દક્ષિણ ફિલિપાઈન્સના બોંગાઓમાં આવેલા એક નાનકડા ટાપુ પર મંગળવારે રાત્રે આગ ફાટી નીકળી હતી, જેના કારણે સમગ્ર વિસ્તારમાં ભારે તબાહી મચી ગઈ છે. આ દુર્ઘટના બારંગાય લામિયન નામના વિસ્તારમાં ઘટી હતી, જ્યાં લાગેલી આગે જોતજોતામાં વિકરાળ સ્વરૂપ ધારણ કરી લીધું હતું.&nbsp;
આગ લગભગ 4 કલાક સુધી ફેલાઈ
આ વિસ્તારમાં મકાનો લાકડાના થાંભલાઓ પર પાણીની ઉપર બનાવવામાં આવ્યા હતા, જે મોટે ભાગે વાંસ, લાકડું અને નાળિયેરના પાંદડા જેવી હલકી અને જ્વલનશીલ સામગ્રીથી બનેલા હતા. આ કારણે આગ એક ઘરથી બીજા ઘરમાં ખૂબ જ ઝડપથી ફેલાઈ ગઈ હતી અને લગભગ 4 કલાક સુધી સતત ફેલાઈ હતો. આ આફતમાં અંદાજે 1000 જેટલા ઘરો બળીને રાખ થઈ ગયા છે, જેના પરિણામે 5000થી વધુ લોકો રાતોરાત બેઘર બની ગયા છે. દરિયાઈ વિસ્તાર હોવાથી તેજ પવનોએ આ આગને વધુ ભડકાવવાનું કામ કર્યું હતું, જેના કારણે ફાયર બ્રિગેડ અને બચાવ કામગીરીમાં ભારે અવરોધો ઊભા થયા હતા.
શોર્ટ સર્કિટ અથવા ગેસ લીકેજની આશંકા
સોશિયલ મીડિયા પર વાયરલ થયેલા વીડિયો અને તસવીરોમાં રાતના અંધકારમાં ઊંચી ઉઠતી લપેટો અને કાળા ધુમાડાના ગોટેગોટા જોઈ શકાય છે, જે આ હોનારતની ભયાનકતાનો પુરાવો આપે છે. હાલમાં આ પીડિત પરિવારો ખુલ્લા આકાશ નીચે અથવા કામચલાઉ આશ્રયસ્થાનોમાં રહેવા મજબૂર બન્યા છે. સ્થાનિકો દ્વારા હાલમાં આ આગ લાગવા પાછળના ચોક્કસ કારણોની તપાસ કરવામાં આવી રહી છે. પ્રાથમિક દ્રષ્ટિએ શોર્ટ સર્કિટ અથવા ગેસ લીકેજની આશંકા સેવાઈ રહી છે, પરંતુ સત્તાવાર પુષ્ટિ હજુ બાકી છે.&nbsp;
ટાપુ પર વસતા ગરીબ સમુદાયોની સુરક્ષા સામે સવાલો&nbsp;
ગીચ વસ્તી અને ફાયર ફાઈટર વાહનો પહોંચી ન શકે તેવા ભૌગોલિક સ્થાનને કારણે નુકસાનનો આંકડો વધી ગયો છે. સરકાર અને વિવિધ રાહત એજન્સીઓ દ્વારા અસરગ્રસ્તોને ખોરાક, પાણી અને કપડાં જેવી પ્રાથમિક સુવિધાઓ પૂરી પાડવામાં આવી રહી છે. હજારો લોકોએ પોતાની જીવનભરની મૂડી ગુમાવી દીધી હોવાથી આ વિસ્તારના પુનઃનિર્માણમાં ઘણો લાંબો સમય લાગે તેમ છે. આ આગની ઘટનાએ ટાપુ પર વસતા ગરીબ સમુદાયોની સુરક્ષા સામે ફરી એકવાર મોટા સવાલો ઉભા કર્યા છે.

ફિલિપાઈન્સમાં ભીષણ આગ

બોંગાઓ ટાપુ પર લાગેલી આગમાં 1000 જેટલા મકાનો નાશ પામ્યા અને 5000થી વધુ લોકોએ ઘર ગુમાવ્યા

February 5, 2026 | 11:03 IST