસપુરા, સાંબા, ઉધમપુરમાં ગોળીબાર કરવામાં આવી રહ્યો છે. રાજૌરીમાં તોપમારો કરવામાં આવ્યો. જમ્મુ-કાશ્મીરના મુખ્યમંત્રી ઓમર અબ્દુલ્લાએ કહ્યું- આ કેવા પ્રકારનો યુદ્ધવિરામ છે? શ્રીનગરમાં વિસ્ફોટોના અવાજો સંભળાઈ રહ્યા છે.

તમને જણાવી દઈએ કે યુએસ પ્રમુખ ડોનાલ્ડ ટ્રમ્પે X પર પોસ્ટ કરી હતી. ડોનાલ્ડ ટ્રમ્પે કહ્યું હતું કે, 'અમેરિકાની મધ્યસ્થી હેઠળ ગઈકાલે રાત્રે લાંબી ચર્ચા પછી, મને જણાવતા આનંદ થાય છે કે ભારત અને પાકિસ્તાન તાત્કાલિક અને સંપૂર્ણપણે હુમલાઓ બંધ કરવા સંમત થયા છે. હું બંને દેશોને સમજદારીભર્યો નિર્ણય લેવા બદલ અભિનંદન આપું છું.

વિદેશ સચિવ વિક્રમ મિસરીએ પ્રેસ બ્રીફિંગ કરી કહ્યું કે, પાકિસ્તાનના DGMOએ શનિવારે બપોરે 3:35 વાગ્યે ભારતીય DGMOને ફોન કર્યો. શનિવારે સાંજે 5 વાગ્યાથી બંને પક્ષો ગ્રાઉન્ડ, એર અને સમુદ્ર પર તમામ ગોળીબાર અને લશ્કરી કાર્યવાહી બંધ કરવા સંમત થયા છે, આ કરારનો અમલ કરવા માટે બંને પક્ષોને સૂચનાઓ આપવામાં આવી છે. તેઓ 12 મેના રોજ બપોરે 12 વાગ્યે ફરી વાત કરશે.

પાકિસ્તાનના વિદેશમંત્રી ઇશાક ડારે કહ્યું કે, પાકિસ્તાન અને ભારત તાત્કાલિક અસરથી યુદ્ધવિરામ પર સંમત થયા છે.' પાકિસ્તાન હંમેશાં તેની સાર્વભૌમત્વ અને પ્રાદેશિક અખંડિતતા સાથે સમાધાન કર્યા વિના આ ક્ષેત્રમાં શાંતિ અને સુરક્ષા માટે પ્રયત્નશીલ રહ્યું છે.

ભારત અને પાકિસ્તાન વચ્ચે સાંજે 5 વાગ્યાથી યુદ્ધવિરામ લાગુ થઈ ગયના 3 કલાક પછી પાકિસ્તાને જમ્મુ-કાશ્મીરના અખનૂર સેક્ટરમાં ભારે ગોળીબાર અને વિસ્ફોટો કર્યા હતા.