ફ્લોરિડામાં ગુજરાતી યુવકની ધરપકડ

એક વિચિત્ર ઘટનામાં કેનેડાથી ફ્લાઈટ પકડીને ‘માલ’ એટલે કે કેશથી ભરેલું પાર્સલ લેવા માટે અમેરિકા આવેલા ધ્રુમિલ ભટ્ટ નામના ગુજરાતી યુવકની ફ્લોરિડામાં ધરપકડ કરવામાં આવી છે. જેફરસન કાઉન્ટી શેરિફ ઓફિસના જણાવ્યા અનુસાર ધ્રુમિલ ભટ્ટને ઓક્ટોબર 08ના રોજ અરેસ્ટ કરવામાં આવ્યો હતો, સ્કેમર્સ દ્વારા બ્રુક્સ કાઉન્ટીમાં રહેતી એક મહિલા પાસેથી તે 65 હજાર ડોલર લેવા માટે આવ્યો હતો પરંતુ તે જ વખતે પોલીસ તેના સુધી પહોંચી ગઈ હતી

જે વૃદ્ધા પાસેથી ધ્રુમિલને પૈસા લેવાના હતા તે અગાઉ સ્કેમર્સને 5.83 લાખ ડોલર જેટલી જંગી રકમ આપી ચૂકી હતી પરંતુ તેમ છતાંય સ્કેમર્સે તેને ડરાવવા-ધમકાવવાનું ચાલુ રાખ્યું હતું. વિક્ટિમને જે ફોન કોલ્સ આવતા હતા તે ઈન્ડિયાથી ચાલતા ફેક કોલ સેન્ટરમાંથી આવતા હોવાની શક્યતા છે કારણકે ધ્રુમિલ તેમની પાસેથી પૈસા કલેક્ટ કરીને તેને ઈન્ડિયા મોકલવાનો હતો. 

ધ્રુમિલને અરેસ્ટ કરનારી એજન્સીના જણાવ્યા અનુસાર 81 વર્ષના વૃદ્ધાનો થોડા દિવસો પહેલા જ પોલીસે સંપર્ક કર્યો હતો, આ વૃદ્ધાને જુલાઈ મહિનામાં એક ફોન કોલ આવ્યો હતો, કોલરે તેમને પોતાની ઓળખ અમેરિસ બેન્કના કર્મચારી તરીકે આપી હતી, વિક્ટિમને એવું કહેવામાં આવ્યું હતું કે તેના બેન્ક અકાઉન્ટમાં ફ્રોડેન્ટલ એક્ટિવિટી થઈ છે અને ત્યારબાદ કોલરે ફેડરલ ટ્રેડ કમિશનના સ્પેશિયલ એજન્ટ એન્ડ્રયુ ફર્ગસનને કોલ ટ્રાન્સફર કર્યો હતો

જોકે, આ ફોન કરનારો અને જેને કોલ ટ્રાન્સફર કરાયો હતો તે બંને માણસો ફ્રોડ હતા અને તેમણે પોતાની ખોટી ઓળખ આપીને વિક્ટિમને ડરાવ્યા હતા. ફેક સ્પેશિયલ એજન્ટે વિક્ટિમને પોતાના આઈડી કાર્ડનો ફોટોગ્રાફ મોકલીને તેમને વિશ્વાસમાં લેવાનો પ્રયાસ કર્યો હતો. તેણે વિક્ટિમને એવું કહ્યું હતું કે તમારા અકાઉન્ટમાં એક મિલિયનથી પણ વધુની રકમ પડી છે પરંતુ હાલ તે સેફ ના હોવાથી તમારે કમસેકમ અડધી રકમ વિડ્રો કરી તેને ફેડરલ ટ્રેડ કમિશનના એજન્ટને સોંપી દેવી પડશે અને આ કેસની જ્યુરી ટ્રાયલ પૂરી થતાં જ તમામ પૈસા પાછા આપી દેવાશે

વિક્ટિમને જાળમાં ફસાવ્યા બાદ સ્કેમર્સે તેમને સૌ પહેલા 33,000 ડોલરનો કેશિયર્સ ચેક નોર્થ કેરોલાઈનાના એક એડ્રેસ પર મોકલવા માટે કહ્યું હતું અને વિક્ટિમે આમ કર્યું પણ હતું. ત્યારબાદ તેમને બેન્કમાંથી કેશ વિડ્રો કરી તેનાથી ગોલ્ડ ખરીદી આ ગોલ્ડને તેમના ઘરે આવનારા ફેક એજન્ટને આપી દેવા માટે જણાવાયું હતું. વિક્ટિમે પોતાને અપાયેલી સૂચના અનુસાર ત્રણ વાર 95 હજાર ડોલર વિડ્રો કરી તેના ગોલ્ડ કોઈન્સ લીધા હતા અને દર વખતે તેમને કયા પ્રકારના કોઈન્સ લેવાના છે તેની સૂચના આપવામાં આવતી હતી

આ ગોલ્ડ લેવા માટે એજન્ટ કઈ કારમાં તેમના ઘરે આવશે તે પણ વિક્ટિમને જણાવાતું હતું અને જાણે કોઈ અંડરકવર ઓપરેશન ચાલી રહ્યું હોય તેમ એજન્ટને કયો કોડ આપવાનો છે તે પણ સ્કેમર્સ વિક્ટિમને કહેતા હતા. આમ ટુકડે-ટુકડે આ વૃદ્ધા પાસેથી કુલ 5.83 લાખ ડોલર પડાવવામાં આવ્યા હતા અને છેલ્લે તેમને સ્કેમરે મળવા માટે ફ્લોરિડાના મોન્ટિસેલોમાં આવેલા ડોલર જનરલના સ્ટોર પર બોલાવ્યા હતા

સ્કેમર જે કારમાં વિક્ટિમને મળવા અને તેમની પાસેથી માલ પડાવવા આવવાનો હતો તે અંગે અપાયેલા ડિસ્ક્રિપ્શન અનુસારની કાર સ્ટોર પર આવી પહોંચ્યા બાદ પોલીસે તેને ઘેરી લઈને કારની ડ્રાઈવર્સ સીટ પર બેઠેલા ધ્રુમિલ ભટ્ટને પકડી લીધો હતો. અરેસ્ટ ડોક્યુમેન્ટ્સમાં જણાવાયા અનુસાર આરોપીએ પૂછપરછ દરમિયાન અનેકવાર પોલીસને ગેરમાર્ગે દોરવાનો પ્રયાસ કર્યો હતો પરંતુ ત્યારબાદ તેણે કબૂલ્યું હતું કે તેનો કેનેનેડાથી ફ્લાઈટ તેમજ કાર રેન્ટલનો ખર્ચો સ્કેમર્સ દ્વારા આપવામાં આવ્યો હતો. 

ધ્રુમિલે એવી પણ કબૂલાત કરી હતી કે વિક્ટિમ પાસેથી પૈસા કલેક્ટ કરી તેને ઈન્ડિયામાં રહેતા એક ફ્રેન્ડને મોકલવાના હતા. ધ્રુમિલ પર જેફરસન કાઉન્ટી પોલીસે ચોરી, ફ્રોડ તેમજ સિનિયર સિટીઝનની પજવણી કરવા બદલ ફેલોની ચાર્જ લગાવવામાં આવ્યા છે. તેણે ફ્લોરિડા ઉપરાંત જ્યોર્જિયામાંથી પણ આ પ્રકારે પાર્સલ્સ ઉઠાવ્યા હોવાની કબૂલાત કરી હતી પરંતુ ઓક્ટોબર 13ના રોજ તેણે પોતાનો ગુનો કબૂલવાનો ઈનકાર કરી દીધો હતો. 

આમ તો અમેરિકામાં રહેતા હોય તેવા ઘણા ગુજરાતીઓ આ પાર્સલ કાંડમાં પકડાયા બાદ હાલ જેલની હવા ખાઈ રહ્યા છે પરંતુ કોઈ કેનેડાથી પાર્સલ કલેક્ટ કરવા આવ્યું હોય તેવો કદાચ આ બીજો કે ત્રીજો કિસ્સો છે, પાર્સલ કલેક્ટ કરનારો આઈડેન્ટિફાઈ થઈ ગયા બાદ પણ પોલીસના હાથમાં ના આવે તે માટે હવે સ્કેમર્સ કેનેડામાં રહેતા ગુજરાતીઓ પાસેથી પણ આ કામ કરાવી રહ્યા છે.

જોકે, ગયા વર્ષે બનેલા આવા એક કેસમાં કેનેડાથી માલ લેવા આવેલો એક ગુજરાતી યુવક અમેરિકાની પોલીસના હાથમાં આવી ગયો હતો. જો આરોપી અમેરિકાનો ના હોય તો ફ્લાઈટ રિસ્કનું કારણ આપી કોર્ટ તેને બોન્ડ આપવાનો પણ ઈનકાર કરી દેતી હોય છે. ધ્રુમિલ ભટ્ટના કેસમાં તેણે અન્ય લોકો પાસેથી પણ પાર્સલ્સ કલેક્ટ કર્યા હોવાની કબૂલાત કરી હોવાથી હવે તેનું જેલમાંથી છૂટવું મુશ્કેલ બની શકે છે.