Pakistan : લશ્કર-એ-તૈયબાનો ટોચનો કમાન્ડર સૈફુલ્લાહ પાકિસ્તાનના સિંધમાં ઠાર!

પાકિસ્તાન (Pakistan) માટે મોટા સમાચાર છે. લશ્કર-એ-તૈયબાનો કમાન્ડર અને મોટો આતંકવાદી સૈફુલ્લાહ પાકિસ્તાન (Pakistan)ના સિંધ પ્રાંતમાં ઠાર કરવામાં આવ્યો છે. સૈફુલ્લાહ, જેને વિનોદ કુમાર, મોહમ્મદ સલીમ, ખાલીદ, વનિયાલ, વાજીદ, અને સલીમ ભાઈ જેવા અનેક ઉપનામોથી પણ ઓળખવામાં આવતો હતો, તે નેપાળમાં લશ્કર-એ-તૈયબાના સમગ્ર આતંકવાદી મોડ્યુલનું સંચાલન કરતો હતો.

આર્થિક મદદ અને કેડર પૂરા પાડવાનું કામ...

સૈફુલ્લાહનું મુખ્ય કામ લશ્કરની આતંકવાદી ગતિવિધિઓ માટે કેડર અને આર્થિક મદદ પૂરી પાડવાનું હતું. તેણે નેપાળી નાગરિક નગ્મા બાનુ સાથે નિકાહ પણ કર્યા હતા, જે દર્શાવે છે કે તેણે નેપાળમાં પોતાની પકડ મજબૂત કરી હતી. તાજેતરમાં, સૈફુલ્લાહ ખાલીદે પોતાનું ઠેકાણું પાકિસ્તાનના સિંધ પ્રાંતના બદીન જિલ્લાના મતલીમાં બનાવી લીધું હતું. ત્યાંથી તે લશ્કર-એ-તૈયબા અને તેના મોરચા સંગઠન જમાત-ઉદ-દાવા માટે કામ કરતો હતો, જેનો મુખ્ય ઉદ્દેશ્ય આતંકવાદી અભિયાનો માટે ભરતી અને ભંડોળ એકત્રિત કરવાનો હતો.

ભારતમાં અનેક આતંકવાદી હુમલાઓમાં સંડોવણી...

સૈફુલ્લાહ ભારત થયેલા અનેક મોટા આતંકવાદી હુમલાઓમાં સામેલ હતો, જેમાં રામપુરના CRPF કેમ્પ પર થયેલો હુમલો, નાગપુરમાં સંઘ મુખ્યાલય પર થયેલો હુમલો, અને IIsc બેંગલુરુ પર થયેલો બોમ્બ ધમાકો સામેલ છે. સૂત્રો અનુસાર, તેને રવિવારે પાકિસ્તાનના સિંધ પ્રાંતના બદીન જિલ્લાના માટલી તાલુકામાં ઠાર કરવામાં આવ્યો. આ આતંકી સરગના નેપાળના રસ્તે લશ્કરના આતંકવાદીઓને ભારતમાં ઘુસાડવાનું પણ કામ કરતો હતો. પાંચ વર્ષના સમયગાળામાં થયેલા આ હુમલાઓમાં અનેક લોકોના જીવ ગયા હતા અને ભારતીય ધરતી પર લશ્કર-એ-તૈયબાની ગતિવિધિઓમાં ભારે વધારો થયો હતો.