પાકિસ્તાન: પોલીસકર્મીઓ પર હુમલો, એક અધિકારીનું મોત, 2 આતંકવાદીઓ ઠાર

પાકિસ્તાનમાં પોલિયો વેક્સિનેશન દરમિયાન સુરક્ષામાં હાજર પોલીસ કર્મચારીઓ ઉપર કેટલાક હથિયાર લઈને આવેલા લોકોએ હુમલો કર્યો હતો. હુમલાની ઘટનામાં એક પોલીસ અધિકારીનું મોત જ્યારે અન્ય એક પોલીસકર્મી ઈજાગ્રસ્ત થયો હતો. 

સૂત્રો જણાવ્યું કે આ ઘટના ત્યારે બની જ્યારે આતંકવાદીઓના એક જૂથે ખૈબર પખ્તુનખ્વા પ્રાંતના ઓરકઝાઈ જિલ્લાના ડાબોરી વિસ્તારમાં પોલિયો વિરોધી ટીમ પર ગોળીબાર કર્યો. પોલીસે જણાવ્યું કે સુરક્ષા દળો અને હુમલાખોરો વચ્ચેની અથડામણમાં બે આતંકીઓ પણ માર્યા ગયા. તેમણે કહ્યું કે પોલીસે એન્કાઉન્ટર સ્થળ પરથી ભાગી ગયેલા હુમલાખોરોને પકડવા માટે આસપાસના વિસ્તારોમાં ઓપરેશન શરૂ કરી દીધું છે.   સમાચાર એજન્સી સિન્હુઆના જણાવ્યા અનુસાર, હજુ સુધી કોઈ જૂથ કે વ્યક્તિએ હુમલાની જવાબદારી લીધી નથી.  અગાઉ સોમવારે, પાકિસ્તાનની નેશનલ ઇન્સ્ટિટ્યૂટ ઑફ હેલ્થ દ્વારા જારી કરાયેલા નિવેદન અનુસાર, પાકિસ્તાને વિવિધ જિલ્લાઓમાં 45 મિલિયનથી વધુ બાળકોને રસી આપવા માટે દેશવ્યાપી રસીકરણ અભિયાન શરૂ કર્યું છે. પાકિસ્તાનમાં સુરક્ષાની સ્થિતિ ગંભીર બની રહી છે કારણ કે છેલ્લા કેટલાક મહિનામાં સુરક્ષાકર્મીઓ પર હુમલાની સંખ્યામાં વધારો થયો છે.   ખૈબર પખ્તુનખ્વા પ્રાંતમાં, ખાસ કરીને, ઘણી સુરક્ષા ચોકીઓ, પોલીસ કાફલાઓ અને અધિકારીઓ પર હુમલાઓ થયા છે. જેમાંના મોટાભાગના હુમલાઓ પ્રતિબંધિત તહરીક-એ-તાલિબાન પાકિસ્તાન (TTP)ને આભારી છે.   પાકિસ્તાનનું કહેવું છે કે TTPને તેની ધરતી પર આતંકવાદી હુમલા કરવા માટે અફઘાનિસ્તાનની તાલિબાન સરકાર તરફથી સંપૂર્ણ સમર્થન મળી રહ્યું છે. જોકે, તાલિબાન સરકાર આ આરોપને નકારી રહી છે.