અમેરિકામાં ગુજરાતીનું 2 મિલિયન ડોલર ફાર્મસી કૌભાંડ

અમેરિકાના પેન્સિલવેનિયામાં રજિસ્ટર્ડ ગુજરાતીની ફાર્મસી કંપનીનું 2 મિલિયન ડોલરનું ફાર્મસી કૌભાંડ બહાર આવ્યું છે. હસમેન્સ ફાર્મસી નામનો સ્ટોર ચલાવતાં સુભાષ પટેલે મેડીકેડ અને મેડિકેર કૌભાંડ ઉપરાંત ચોરીની કબૂલાત કરી છે. 

અમેરિકામાં ફાર્મસી કંપની ચલાવતા સુભાષ પટેલે 20 લાખ ડોલરનું કૌભાંડ કર્યું છે. સુભાષ પટેલ પર મોટી કાર્યવાહી કરવામાં આવી છે. સુભાષ પટેલની ફાર્મસી કંપનીને કૌભાંડ કરવા બદલ 2 મિલિયન ડોલરનો દંડ ફટકારી સરકારમાં જમા કરાવવા આદેશ કરાયો છે.

સુભાષ પટેલ હસમેન્સ ફાર્મસી નામનો સ્ટોર ઓપરેટ કરે છે અને આ સ્ટોર નોર્ધન લિબર્ટીઝમાં આવેલો છે. મેડિકેડ ફ્રોડ અને ચોરીના ગુનાની કબૂલાત કરનારા સુભાષ પટેલને જેલમાં નહીં જવું પડે. પરંતુ વ્યવસાયે ફાર્માસિસ્ટ સુભાષ પટેલને પાંચ વર્ષ માટે મેડિકેડ અને મેડિકેર પ્રોવાઈડર તરીકે પ્રતિબંધિત કરવામાં આવ્યા છે અને તેમનું ફાર્માસિસ્ટ તરીકેનું લાયસન્સ પાંચ વર્ષ માટે સસ્પેન્ડ રહેશે તેવું સ્ટેટના એટર્ની જનરલે જણાવ્યું છે.

સુભાષ પટેલની હસમેન્સ ફાર્મસી હાલ બંધ છે. તેમની માલિકીની વેસ્ટ ગિરાર્ડ હેલ્થ ફાર્મસી, ઈસ્ટ લેહિગ હેલ્થ ફાર્મસી, ફ્રેન્કફોર્ડ હેલ્થ ફાર્મસી તેમજ વોલનટ ફાર્મસીને પણ હાલ તાળાં વાગી ગયા છે. સુભાષ પટેલના કૌભાંડના કારણે કોઈ વ્યક્તિના સ્વાસ્થ્યને નુક્સાન થયું હોય તેવો કોઈ કેસ તપાસ દરમિયાન સામે નથી આવ્યો. જો કેસ આવ્યો હોત તો તેમની મુશ્કેલી ઘણી વધી ગઈ હોત.

એટર્ની જનરલના જણાવ્યા અનુસાર, એજન્ટ્સે હસમેન્સના કર્મચારીઓની પૂછપરછ કરી હતી. તેમણે કબૂલ્યું હતું કે સુભાષ પટેલ HIVની મોંઘી દવાઓ ફાર્મસીના લિજિટિમેટ હોલસેલ ડ્રગ સપ્લાયર્સને બદલે બીજા કોઈ સોર્સ પાસેથી ખરીદે છે. આ તપાસમાં એવું પણ બહાર આવ્યું હતું કે, ફાર્મસી દ્વારા વેચવામાં આવેલી HIV મેડિકેશન્સની લગભગ એક લાખ જેટલી ટેબ્લેટ્સ ઓથોરાઈઝ્ડ ડિસ્ટ્રિબ્યૂટર્સ પાસેથી ડોક્યુમેન્ટેડ પરચેઝ દ્વારા મેળવવામાં નહોતી આવી.

સુભાષ પટેલની ફાર્મસીએ પેશન્ટ્સને જે HIV ડ્રગ્સ વેચી હતી. તે કદાચ પ્રોપર્લી અપ્રુવ્ડ હોવાની સાથે અનસેફ પણ હતી. પરંતુ તેમ છતાંય તેમણે આ દવાનું વેચાણ કરીને પ્રોફિટ કમાયો હતો. ઓથોરાઈઝ્ડ ડીલર પાસેથી ખરીદવામાં આવતી દવાની કિંમત ઉંચી હોવાથી તેના પર મળતું માર્જિન ઓછું રહેતું હોય છે જ્યારે અનઓર્થોરાઈઝ્ડ ચેનલ્સ મારફતે લેવામાં આવેલી દવાના વેચાણમાં ઉંચું માર્જિન મળતું હોવાથી શક્ય છે કે સુભાષ પટેલે આ ખેલ કર્યો હશે.

સુભાષ પટેલ હાલ જેના માલિક છે તેવી હસમેન્સ ફાર્મસીની ગણના ફિલાડેલ્ફિયાની સૌથી જુની ફાર્મસી તરીકે થાય છે જેની શરૂઆત એક જર્મન ઈમિગ્રન્ટે કરી હતી, જોકે સુભાષ પટેલે ક્યારે આ ફાર્મસી ટેક-ઓવર કરી હતી તેની કોઈ વિગતો ઉપલબ્ધ નથી. સુભાષ પટેલનો કેસ લડનારા એટર્ની મેથ્યુ ટેલર વિલકોવે આ મામલે એવી પ્રતિક્રિયા આપી હતી કે મહત્વનું એ નથી કે ફાર્મસીએ પોતાનો ગુનો સ્વીકાર કર્યો છે, તેનાથી મહત્વની વાત હેલ્થકેર સિસ્ટમમાં રહેલા ઈસ્યૂ છે.

મેથ્યુ ટેલરે જણાવ્યું હતું કે ફાર્મસી બેનિફિટ મેનેજર્સ ડ્રગ કંપની, ઈન્શ્યોરન્સ કંપની અને ફાર્મસી વચ્ચે મિડલમેન તરીકે કામ કરે છે, આ લોકો જ દવાની કિંમત નેગોશિએટ કરવાની સાથે કઈ દવા ઈન્શ્યોરન્સમાં કવર થશે તે નક્કી કરે છે. જોકે, તેમના કારણે ફાર્મસીને મળતું માર્જિન ખૂબ જ ઘટી જાય છે અને તેના કારણે ફાર્મસી માટે સર્વાઈવ થવું મુશ્કેલ બની જાય છે. તેમણે એવો પણ દાવો કર્યો હતો કે આ સુભાષ પટેલ સામેના કેસમાં માત્ર ફ્રોડ કરનારાને જ સજા નથી થઈ પરંતુ તેની સાથે પાંચ ફાર્મસી બંધ થઈ જવાથી જે-તે વિસ્તારમાં રહેતા લોકોને પણ હવે ફાર્મસીની સેવાથી વંચિત રહેવું પડશે.