ગાઝામાં યુદ્ધવિરામ બાદ ઇઝરાયલનો હવાઇ હુમલો, 200 લોકોના મોત

ગાઝાના આરોગ્ય મંત્રાલયે જણાવ્યું છે કે આજે સવારે ઇઝરાયલી હવાઈ હુમલામાં ઓછામાં ઓછા 200 લોકો માર્યા ગયા છે. યુદ્ધવિરામ પછી ગાઝામાં કરવામાં આવેલો આ સૌથી મોટો હુમલો છે. જેમાં આટલા બધા લોકોના મોત થયા છે. દરમિયાન, હમાસે ચેતવણી આપી છે કે ગાઝામાં ઇઝરાયલના નવા હુમલાઓ યુદ્ધવિરામનું ઉલ્લંઘન છે અને બંધકોના જીવનને જોખમમાં મૂકી શકે છે.

પેલેસ્ટિનિયન અધિકારીઓએ આ હુમલામાં ઓછામાં ઓછા 200 લોકોના મોત થયાની જાણ કરી છે. મધ્ય ગાઝામાં અલ-અક્સા શહીદ હોસ્પિટલમાં સ્થિત મંત્રાલયના પ્રવક્તા ખલીલ દેગરાને મંગળવારે સવારે અપડેટ કરેલા ટોલ આંકડા આપ્યા. જાન્યુઆરીમાં યુદ્ધવિરામ અમલમાં આવ્યા પછી ગાઝામાં આ સૌથી ગંભીર હુમલો હોવાનું કહેવામાં આવી રહ્યું છે.

બીજી તરફ, વડા પ્રધાન બેન્જામિન નેતન્યાહૂએ કહ્યું કે તેમણે હુમલો કરવાનો આદેશ આપ્યો કારણ કે યુદ્ધવિરામ લંબાવવાની વાટાઘાટોમાં કોઈ નોંધપાત્ર પ્રગતિ થઈ નથી. નેતન્યાહૂના કાર્યાલયે જણાવ્યું હતું કે ઇઝરાયલ હવે લશ્કરી તાકાત વધારીને હમાસ સામે કાર્યવાહી કરશે.

ઇઝરાયલે હવાઈ હુમલાનું કારણ હમાસ દ્વારા બંધકોને મુક્ત કરવાનો સતત ઇનકાર હોવાનું જણાવ્યું હતું. ઇઝરાયલે કહ્યું કે તે હમાસના આતંકવાદીઓ પર હવાઈ હુમલા કરશે. દરમિયાન, ઇઝરાયલી હુમલા બાદ ગાઝા પટ્ટીમાં શાળાઓ બંધ કરી દેવામાં આવી હતી. હમાસે ઇઝરાયલ પર યુદ્ધવિરામ કરારનું ઉલ્લંઘન કરવાનો આરોપ લગાવ્યો છે. હમાસે એક નિવેદન બહાર પાડીને કહ્યું કે નેતન્યાહૂ અને તેમની કટ્ટરપંથી સરકારે યુદ્ધવિરામ કરારનું ઉલ્લંઘન કર્યું છે, જેના કારણે બંધકોના ભવિષ્ય અંગે અનિશ્ચિતતા ફેલાઈ છે.

ઇઝરાયલે બુરેજી વિસ્તારમાં શરણાર્થી કેમ્પો પર હુમલો કર્યો. વિસ્થાપિત પેલેસ્ટિનિયનોએ એક શાળામાં આશરો લીધો હતો; તે શાળાને પણ નિશાન બનાવવામાં આવી હતી. હુમલા પહેલા ઇઝરાયલે ગાઝાને ખોરાક, દવા, ઇંધણ વગેરેનો પુરવઠો પણ બંધ કરી દીધો હતો, જેના કારણે ગાઝામાં દુષ્કાળની સ્થિતિ સર્જાઈ છે. આ હુમલા એવા સમયે થયા છે જ્યારે ઇઝરાયલ અને હમાસ વચ્ચે યુદ્ધવિરામ કરારના બીજા તબક્કા અંગે વાતચીત ચાલી રહી છે. જોકે, બંને પક્ષો એકબીજા પર યુદ્ધવિરામ કરારનું ઉલ્લંઘન કરવાનો આરોપ લગાવી રહ્યા છે. હમાસ પાસે હજુ પણ 24 જીવંત બંધકો છે અને અંદાજ છે કે બીજા 35 બંધકો માર્યા ગયા છે.

હમાસે એક નિવેદનમાં ઇઝરાયલ દ્વારા કરવામાં આવેલા હુમલાઓની નિંદા કરી અને કહ્યું કે આ હુમલાઓએ બંધકોના ભવિષ્યને જોખમમાં મૂક્યું છે. ઇઝરાયલી હુમલાઓએ હમાસ દ્વારા બંધક બનાવવામાં આવેલા લગભગ 24 ઇઝરાયલી નાગરિકોના ભવિષ્ય પર શંકા ઉભી કરી છે, જેઓ હજુ પણ જીવંત હોવાનું માનવામાં આવે છે. તે જ સમયે, એક ઇઝરાયલી અધિકારીએ નામ ન આપવાની શરતે જણાવ્યું હતું કે ઇઝરાયલ હમાસના આતંકવાદીઓ, તેના નેતાઓ અને માળખાગત સુવિધાઓ પર હુમલો કરી રહ્યું છે અને હવાઈ હુમલાઓથી આગળ વધીને આ અભિયાનને વિસ્તૃત કરવાની યોજના બનાવી રહ્યું છે.