ઇઝરાયેલની ચૂંટણીમાં ગોટાળાના આરોપો, પણ પોલીસને પુરાવા ન મળ્યા! હવે નેતન્યાહૂ શું કરશે?

Israel Election 2026: ઇઝરાયેલની સંસદીય ચૂંટણી બાદ વડાપ્રધાન બેન્જામિન નેતન્યાહૂની લિકુડ પાર્ટી અને આરબ પક્ષો વચ્ચે રાજકીય વિવાદ વકર્યો છે. લિકુડે આરબ પક્ષો પર ચૂંટણીમાં ગેરરીતિ, મતદારોને ધમકાવવા અને મત ખરીદવા જેવા ગંભીર આરોપો લગાવ્યા છે. જોકે, ઇઝરાયેલી પોલીસે જણાવ્યું છે કે આ આરોપોને સમર્થન આપતા તપાસ અથવા ગુપ્તચર પુરાવા હાલ તેમની પાસે નથી. બીજી તરફ, કેન્દ્રીય ચૂંટણી સમિતિએ મળેલી ફરિયાદોની સમીક્ષા ચાલુ રાખી છે.

લિકુડનો આરોપ: ચૂંટણીમાં ગેરરીતિ થઈ
લિકુડ પાર્ટીએ આરોપ લગાવ્યો હતો કે આરબ પક્ષોએ ચૂંટણી દરમિયાન મતદારોને એકત્ર કરવા માટે લાંચ, ધાકધમકી, હિંસા, છેતરપિંડી અને પ્રતિબંધિત સોફ્ટવેરનો ઉપયોગ કર્યો હોવાની શંકા છે. પાર્ટીએ આક્ષેપોને ઇઝરાયેલની ચૂંટણી પ્રક્રિયા સાથે જોડાયેલી ગંભીર બાબત ગણાવી હતી. લિકુડે પોલીસ, આંતરિક સુરક્ષા એજન્સી શિન બેટ અને કેન્દ્રીય ચૂંટણી સમિતિને તાત્કાલિક તપાસ કરવાની માંગ કરી હતી. પાર્ટીનો દાવો હતો કે તેની પાસે સેંકડો જુબાનીઓ અને અન્ય સામગ્રી છે, જે તપાસ અધિકારીઓને સોંપવામાં આવશે. જોકે, આ આરોપો હજુ સાબિત થયા નથી.

ઇઝરાયેલી પોલીસનો જવાબ શું છે?
લિકુડના આરોપો અંગે ઇઝરાયેલી પોલીસે જણાવ્યું કે મતદાનના દિવસે ચૂંટણીની નિષ્પક્ષતા પર સવાલ ઊભા કરે તેવી અસામાન્ય ઘટનાઓ બહુ ઓછી બની હતી. પોલીસના જણાવ્યા મુજબ, આવી ઘટનાઓ અગાઉની ચૂંટણીઓની સરખામણીએ પણ ઓછી હતી. પોલીસે સ્પષ્ટ કર્યું કે લિકુડના આરોપોને સમર્થન આપે તેવા તપાસ અથવા ગુપ્તચર પુરાવા હાલ ઉપલબ્ધ નથી.

વિદેશી ભંડોળ અને મત ખરીદીની શંકા
ચૂંટણી બાદ વિદેશી ભંડોળ અને સંભવિત દખલગીરીનો મુદ્દો પણ ચર્ચામાં આવ્યો છે. ચૂંટણી પ્રક્રિયા સાથે સંકળાયેલા અધિકારીઓને વિદેશી નાણાં અને મત ખરીદી અંગેની શંકાઓ તપાસવા જણાવાયું હોવાના અહેવાલ છે. મુસ્લિમ બ્રધરહુડ સાથે જોડાયેલા ભંડોળ અંગે પણ દાવા કરવામાં આવ્યા છે.

આરબ પક્ષો સરકાર રચવામાં બની શકે છે મહત્ત્વપૂર્ણ
27 ઓક્ટોબર, 2026ના રોજ યોજાયેલી ઇઝરાયેલની સંસદીય ચૂંટણીના પ્રારંભિક અંદાજ મુજબ, આરબ પક્ષોને લગભગ 19 બેઠકો મળી શકે છે. ઇઝરાયેલની સંસદ, નેસેટમાં કુલ 120 બેઠકો છે અને સરકાર બનાવવા માટે 61 બેઠકોની જરૂર પડે છે. પ્રારંભિક આંકડાઓ મુજબ, નેતન્યાહૂનું ગઠબંધન બહુમતીથી દૂર દેખાતું હતું. આવી સ્થિતિમાં આરબ પક્ષોનો ટેકો સરકાર રચવાની વાટાઘાટોમાં મહત્ત્વપૂર્ણ બની શકે છે. આ રાજકીય ગણતરીઓ વચ્ચે લિકુડના આરોપોએ ચૂંટણી બાદનો વિવાદ વધુ વધાર્યો છે. હાલમાં પોલીસના નિવેદન અને લિકુડના આરોપો વચ્ચે મતભેદ છે. હવે ચૂંટણી સમિતિની સમીક્ષા અને તપાસમાંથી શું બહાર આવે છે તેના પર ઇઝરાયેલની રાજકીય સ્થિતિની આગળની દિશા નિર્ભર રહેશે.