સોના-ચાંદીના ભાવમાં થયો મોટો ધડાકો

વૈશ્વિક બજારમાં છેલ્લા ચાર ટ્રેડિંગ સેશનથી સોના અને ચાંદીમાં જોવા મળી રહેલા ઘટાડા પર આખરે બ્રેક લાગી છે. મંગળવાર, 3 ફેબ્રુઆરીના રોજ આંતરરાષ્ટ્રીય બજારમાં કિંમતી ધાતુઓના ભાવમાં જોરદાર ઉછાળો જોવા મળ્યો છે. વૈશ્વિક બજારમાં હાજર સોનું આશરે 4% ની મજબૂતી સાથે 4,830 ડોલર પ્રતિ ઔંસના સ્તરે પહોંચી ગયું છે. સોનાની સાથે સાથે ચાંદીમાં પણ ખરીદીનો જબરદસ્ત ક્રેઝ જોવા મળ્યો છે. હાજર ચાંદી આશરે 8% ના જંગી ઉછાળા સાથે 82.74 ડોલર પર ટ્રેડ કરી રહી છે. ભારતીય બજારની વાત કરીએ તો, MCX પર પણ સોનું આશરે 4% વધીને 1,48,950 રૂપિયા પ્રતિ દસ ગ્રામ પર પહોંચી ગયું છે, જ્યારે ચાંદી 6.75% ના વધારા સાથે 2,52,200 રૂપિયા પ્રતિ કિલોગ્રામ પર કારોબાર કરી રહી છે.

બજારનું ફરી પાટા પર પરત ફરવાના સંકેત

બજારમાં આવેલી આ તેજી રોકાણકારો માટે રાહતના સમાચાર લઈને આવી છે, કારણ કે 30 જાન્યુઆરીના રોજ સોના અને ચાંદીમાં આવેલા કડાકાએ 1983ની યાદ અપાવી દીધી હતી. તે દિવસે હાજર સોનું 10% સુધી તૂટ્યું હતું, જે છેલ્લા 40 વર્ષનો સૌથી મોટો એકદિવસીય ઘટાડો હતો. ચાંદીની હાલત તો વધુ ખરાબ હતી, જે એક જ દિવસમાં 27% જેટલી ગબડી હતી. છેલ્લા બે સત્રમાં આંતરરાષ્ટ્રીય બજારમાં સોનું તેના રેકોર્ડ હાઈથી 13% અને ચાંદી 34% નીચે આવી ગયા હતા. જોકે, આટલા મોટા ઘટાડા બાદ બજારનું ફરી પાટા પર પરત ફરવું એ સંકેત આપે છે કે લાંબા ગાળે સોનામાં મંદી ટકી શકશે નહીં અને તે રોકાણ માટે સલામત સ્થળ સાબિત થશે.

સોનું 6,000 ડોલર સુધી પહોંચવાની આગાહી

બજારના નિષ્ણાતો માની રહ્યા છે કે સોના અને ચાંદીમાં અત્યારે 'પિક્ચર હજી બાકી છે'. ફોર્બ્સના અહેવાલ મુજબ, સુકડેન ફાઇનાન્શિયલના વિશ્લેષકો જણાવે છે કે, સોનું લાંબા ગાળા માટે 'સેફ હેવન' તરીકે અત્યંત આકર્ષક રોકાણ છે. દિગ્ગજ ઇન્વેસ્ટમેન્ટ બેંક JPMorgan ના વિશ્લેષકોએ તો વર્ષના અંત સુધીમાં સોનાનો ટાર્ગેટ વધારીને રેકોર્ડ 6,300 ડોલર કરી દીધો છે. જેપી મોર્ગનનું કહેવું છે કે સોનાની તેજી સીધી રેખામાં ચાલતી નથી, તેથી હાલનો તબક્કો માત્ર બજારના રીસેટ થવાનો ભાગ છે. તેવી જ રીતે ડ્યુશ બેંકના વિશ્લેષકોએ પણ વર્ષના અંત સુધીમાં સોનું 6,000 ડોલર સુધી પહોંચવાની આગાહી યથાવત રાખી છે, જે દર્શાવે છે કે સોનાની ચમક હજુ વધવાની છે.