ભારત પાકિસ્તાન વચ્ચે જંગની સ્થિતિ, કોણ કેટલાં પાણીમાં?

 

પહેલગામમાં 26 નિર્દોષ પ્રવાસીઓની હત્યા બાદ ભારત અને પાકિસ્તાન વચ્ચે યુદ્ધ જેવી સ્થિતિ સર્જાઈ ગઈ છે. ભારતે સ્પષ્ટપણે કહ્યું છે કે આતંકવાદીઓ જ્યાં પણ છુપાયેલા હશે, તેમને મારી નાખવામાં આવશે. આ વાતની જાહેરાત ખુદ વડાપ્રધાન નરેન્દ્ર મોદીએ કરી છે. અગાઉ, સરકારે પાકિસ્તાન પર દબાણ લાવવા માટે સિંધુ જળ સંધિમાંથી ખસી જવા જેવી મહત્વપૂર્ણ જાહેરાતો કરી છે. બીજી તરફ, પાકિસ્તાને પણ શિમલા કરારમાંથી ખસી જવાની જાહેરાત કરી છે. આવી સ્થિતિમાં, ચાલો બંને દેશોની સેનાઓની ક્ષમતા અને તાકાત પર એક નજર કરીએ.

ન્યુક્લિયર વેઇપન (Atomic Bombs)
ભારત પાસે અંદાજે 164 અણુ બોમ્બ, "Agni" શ્રેણી – 5000 કિમી સુધી માર કરતી મિસાઈલો (Agni-V સહિત), "Shaurya", "Prithvi", "K-15", "K-4" – સબમરીનથી ફાયર થતી મિસાઈલ સિસ્ટમ ઉપલબ્ધ છે. જ્યારે પાકિસ્તાન પાસે  અંદાજે 170 અણુ બોમ્બ છે, "Shaheen", "Ghauri", "Nasr" – 70થી 2000 કિમી સુધી મારક ક્ષમતા ધરાવતી મિસાઇલ્સ છે. 

બજેટ અને લશ્કરી
ભારત અને પાકિસ્તાન દુનિયાના એવા દેશોમાં સામેલ છે જે પોતાની સેના પર મોટા પાયે પૈસા ખર્ચ કરે છે. ભારતમાં ૧૪.૫૫ લાખ સક્રિય સૈનિકો છે. આ ઉપરાંત, તેમાં રિઝર્વ સૈનિકો પણ છે. પાકિસ્તાન પાસે 6.54 લાખ સૈનિકો છે. બજેટની વાત કરીએ તો, ભારતનું સંરક્ષણ બજેટ $75 બિલિયન છે જ્યારે પાકિસ્તાનનું બજેટ $7.64 બિલિયન છે.

નૌકાદળ અને વાયુસેના
નૌકાદળ અને વાયુસેનાની દ્રષ્ટિએ પણ ભારત એક મોટી શક્તિ છે. ભારત પાસે 2200 થી વધુ વિમાન અને બે વિમાનવાહક જહાજો છે, જ્યારે પાકિસ્તાન પાસે કોઈ વિમાનવાહક જહાજ નથી. ભારત પાસે ૫૧૩ ફાઇટર પ્લેન છે, જ્યારે પાકિસ્તાન પાસે ૩૨૮ ફાઇટર પ્લેન છે. ભારત પાસે ૮૦ એટેક હેલિકોપ્ટર છે, જ્યારે પાકિસ્તાન પાસે ૫૭ છે. ભારતીય વાયુસેના પાસે સુખોઈ-૩૦ એમકેઆઈ (૨૭૨), રાફેલ (૩૬), મિરાજ-૨૦૦૦ અને મિગ-૨૯ યુપીજી (૬૯) જેવા આધુનિક વિમાનો છે, જ્યારે પાકિસ્તાન પાસે જેએફ-૧૭, જે-૧૦ અને એફ-૧૬ બ્લોક ૧૫ સી/ડી જેવા વિમાનો છે, જેમાંથી ઘણા જૂના છે.

નૌકાદળ શક્તિ
નૌકાદળ શક્તિમાં ભારતનું પ્રભુત્વ છે. ભારત પાસે 293 યુદ્ધ જહાજો છે, જ્યારે પાકિસ્તાન પાસે 121 છે. ભારત પાસે બે વિમાનવાહક જહાજો છે - INS વિક્રમાદિત્ય અને INS વિક્રાંત. પાકિસ્તાન પાસે કોઈ વિમાનવાહક જહાજ નથી. સબમરીનની સંખ્યાની દ્રષ્ટિએ, ભારત પાસે 18 ડીઝલ સંચાલિત અને 1 પરમાણુ સબમરીન (INS અરિહંત) છે, જ્યારે પાકિસ્તાન પાસે ફક્ત 5 ડીઝલ સંચાલિત સબમરીન છે. ભારત ડિસ્ટ્રોયર અને ફ્રિગેટ્સમાં પણ આગળ છે, જ્યાં તેની પાસે ૧૧ ડિસ્ટ્રોયર અને ૧૨ ફ્રિગેટ છે, જ્યારે પાકિસ્તાન પાસે કોઈ ડિસ્ટ્રોયર નથી. તેની પાસે નવ ફ્રિગેટ્સ છે.