દક્ષિણ આફ્રિકાનું આર્થિક પાટનગર ગણાતું જોહાનિસબર્ગ રવિવારે સવારે ગોળીઓના ગડગડાટથી ધ્રૂજી ઉઠ્યું હતું. શહેરના પરા વિસ્તારમાં આવેલી બેકર્સડાલ ટાઉનશિપમાં અજ્ઞાત હુમલાખોરોએ કરેલા અંધાધૂંધ ગોળીબારમાં ઓછામાં ઓછા 10 લોકોએ જીવ ગુમાવ્યા છે, જ્યારે 10થી વધુ લોકો ગંભીર રીતે ઘાયલ થયા છે. રજાના દિવસે બનેલી આ ઘટનાએ સમગ્ર દક્ષિણ આફ્રિકામાં સુરક્ષા વ્યવસ્થા સામે ગંભીર સવાલો ઉભા કર્યા છે.
ઘટનાની ભયાનકતા&nbsp;
સ્થાનિક પોલીસના જણાવ્યા અનુસાર, હુમલાખોરોએ અચાનક ભીડભાડવાળા વિસ્તારમાં આવીને રસ્તા પર ચાલી રહેલા નિર્દોષ નાગરિકોને નિશાન બનાવ્યા હતા. હુમલાનું કારણ હજુ સુધી અકબંધ છે, પરંતુ પ્રાથમિક દ્રષ્ટિએ આ સામૂહિક હત્યાકાંડ પાછળ કોઈ ગેંગવોર અથવા અસામાજિક તત્વોનો હાથ હોવાની શંકા છે. ઘાયલોને તાત્કાલિક નજીકની હોસ્પિટલમાં ખસેડવામાં આવ્યા છે, જ્યાં કેટલાકની હાલત અત્યંત નાજુક હોવાનું કહેવાય છે.
વિશ્વભરમાં વધતી હિંસા
જોહાનિસબર્ગની આ ઘટના કોઈ છૂટીછવાઈ ઘટના નથી, પરંતુ વિશ્વભરમાં વધી રહેલી અસામાજિક પ્રવૃત્તિઓનું પ્રતિબિંબ છે. અમેરિકા જેવા વિકસિત દેશોમાં પણ 'માસ શૂટિંગ'ની ઘટનાઓ સામાન્ય બની રહી છે, જ્યાં શાળાઓ, મોલ અને સાર્વજનિક સ્થળોએ અંધાધૂંધ ફાયરિંગમાં સેંકડો લોકો દર વર્ષે જીવ ગુમાવે છે.
હથિયારોની સરળ ઉપલબ્ધતા અને માનસિક વિકૃતિના કારણે વિશ્વભરમાં 'ગન કલ્ચર' એક મોટા ખતરા તરીકે ઉભરી આવ્યું છે.
અસામાજિક તત્વોમાં વધારો
વૈશ્વિક સ્તરે આર્થિક અસ્થિરતા અને બેરોજગારીના કારણે યુવાનો ગુનાખોરી તરફ વળી રહ્યા છે. આફ્રિકન દેશોમાં વધતી ગેંગ હિંસા હોય કે પશ્ચિમી દેશોમાં થતા આડેધડ હુમલા, માનવતા આજે અસુરક્ષિત અનુભવી રહી છે. આંતરરાષ્ટ્રીય સ્તરે હથિયારોના નિયંત્રણ અને સુરક્ષા એજન્સીઓના કડક વલણની તાતી જરૂરિયાત છે, જેથી નિર્દોષ નાગરિકોને આવા લોહિયાળ ખેલનો શિકાર બનતા બચાવી શકાય.&nbsp;

દક્ષિણ આફ્રિકામાં માસ ફાયરીંગ

બેકર્સડાલ ટાઉનશિપમાં હુમલાખોરોએ રસ્તા પર ચાલતા લોકો પર ગોળીઓ વરસાવી..

December 21, 2025 | 17:40 IST