હૈતીઃ પુત્ર પર મેલી વિદ્યાની શંકામાં ગેંગના લીડરે 110 લોકોની હત્યા કરી નાખી

હૈતીથી ચોંકાવનારા સમાચાર આવ્યા છે. હૈતીમાં સાઇટ સોલીલ ઝૂંપડપટ્ટીમાં ઓછામાં ઓછા 110 લોકોની હત્યા કરવામાં આવી હતી. એક અગ્રણી માનવાધિકાર જૂથે જણાવ્યું હતું કે ગેંગના એક નેતાએ વૃદ્ધોને નિશાન બનાવ્યા હતા કારણ કે તેમને શંકા હતી કે તેઓએ મેલીવિદ્યા દ્વારા તેના બાળકને બીમાર કર્યા છે.

મીડિયા રિપોર્ટ્સ અનુસાર, ગેંગ લીડર મોનેલ 'મીકાનો' ફેલિક્સે તેના 'વિવ અંસાનમ' ગ્રુપ સાથે મળીને આ હત્યાકાંડને અંજામ આપ્યો હતો. નેશનલ હ્યુમન રાઇટ્સ ડિફેન્સ નેટવર્ક (RNDH) એ જણાવ્યું કે જ્યારે ફેલિક્સનું બાળક બીમાર પડ્યું ત્યારે તેણે  પાદરીનો સંપર્ક કર્યો. પાદરીએ વિસ્તારના વડીલો પર મેલીવિદ્યા દ્વારા બાળકને નુકસાન પહોંચાડવાનો આરોપ મૂક્યો, જેનાથી ફેલિક્સ ગુસ્સે થયો અને હત્યાકાંડનો આદેશ આપ્યો.

નિવેદનમાં કહેવામાં આવ્યું છે કે ગેંગના સભ્યોએ શુક્રવારે ઓછામાં ઓછા 60 અને શનિવારે 50 લોકોને છરીઓ અને કુહાડીઓ વડે મારી નાખ્યા હતા. તમામ મૃતકોની ઉંમર 60 વર્ષથી વધુ હતી. Cite Soleil એ રાજધાની પોર્ટ-ઓ-પ્રિન્સના બંદર નજીક ગીચ વસ્તીવાળી વસાહત છે. તે હૈતીના સૌથી ગરીબ અને સૌથી હિંસક વિસ્તારોમાંનું એક માનવામાં આવે છે.

મીડિયા રિપોર્ટ્સ અનુસાર, ઓક્ટોબરમાં યુનાઈટેડ નેશન્સે અનુમાન લગાવ્યું હતું કે ફેલિક્સ ગેંગમાં 300 લોકો છે અને તે ફોર્ટ દિમાન્ચે અને લા સેલિનની આસપાસ સક્રિય છે. નવેમ્બર 2018 માં લા સલાઇનમાં ઓછામાં ઓછા 71 નાગરિકોની હત્યા કરવામાં આવી હતી, જ્યારે સેંકડો ઘરોને આગ લગાડવામાં આવી હતી. રાજકીય લડાઈથી ઘેરાયેલી સરકાર રાજધાનીમાં અને તેની આસપાસ સશસ્ત્ર ગેંગની વધતી શક્તિને અંકુશમાં લેવા સંઘર્ષ કરી રહી છે.

—IANS