ઇઝરાયેલે સીરિયામાં ફેંક્યો ભૂકંપ બોમ્બ

રાષ્ટ્રપતિ બશર અલ-અસદની સરકારના પતન અને બળવાખોરો દ્વારા તેના કબજા પછી પણ ઇઝરાયેલે સીરિયામાં વિનાશ વેરવાનું ચાલુ રાખ્યુ છે. ઈઝરાયેલ સીરિયા પર ભારે બોમ્બમારો કરી રહ્યું છે. તે સીરિયન સૈન્ય મથકોને નષ્ટ કરી રહ્યું છે જેથી સીરિયન સેનાના ખતરનાક શસ્ત્રો બળવાખોરોના હાથમાં ન આવે. સાથે જ તે બળવાખોરોને હરાવવા માટે તમામ શક્ય પ્રયાસો કરી રહ્યું છે. આ દરમિયાન ઈઝરાયેલે સીરિયાની ધરતીને હલાવવા માટે એક નવો પ્રયોગ કર્યો હતો. જેણે સીરિયાને ભૂકંપની જેમ હચમચાવી નાખ્યું.

ઈઝરાયેલે સીરિયાની 23મી એર ડિફેન્સ બ્રિગેડના બેઝ અને નજીકની સુવિધાઓને નષ્ટ કરી દીધી છે. આ સાથે ભૂકંપ બોમ્બ નામના અત્યંત શક્તિશાળી બોમ્બ પણ છોડવામાં આવ્યા હતા. આ વિસ્ફોટો એટલા જોરદાર હતા કે સીરિયાની ધરતી ધ્રૂજી ગઈ. તેની તીવ્રતા પણ રિક્ટર સ્કેલ પર 3.0 માપવામાં આવી હતી. આનાથી સીરિયન લોકો હચમચી ગયા.

સીરિયા પર બોમ્બ ધડાકા કરવા પાછળ ઈઝરાયેલના પોતાના સુરક્ષા કારણો છે. વાસ્તવમાં, હિઝબુલ્લાહ અસદ સરકારનું સમર્થક છે અને તેણે બળવાખોરો સામે લડવા માટે તેના હજારો લડવૈયાઓને સીરિયા મોકલ્યા છે. જ્યારથી અસદ રશિયા ભાગી ગયા છે, ત્યારથી હિઝબુલ્લાએ કહેવાનું શરૂ કર્યું છે કે તે બળવાખોરો સામે યુદ્ધ ચાલુ રાખશે. આવી સ્થિતિમાં ઈઝરાયેલને ભય છે કે સીરિયન સરકારના સૈન્ય મથકો પર રાખવામાં આવેલા ખતરનાક, અત્યાધુનિક અને શક્તિશાળી હથિયારો હિઝબુલ્લાહ જેવા જૂથોના હાથમાં આવી શકે છે. તેથી ઈઝરાયેલ આ સૈન્ય મથકોને નષ્ટ કરવામાં વ્યસ્ત છે.

ઈઝરાયેલના વડાપ્રધાન બેન્જામિન નેતન્યાહુએ કહ્યું છે કે આ હુમલાઓનો હેતુ સુરક્ષા જોખમોને નિષ્ફળ બનાવવા અને ઈઝરાયેલની ઉત્તરીય સરહદ પર સ્થિરતા જાળવી રાખવાનો છે. તમને જણાવી દઈએ કે સીરિયામાં દોઢ દાયકાથી ગૃહયુદ્ધ ચાલી રહ્યું હતું. જેનો તાજેતરમાં અંત આવ્યો છે. આ લડાઈમાં 5 લાખથી વધુ લોકો માર્યા ગયા હતા. સીરિયામાં બળવાખોરોએ સત્તા પર કબજો જમાવ્યો હોવાથી ઈઝરાયેલ ચિંતિત છે. આ કારણે તે સીરિયાની સરહદ પર સ્થિત ગોલાન હાઇટ્સમાં પોતાનું નિયંત્રણ મજબૂત કરવા માટે પણ તેની સંપૂર્ણ તાકાતનો ઉપયોગ કરી રહ્યું છે.