બાંગ્લાદેશના રાજકારણના સૌથી શક્તિશાળી ચહેરાઓમાંથી એક અને દેશના પ્રથમ મહિલા વડાંપ્રધાન ખાલિદા ઝિયાનું આજે વહેલી સવારે 80 વર્ષની વયે નિધન થયું છે. BNP દ્વારા સોશિયલ મીડિયા પ્લેટફોર્મ X પર સત્તાવાર જાહેરાત કરવામાં આવી છે કે, આજે ફજરની નમાઝ બાદ સવારે 6 વાગ્યે તેમણે અંતિમ શ્વાસ લીધા હતા. ખાલિદા ઝિયા છેલ્લા ઘણા સમયથી લિવર ટ્રાન્સપ્લાન્ટની જરૂરિયાત, ડાયાબિટીસ અને હૃદય રોગ જેવી ગંભીર બીમારીઓથી પીડાતા હતા અને હોસ્પિટલમાં સારવાર હેઠળ હતા. તેમના નિધન સાથે જ બાંગ્લાદેશમાં શોકનું મોજું ફરી વળ્યું છે.
BNPની સંપૂર્ણ જવાબદારી પુત્ર તારિક રહેમાનના પર આવી
ખાલિદા ઝિયાના નિધન બાદ હવે તેમની પાર્ટી BNPની સંપૂર્ણ જવાબદારી તેમના પુત્ર તારિક રહેમાનના ખભા પર આવી ગઈ છે. તારિક રહેમાન અત્યાર સુધી લંડનથી કાર્યકારી પ્રમુખ તરીકે પક્ષનું સંચાલન કરી રહ્યા હતા, પરંતુ તાજેતરમાં જ તેઓ 17 વર્ષના લાંબા વનવાસ બાદ બાંગ્લાદેશ પરત ફર્યા છે. શેખ હસીનાના શાસનકાળ દરમિયાન જેલની સજા અને ધરપકડના ડરથી તેઓ દેશ છોડીને ગયા હતા. હવે માતાના અવસાન બાદ તેઓ સત્તાવાર રીતે પક્ષનું સુકાન સંભાળશે, જે બાંગ્લાદેશના આગામી રાજકારણ માટે ખૂબ જ નિર્ણાયક સાબિત થશે.
1991માં ખાલિદા ઝિયા પ્રથમવાર PM&nbsp;બન્યા
બાંગ્લાદેશનો ઇતિહાસ 'બે બેગમો' વચ્ચેની રાજકીય દુશ્મનાવટ માટે જાણીતો છે. શેખ હસીના અને ખાલિદા ઝિયા વચ્ચે 3 દાયકા સુધી સત્તા માટે સંઘર્ષ ચાલ્યો. રસપ્રદ વાત એ છે કે, 1980ના દાયકામાં આ બન્ને નેતાઓએ સાથે મળીને સૈન્ય સરમુખત્યાર ઇર્શાદ વિરુદ્ધ આંદોલન કર્યું હતું અને 1990માં લોકશાહીની સ્થાપના કરી હતી. જોકે, ત્યારબાદ સત્તાની લાલચમાં બન્ને કટ્ટર હરીફ બની ગયા હતા. 1991માં ખાલિદા ઝિયા પ્રથમવાર વડાપ્રધાન બન્યા હતા, જ્યારે શેખ હસીનાએ 2009 થી 2024 સુધી સતત 15 વર્ષ શાસન કર્યું હતું.
નોબેલ વિજેતા ડૉ. મુહમ્મદના નેતૃત્વમાં વચગાળાની સરકાર કાર્યરત
ખાલિદા ઝિયાનો રાજકારણમાં પ્રવેશ તેમના પતિ અને પૂર્વ રાષ્ટ્રપતિ જનરલ ઝિયાઉર રહેમાનની 1981માં થયેલી હત્યા બાદ થયો હતો. એક સાધારણ ગૃહિણીમાંથી દેશના સર્વોચ્ચ પદ સુધી પહોંચવાની તેમની સફર સંઘર્ષપૂર્ણ રહી હતી. 2018માં ભ્રષ્ટાચારના આરોપો હેઠળ તેમને જેલમાં ધકેલી દેવામાં આવ્યા હતા, પરંતુ 2024માં શેખ હસીનાના પતન બાદ તેમને મુક્ત કરવામાં આવ્યા હતા. હસીના સરકારના પતન માટે જવાબદાર વિદ્યાર્થી આંદોલન બાદ બાંગ્લાદેશમાં નોબેલ વિજેતા ડો. મુહમ્મદ યુનુસના નેતૃત્વમાં વચગાળાની સરકાર કાર્યરત છે.
બાંગ્લાદેશમાં સ્થિતિ સંપૂર્ણ બદલાઈ
હાલમાં બાંગ્લાદેશમાં સ્થિતિ સંપૂર્ણ બદલાઈ ગઈ છે. એક તરફ જ્યાં ખાલિદા ઝિયાનું નિધન થયું છે, બીજી તરફ શેખ હસીના ભારતમાં શરણ લઈ રહ્યા છે. બાંગ્લાદેશની અદાલતે શેખ હસીનાને તેમની ગેરહાજરીમાં જ મૃત્યુદંડની સજા સંભળાવી છે. અવામી લીગ પર પ્રતિબંધ લાદવામાં આવ્યો છે. આ સંજોગોમાં ખાલિદા ઝિયાની વિદાય બાદ બાંગ્લાદેશમાં હવે તારિક રહેમાન અને વચગાળાની સરકાર વચ્ચે સત્તાનું નવું સમીકરણ રચાશે કે કેમ તે જોવું રહ્યું.

BNPના સર્વોચ્ચ નેતા ખાલિદા ઝિયાનું લાંબી માંદગી બાદ 80 વર્ષની વયે નિધન થયું

December 30, 2025 | 15:45 IST