ઈરાનના સુપ્રીમ લીડર આયાતુલ્લાહ ખામેનેઈનું મોત

મધ્ય પૂર્વના ઈતિહાસમાં અત્યાર સુધીનો સૌથી મોટો ઉલટફેર જોવા મળ્યો છે. ઈરાન પર અમેરિકા અને ઈઝરાયલ દ્વારા કરવામાં આવેલા અત્યંત ઘાતક અને વ્યૂહાત્મક હવાઈ હુમલામાં ઈરાનના સર્વોચ્ચ નેતા આયાતુલ્લાહ અલી ખામેનેઈનું અવસાન થયું છે. ઈરાની સત્તાવાર મીડિયા 'પ્રેસ ટીવી' અને ઈરાની સેના આઈઆરજીસી (IRGC) દ્વારા આ સમાચારની સત્તાવાર પુષ્ટિ કરવામાં આવી છે. આ હુમલાએ સમગ્ર વિશ્વમાં હલચલ મચાવી દીધી છે.

અમેરિકી પ્રમુખ ડોનાલ્ડ ટ્રમ્પની મોટી જાહેરાત : 

આ સૈન્ય ઓપરેશનની સફળતા બાદ અમેરિકી રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર જાહેરાત કરી કે દુનિયાના સૌથી શક્તિશાળી ગણાતા નેતાઓમાંથી એકનો હવે અંત આવ્યો છે. ટ્રમ્પના જણાવ્યા અનુસાર, ઈઝરાયલની ગુપ્તચર એજન્સીઓ સાથે મળીને કરવામાં આવેલું આ ઓપરેશન એટલું સચોટ હતું કે ખામેનેઈ અને તેમની સાથેના અન્ય ટોચના નેતાઓ બચી શક્યા નથી. આ ઘટનાને ઈરાની જનતા માટે આઝાદીના નવા સૂર્યોદય સમાન ગણાવવામાં આવી છે.

ઈરાનમાં માતમ: 40 દિવસનો રાષ્ટ્રીય શોક

ઈરાની ન્યૂઝ એજન્સીઓના રિપોર્ટ અનુસાર, આ હવાઈ હુમલામાં માત્ર ખામેનેઈ જ નહીં પરંતુ તેમના પરિવારના સભ્યો પણ માર્યા ગયા છે. ઈઝરાયલના વડાપ્રધાન બેન્જામિન નેતન્યાહુએ સંકેત આપ્યો છે કે જે મહેલમાં ખામેનેઈ છુપાયેલા હતા તેને સંપૂર્ણપણે જમીનદોસ્ત કરી દેવામાં આવ્યો છે. આ ઘટના બાદ ઈરાન સરકારે દેશમાં 40 દિવસના જાહેર શોકની જાહેરાત કરી છે.

ઈરાની સેનામાં મચેલી અફરાતફરી : 

રિપોર્ટ્સ સૂચવે છે કે સર્વોચ્ચ નેતાના મોત બાદ ઈરાની ક્રાંતિકારી ગાર્ડ્સ (IRGC) અને સ્થાનિક પોલીસમાં ભારે નાસભાગ મચી ગઈ છે. અમેરિકી પ્રશાસન તરફથી દાવો કરવામાં આવ્યો છે કે ઈરાની સૈનિકો હવે લડવાના મૂડમાં નથી અને તેઓ સુરક્ષાની ખાતરી માંગી રહ્યા છે. સૈનિકોને શરણાગતિ સ્વીકારવા માટે અપીલ કરવામાં આવી છે જેથી દેશમાં વધુ રક્તપાત અટકાવી શકાય.

હજુ પણ હુમલા ચાલુ રહેવાની શક્યતા : 

અમેરિકાએ સ્પષ્ટ કર્યું છે કે માત્ર એક નેતાનો અંત એ લક્ષ્ય નથી. મધ્ય પૂર્વમાં કાયમી શાંતિ સ્થાપવા માટે ઈરાનના સૈન્ય ઠેકાણાઓ અને વ્યુહાત્મક સ્થળો પર હજુ પણ બોમ્બમારો ચાલુ રહી શકે છે. આગામી એક અઠવાડિયા સુધી ઓપરેશન ચાલુ રાખવાની ચેતવણી આપવામાં આવી છે જેથી ઈરાનની આક્રમક સૈન્ય શક્તિને સંપૂર્ણપણે તોડી શકાય.