ફિલિપાઈન્સમાં શક્તિશાળી કાલમેગી વાવાઝોડા એ ભયાનક તબાહી મચાવી છે. અધિકારીઓના જણાવ્યા અનુસાર, આ વિનાશક વાવાઝોડાને કારણે અત્યારસુધીમાં 114 લોકોના મોત થયા છે, જ્યારે 26 લોકો હજુ પણ ગુમ છે. આ વાવાઝોડાનો સૌથી વધુ કહેર મધ્ય ફિલિપાઇન્સના સેબુ પ્રાંતમાં જોવા મળ્યો છે, જ્યાં અચાનક આવેલા પૂર અને ભૂસ્ખલનને કારણે 49 લોકોએ જીવ ગુમાવ્યા છે.
લોકોને છત પર આશ્રય લેવાની ફરજ પડી
નાગરિક સુરક્ષા કાર્યાલયના ડેટા મુજબ, સેબુમાં થયેલા મોટાભાગના મૃત્યુ પૂરના પાણીમાં ડૂબવાથી અને ભૂસ્ખલનથી થયા છે. કાલમેગી વાવાઝોડાના કારણે અનેક રહેણાંક વિસ્તારો પાણીમાં ડૂબી ગયા હતા અને લોકોને છત પર આશ્રય લેવાની ફરજ પડી હતી. સેબુમાં તબાહી બમણી થઈ છે, કારણ કે આ પ્રાંત હજી સપ્ટેમ્બરમાં આવેલા 6.9 તીવ્રતાના ભૂકંપમાંથી બહાર આવી રહ્યો હતો.
રાષ્ટ્રપતિ દ્વારા કટોકટીની ઘોષણા&nbsp;
ફિલિપાઇન્સના રાષ્ટ્રપતિ ફર્ડિનાન્ડ આર. માર્કોસ જુનિયરે દેશમાં થયેલી વ્યાપક જાનહાનિ અને અસરગ્રસ્ત વિસ્તારોને ધ્યાનમાં રાખીને સમગ્ર દેશમાં કટોકટી જાહેર કરી છે અને રાહત કાર્યો માટે ફંડ પણ રિલીઝ કર્યો છે. આ વાવાઝોડાને કારણે 5 લાખથી વધુ લોકો બેઘર બન્યા છે અને કુલ 20 લાખથી વધુ લોકો અસરગ્રસ્ત થયા છે.&nbsp;
અનેક વિસ્તારોમાં બચાવ કાર્ય રોકવું પડ્યું
રાહત સામગ્રી પહોંચાડી રહેલું ફિલિપાઈન્સ એર ફોર્સનું એક હેલિકોપ્ટર મંગળવારે અગૂસન ડેલ સૂર વિસ્તારમાં ક્રેશ થયું હતું, જેમાં 6 સૈનિકો શહીદ થયા હતા. સેનાએ જણાવ્યું કે, તેમની ટીમ મદદ પહોંચાડતી હતી, પરંતુ તોફાની હવામાનને કારણે આ દુર્ઘટના સર્જાઈ. રેડ ક્રોસને સેંકડો કોલ્સ મળ્યા હતા, પરંતુ પાણીનું સ્તર ન ઘટે ત્યાં સુધી ઘણા વિસ્તારોમાં બચાવ કાર્ય રોકવું પડ્યું હતું.
વાવાઝોડાનું આગળ વધવું અને વૈશ્વિક ચિંતા
કાલમેગી વાવાઝોડું હવે દક્ષિણ ચીન સાગર તરફ આગળ વધી ગયું છે, જ્યાં તેની પવનની ગતિ 130-180 કિમી/કલાકની રહી છે. હાલમાં આ વાવાઝોડું દક્ષિણ ચીન સાગરમાં વધુ શક્તિ એકઠી કરી રહ્યું છે અને વિયેતનામમાં લેન્ડફોલ થવાની આશંકા છે. સંયુક્ત રાષ્ટ્ર દ્વારા ફિલિપાઈન્સને મદદનું વચન આપવામાં આવ્યું છે. વાર્ષિક ધોરણે લગભગ 20 જેટલા વાવાઝોડાનો સામનો કરતું ફિલિપાઈન્સ, જે 'રિંગ ઓફ ફાયર'માં આવેલું છે, ત્યાં આ પ્રકારના શક્તિશાળી વાવાઝોડા આબોહવા પરિવર્તનની ગંભીર અસરો દર્શાવે છે અને દેશની નબળાઈઓને ઉજાગર કરે છે.

કાલમેગી વાવાઝોડા એ ફિલિપાઈન્સમાં ભારે તબાહી મચાવી, જેથી 114 લોકોના મોત થયા છે અને 26 ગુમ

November 6, 2025 | 23:32 IST