લેબનોનનો દાવો, ઈઝરાયેલના હવાઈ હુમલામાં 4 માર્યા ગયા, 27 ઈજાગ્રસ્ત

ઇઝરાયેલ સંરક્ષણ દળોએ સોમવારે રાત્રે બેરૂતના દક્ષિણે શહેરો પર બોમ્બમારો કર્યો હતો. આ હુમલામાં ચાર લોકોના મોત થયા હતા, જ્યારે 27 લોકો ઘાયલ થયા હતા. ઘાયલોમાં એક બાળકીનો પણ સમાવેશ થાય છે. આ હુમલો દેશની સૌથી મોટી હોસ્પિટલ પાસે કરવામાં આવ્યો હતો. આ માહિતી લેબનોનના જાહેર આરોગ્ય મંત્રાલયે આપી હતી.

ખાનગી ન્યૂઝ એજન્સીના જણાવ્યા અનુસાર, ઇઝરાયેલના હુમલાના નિશાના પર દક્ષિણ બેરૂતના બહારના ભાગમાં જન્નાહ વિસ્તારમાં સ્થિત રફિક હરીરી યુનિવર્સિટીની હોસ્પિટલ હતી.

આ કિસ્સામાં, સ્થાનિક લેબનીઝ ટીવી ચેનલ અલ-જાદીદ અનુસાર, લેબનીઝ રેડ ક્રોસ અને સિવિલ ડિફેન્સ ટીમો દ્વારા બચાવ કામગીરી માટે 25 થી વધુ એમ્બ્યુલન્સ વિસ્તારમાં પહોંચી હતી. હોસ્પિટલ નજીક કાટમાળ નીચે ફસાયેલા પીડિતોની શોધખોળ હજુ ચાલુ છે.

એક પછી એક ઈઝરાયેલના અનેક હવાઈ હુમલાઓને કારણે સ્થાનિક લોકોને ઘર છોડવાની ફરજ પડી છે. સ્થાનિક લોકો તેમના ઘર છોડીને સુરક્ષિત સ્થળોએ ગયા છે.

આપને જણાવી દઈએ કે ઈઝરાયેલના ફાઈટર પ્લેન્સે બેરૂત એરપોર્ટ નજીક દક્ષિણી વિસ્તારોની બહારના ભાગમાં ગીચ વસ્તીવાળા ઓજાઈ વિસ્તારમાં પણ હવાઈ હુમલો કર્યો હતો.

સોમવારે રાત્રે, ઇઝરાયેલના યુદ્ધ વિમાનોએ બેરૂતની દક્ષિણે અનેક સ્થળો પર 12 થી વધુ હવાઈ હુમલા કર્યા હતા, જેમાં હેરેટ હરેક, બુર્જ બરજાનેહ, અલ હદાથ, જામોસ અને સેન્ટ થેરેસા જેવા વિસ્તારોનો સમાવેશ થાય છે.

હિઝબુલ્લાહનો નાશ કરવાના ઈરાદા સાથે સપ્ટેમ્બરના અંતથી ઈઝરાયેલની સેના લેબનોન પર ભીષણ હુમલાઓ કરી રહી છે.