ઇઝરાયેલે લેબનોનની સરકારી બિલ્ડીંગ પર કર્યો હુમલો, છ લોકોનાં મોત

લેબનોનની સરકારી ઇમારત લેબનીઝ મ્યુનિસિપલ બિલ્ડિંગ પર ઇઝરાયેલે કરેલા હવાઈ હુમલામાં છ લોકો મૃત્યુ જ્યારે 43 ઘાયલ થયા. લેબનોનની સેનાના જણાવ્યા અનુસાર બુધવારે ઇઝરાયેલી દળો દ્વારા લેબનોનમાં નાબાતીહ નગરપાલિકાની ઇમારતોને નિશાન બનાવવામાં આવી હતી. ઈઝરાયેલ દ્વારા કરવામાં આવેલા આ હવાઈ હુમલામાં મેયર સહિત છ લોકો માર્યા ગયા હતા અને 43 લોકો ઘાયલ થયા હતા.

સ્થાનિક એજન્સીના અહેવાલ મુજબ, ઇઝરાયેલના એક ફાઇટર પ્લેને નબાતીહ મ્યુનિસિપલ બિલ્ડીંગ અને મ્યુનિસિપલ કોર્પોરેશન બિલ્ડીંગ પર હવાથી જમીન પર પ્રહાર કરતી એક પછી એક એમ ચાર મિસાઇલો છોડી હતી. આ હુમલામાં મેયર અહેમદ કાહિલ અને નગરપાલિકાના કેટલાક સભ્યો માર્યા ગયા હતા અને ઘણા લોકો ઘાયલ થયા હતા. આ હુમલામાં ઈમારતોને ભારે નુકસાન થયું છે.

ઇઝરાયેલના હુમલા બાદ, નાગરિક સંરક્ષણ દળો, લેબનીઝ રેડ ક્રોસ અને ઇસ્લામિક હેલ્થ ઓથોરિટી સાથે મળી ઇમારતોમાંથી કાટમાળ દૂર કરવા અને ગુમ થયેલા લોકોની શોધવા માટે બચાવ કામગીરી કરવામાં આવી રહી છે.

તમને જણાવી દઈએ કે હિઝબુલ્લા સાથે વધતા તણાવ વચ્ચે 23 સપ્ટેમ્બરથી ઇઝરાયેલની સેના લેબનોન પર સતત હવાઈ હુમલા કરી રહ્યુ છે. 8 ઓક્ટોબર, 2023 ના રોજ હિઝબુલ્લાહ-ઇઝરાયેલ સંઘર્ષની શરૂઆતથી લેબનોન પર હવાઈ હુમલામાં 2,350 લોકો માર્યા ગયા છે, જ્યારે આરોગ્ય મંત્રાલયના ડેટા અનુસાર ઘાયલોની સંખ્યા 10,906 પર પહોંચી ગઈ છે.