હમાસના આતંકવાદી નેતા યાહ્યા સિનવરની હત્યા: બેન્જામિન નેતન્યાહુ

ઇઝરાયેલના વડાપ્રધાન બેન્જામિન નેતન્યાહુએ ગુરુવારે હમાસના આતંકવાદી નેતા યાહ્યા સિનવરની હત્યાનો દાવો કર્યો હતો. તેણે સિનવારને 7 ઓક્ટોબર, 2023ના રોજ ઇઝરાયેલ પર હમાસના હુમલાનો મુખ્ય કાવતરાખોર ગણાવ્યો હતો.

બેન્જામિન નેતન્યાહુએ એક વીડિયો સંદેશ જારી કરીને કહ્યું કે, "હમાસના આતંકવાદી નેતા યાહ્યા સિનવારે 2023માં 7 ઓક્ટોબરે ઈઝરાયેલ પર વિનાશક હુમલાની યોજના બનાવી હતી."

નેતન્યાહુએ તેને હોલોકોસ્ટ પછી યહૂદીઓ પરનો સૌથી ખરાબ હુમલો ગણાવ્યો હતો. આ હુમલામાં, આતંકવાદીઓએ 1200 લોકોની નિર્દયતાથી હત્યા કરી હતી, જેમાં વૃદ્ધો, હોલોકોસ્ટ બચી ગયેલા અને બાળકોનો સમાવેશ થાય છે. મહિલાઓ પર અત્યાચાર ગુજારવામાં આવ્યો,વડાપ્રધાને એમ પણ કહ્યું કે આજે આ દુષ્ટતાનો માસ્ટરમાઈન્ડ યાહ્યા સિનવર નથી રહ્યો. ઇઝરાયેલ સંરક્ષણ દળોના બહાદુર સૈનિકોએ રફાહમાં તેને માર્યો હતો. તેમણે કહ્યું કે આ ગાઝામાં યુદ્ધનો અંત નથી, પરંતુ તે ચોક્કસપણે અંતની શરૂઆત છે.

નેતન્યાહુએ વધુમાં કહ્યું કે આ યુદ્ધ આવતીકાલે સમાપ્ત થઈ શકે છે. પરંતુ આ ત્યારે જ શક્ય બનશે જ્યારે હમાસ તેના હથિયારો નીચે મૂકે અને આપણા બંધકોને પરત કરે. તેમણે કહ્યું કે હમાસે ગાઝામાં 101 બંધકોને પકડી રાખ્યા છે, જેઓ 23 દેશોના નાગરિક છે.

તેમણે ચેતવણી આપી હતી કે જો કોઈએ બંધકોને નુકસાન પહોંચાડવાનો પ્રયાસ કર્યો, તો ઈઝરાયેલ તેમને શોધી કાઢશે અને તેમને ન્યાય માટે લાવશે. તેમણે વધુમાં કહ્યું કે ઈરાન દ્વારા બનાવવામાં આવેલ આતંકની ધરી આપણી સામે એક પછી એક તૂટી રહી છે.નસરાલ્લાહ, તેના નાયબ અને અન્ય આતંકવાદી નેતાઓ હવે રહ્યા નથી. ઈરાનના શાસન દ્વારા પોતાના લોકો અને ઈરાક, સીરિયા, લેબેનોન અને યમનના લોકો પર લાદવામાં આવેલ આતંકનું શાસન પણ ખતમ થઈ જશે.

તેમણે કહ્યું કે જેઓ મધ્ય પૂર્વમાં સમૃદ્ધિ અને શાંતિનું ભવિષ્ય ઇચ્છે છે તેઓએ એક થવું જોઈએ અને સારા ભવિષ્યના નિર્માણ માટે સાથે મળીને કામ કરવું જોઈએ. સાથે મળીને આપણે અંધકારની શક્તિઓને પાછળ ધકેલી શકીએ છીએ અને બધા માટે પ્રકાશ અને આશાનું ભવિષ્ય બનાવી શકીએ છીએ.